ஆக.11 முதல் டாஸ்மாக் கடையடைப்பு: பணியாளர் சங்கம் பங்கேற்பது உறுதி

மதுரை,

அரசு
பேச்சுவார்த்தை நடத்தாவிடில், பல்வேறு கோரிக்கைகளை வலியுறுத்தி,
தமிழகத்தில் ஆகஸ்ட் 11-ம் தேதி முதல் டாஸ்மாக் கடைகளை அடைத்து
மேற்கொள்ளப்படும் போராட்டத்தில், தமிழ்நாடு அரசு டாஸ்மாக் பணியாளர் சங்கம்
பங்கேற்பது உறுதி என, இச்சங்கத்தின் மாநிலத் தலைவர் பி. சரவணன்
தெரிவித்தார். இச்சங்கத்தின் தென் மாவட்ட நிர்வாகிகள் கூட்டம்,
மதுரையில் வியாழக்கிழமை நடைபெற்றது. இக்கூட்டத்துக்கு, மாநிலத் தலைவர்
சரவணன் தலைமை வகித்தார். பின்னர், அவர் செய்தியாளர்களிடம் கூறியது:
டாஸ்மாக் பணியாளர்களை பணி நிரந்தரம் செய்வது, காலமுறை ஊதியம் வழங்குவது, 8
மணி நேரம் வேலை உள்ளிட்ட பல்வேறு கோரிக்கைகளை வலியுறுத்தி, மாநிலம்
முழுவதும் அண்ணா தொழிற்சங்கம், சிஐடியு, ஏஐடியுசி உள்ளிட்ட
தொழிற்சங்கங்களைச் சேர்ந்த டாஸ்மாக் ஊழியர்கள் கடையடைப்புப் போராட்டத்தில்
பங்கேற்கின்றனர். இதில், தமிழ்நாடு அரசு டாஸ்மாக் பணியாளர்
சங்கத்தைச் சேர்ந்த சுமார் 15 ஆயிரம் பேர் பங்கேற்கின்றனர். ஒரு போராட்டம்
நடத்தவேண்டும் என்றால், கோரிக்கை மனு, பின்னர் நோட்டீஸ் என அந்த சங்கம்
சார்பில் அரசுக்கு அளிக்க வேண்டும் என, பயிற்சி டாக்டர்கள்
போராட்டத்தின்போது தமிழக முதல்வர் அறிவுறுத்தியிருந்தார். ஆனால்,
எங்கள் சங்கம் சார்பில் முறையாகச் செயல்பட்டும் இது குறித்து இன்னும்
பேச்சுவார்த்தைக்கு அழைக்கப்படவில்லை. மாறாக, போராட்டத்தில் டாஸ்மாக்
பணியாளர்கள் ஈடுபட்டால், கடைகளைத் தொடர்ந்து திறந்து நடத்துவதற்கு புதிதாக
பணியாளர்களை அரசு தேர்வு செய்து வருவதாகத் தெரிகிறது. இதுபோன்ற
நடவடிக்கையால் நாங்கள் பின்வாங்கமாட்டோம். மாநிலம் முழுவதும்
ஆக. 11, 12, 13-ம் தேதிகளில் டாஸ்மாக் பணியாளர்கள் சார்பில் உண்ணாவிரதம்
நடைபெறவுள்ளது. மதுரையில் 12 மற்றும் 13-ம் தேதிகளில் உண்ணாவிரதம்
நடைபெறும் என்றார். முன்னதாக நடைபெற்றக் கூட்டத்தில், தமிழ்நாடு
அரசுப் பணியாளர் சங்க மதுரை மாவட்டத் தலைவர் மனோகரன், டாஸ்மாக் பணியாளர்
சங்க அமைப்பாளர் ஆனந்தசாமி மற்றும் மாவட்ட நிர்வாகிகள் பங்கேற்றனர்.

இதை அனுமதிக்க கூடாது