தூத்துக்குடி சிறப்பு பொருளாதார மண்டலம் மூலம் 25 ஆயிரம் பேருக்கு வேலைவாய்ப்பு: மு.க. ஸ்டாலின்

by நவீன் Fri Aug 06, 2010 3:12 pm

தூத்துக்குடி,

தூத்துக்குடி உணவுப் பதப்படுத்துதல் சிறப்பு பொருளாதார மண்டலம் மூலம்
25 ஆயிரம் பேருக்கு வேலைவாய்ப்பு கிடைக்கும் என, தமிழக துணை முதல்வர்
மு.க. ஸ்டாலின் தெரிவித்தார். தூத்துக்குடி அருகே வடக்கு காரசேரி
கிராமத்தில் தமிழக அரசின் டிட்கோ மற்றம் சி.ஐ.எல். நிறுவனம் சார்பில்
ரூ.550 கோடி மதிப்பீட்டில் உணவுப் பதப்படுத்துதல் சிறப்பு பொருளாதார
மண்டலம் அமைக்கப்படுகிறது. இந்த சிறப்பு பொருளாதார மண்டல
அர்ப்பணிப்பு விழா மற்றும் பொது வசதிகள் அடிக்கல் நாட்டு விழா
வியாழக்கிழமை இரவு நடைபெற்றது. விழாவில் துணை முதல்வர் மு.க. ஸ்டாலின்
பேசியதாவது: இந்த உணவுப் பதப்படுத்துதல் சிறப்பு பொருளாதார மண்டலம் தென்மாவட்ட தொழில் வளர்ச்சிக்கு மைல் கல்லாக அமையும். தமிழகத்தில்
வட மாவட்டங்களில்தான் அதிக தொழிற்சாலைகள் உள்ளன என்ற பேச்சு பரவலாக
உள்ளது. எனவே, தென்மாவட்டங்களில் அதிக தொழிற்சாலைகளை தொடங்க அரசு
அதிகாரிகள் மற்றும் அமைச்சர்களுக்கு முதல்வர் அறிவுரை வழங்கியுள்ளார். அதன் அடிப்படையில் தென்மாவட்டங்களில் தொழில் வளர்ச்சிக்காக பல்வேறு சலுகைகளை அரசு வழங்கி வருகிறது. அந்த வகையில் தென்மாவட்ட தொழில் வளர்ச்சிக்கு உதவும் வகையில் ரூ.550 கோடியில் இந்த சிறப்பு பொருளாதார மண்டலம் அமைக்கப்படுகிறது. உலகத் தரத்துடன், அதிநவீன தொழில்நுட்ப வசதிகளுடன் இந்த பொருளாதார மண்டலம் அமைக்கப்படுகிறது. இதனால்,
இங்கு தொழில் முதலீடுகள் அதிக அளவில் வருவதற்கு வாய்ப்புள்ளது. இந்தப்
பொருளாதார மண்டலம் மூலம் நேரடியாக 10 ஆயிரம் பேருக்கும், மறைமுகமாக 15
ஆயிரம் பேருக்கும் வேலைவாய்ப்பு கிடைக்கும். மோட்டார் உற்பத்தி,
மின்னணு பொருள்கள் உற்பத்தி, கணினிப் பொருள்கள் உற்பத்தியில் தமிழகம்
நாட்டில் முன்னணியில் இருக்கிறது. அதுபோல, உணவுப் பதப்படுத்துதல்
தொழிலிலும் முன்னணி பெறும். அதற்கு தேவையான அனைத்து உதவிகளையும் அரசு
செய்யும் என்றார் அவர். விழாவுக்கு அமைச்சர் பெ. கீதா ஜீவன் தலைமை
வகித்தார். தமிழ்நாடு தொழில் வளர்ச்சி நிறுவனம் மற்றும் தொழில்
துறை முதன்மைச் செயலர் ராஜீவ் ரஞ்சன், தமிழ்நாடு தொழில் வளர்ச்சி நிறுவன
மேலாண்மை இயக்குநர் சுனீல் பாலிவால், மாவட்ட ஆட்சியர் கோ. பிரகாஷ்.
சி.ஐ.எல். நிறுவனத் தலைவர் ரா. சரபேஸ்வர் உள்ளிட்டோர் கலந்துகொண்டனர்.