''என்னிடம் இயற்கையாகவே அது இருக்கு ! '' - வேதிகா

வேதிகாவிடம் அது இருக்கிறதா, இல்லையா என்றே தெரியாது. சுத்திச் சுத்தி வந்தாலும், தேடித் தேடிப் பார்த்தாலும் அது கண்ணுக்கே தட்டுப்படாது. சந்தித்துத் திரும்பிய பிறகும் "" பார்த்தோமா, இல்லையா ?'' என்று எனக்கு குழப்பமாகவே இருந்தது.


"" ஆமாங்க... அது இருந்தும், இல்லாம இருக்கிறதுதான் எனக்கு அழகுன்னு நிறையப் பேர் பாராட்டி இருக்காங்க !'' என்று வேதிகாவே பெருமிதப்படுகிறார்.


"" அது எது ?'' என்று விசாரிக்கும் ஆர்வ அவசரக்குடுக்கைகள், ""தட்டானுக்குச் சட்டை போட்டால் குட்டைப் பையன் கட்டையால் அடிப்பான் ... அவன் யார் ?'' என்ற கேள்விக்குப் பதில் சொல்லுங்கள். ""அது எது'' என்று உங்களுக்கு எஸ்.எம்.எஸ் வந்து விழும். விடை தெரியாதவர்கள் மேலே ஜருகண்டி... ஜருகண்டி...


"" ஏன் இவ்ளோ ஒல்லியா இருக்கீங்க ?''


""என் உடல் வாகே அப்படித்தாங்க. நான் பிறந்ததில் இருந்தே சைஸ் ஜீரோ அழகி. நான் இதுவரை டயட்லாம் இருந்ததே இல்லை. எப்பவும் கண்டபடி சாப்பிடுவேன். இப்போ என் வெயிட் 49 கிலோ. எப்படியாவது வெயிட்ல அரை செஞ்சுரி போடலாம்னு சாக்லேட், சீஸ்னு சாப்பிட்டுப் பார்க்குறேன். ம்ஹூம்...ஒண்ணும் நடக்க மாட்டேங்குது. இப்போ ஹிந்தி ஹீரோயின்கள் எல்லோரும் என்னை மாதிரி சைஸ் ஜீரோ ஆகுறதுக்குப் படாதபாடு படுறாங்க. நமக்கு இயற்கையாகவே அது இருக்கு. அதனால இப்படியே இருந்திடலாம்னு முடிவு பண்ணிட்டேன். !''


"" ஆனா, இங்கே கொஞ்சமாச்சும் புஷ்டியா இருந்தாத்தான் சிக்ஸர் அடிக்க முடியும். நமீதால்லாம் எங்களுக்கு ""உடன்பிறவா மச்சினிச்சி '' தெரியும்ல ?''


""ஓ !! நல்லாத் தெரியுமே. ஆனா, த்ரிஷா வந்த பிறகு ""ஒல்லிக்குச்சி உடம்புக்காரி''ன்னுல்லாம் பாட்டு எழுத ஆரம்பிச்சிட்டாங்கன்னும் தெரியும். தமிழ் பாய்ஸ் என்னை மாதிரி குட்டிப் பிசாசுகளையும் மனசுல ஏத்திக்குவாங்கன்னு நம்பிக்கை வந்த பிறகுதான் சென்னைக்கு ஃப்ளைட் டிக்கெட்டே எடுத்தேன் !''


""வேதிகாவுக்கு என்னல்லாம் பிடிக்கும் ?''


""ரஹ்மான் மியூஸிக் அவ்வளவு பிடிக்கும். நடிகைன்னு ஃபார்ம் ஆனதும் அவர் மியூஸிக்ல ஒரு பாட்டுக்காவது டான்ஸ் ஆட முடியுமான்னு எதிர்பார்த்துட்டு இருந்தேன். ""சக்கரகட்டி'' படத்துல ""மிஸ் யூ மிஸ் யூ டா'' பாட்டுக்கு டான்ஸ் ஆட சான்ஸ். என் கால் தரையிலேயே இல்ல. அந்தப் பாட்டை நீங்க கவனிச்சுப் பார்த்தீங்கன்னா என் கண்ல ஸ்பெஷல் சந்தோஷம் தெரியும். அந்தப் பாட்டுல நல்லா ஆடுனேன்னு மலேசியாவில எனக்கு அவார்டு கொடுத்தாங்க. கேட்கணுமா... மெகா ஜாக்பாட் சந்தோஷம் !''


""இவ்ளோ நீளமா கூந்தல் வெச்சு இருக்கீங்க...சிரமமா இல்லையா ?''


"" டென்த் படிக்கிறவரை நானும் ""பாய்கட்'' தான் பண்ணியிருந்தேன். பாய்கட், ஜீன்ஸ்,டி.ஷர்ட் னு பார்க்க சேட்டுப் பையன் மாதிரியே இருபேன். நிறையப் பேர் என்னை பையன்னு நினைச்சு ""அரே பாய்''னு தான் கூப்பிடுவாங்க. அப்பவே நான் நல்லா டான்ஸ் பண்ணுவேன். ஒரு கல்ச்சுரல்ல சவுரி முடி வெச்சுகிட்டு பரதநாட்டியம் ஆடினேன். பாதி ஆட்டத்துலேயே சவுரி பறந்து அவமானம் ஆயிருச்சு. டான்ஸருக்குக் கூந்தல் ரொம்ப அவசியம். நாம ஆடுற டான்ஸூக்கு ஏத்த மாதிரி நம்ம தலை முடியும் ஆடும்போது அத்தனை க்ளாஸிக்கா இருக்கும். பரதம் ஆடுறதுக்காகவே முடி வளர்க்க ஆரம்பிச்சேன். இப்போ வெட்ட மனசு இல்லாம அப்படியே விட்டுட்டேன் !''


""ஹே என்னங்க விஷேஷம் ?''


""ஆங் ! ""காளை'' படத்துல ""குட்டிப் பிசாசே...'' பாட்டுக்கு நான் போட்ட ஆட்டத்துக்கு அவ்வளவு ரெஸ்பான்ஸ். ""இடுப்பைச் சும்மா வெட்டி, வெட்டி ஆடுனீங்க''ன்னு ஏகப்பட்ட பாராட்டுகள்.அந்தப் பாட்டு இப்போ டிவியில ஓடினாலும் 20 எஸ். எம்.எஸ். பாராட்டி என் மொபைல்ல விழும். இருந்தும் இல்லாம இருக்கற இந்த மாதிரி இடுப்புக்குத்தான் இப்போ முதல் மரியாதை... தெரிஞ்சுக்கோங்க !''


ஆக, ரசிக மகா ஜனங்களே ""அது எது ?'' என்று இந்நேரம் உங்களுக்குப் புரிந்திருக்கும். இன்னமும் புரியவில்லை என்றால், ""பன்றிக்கு நன்றி சொல்லி குன்றின் மேல் ஏறி நின்றால் வென்றிடலாம் குலசேகரனை. அது என்ன ?'' என்பதற்குப் பதில் சொல்லுங்கள். வீட்டுக்கு தந்தியடிக்கிறோம் !!

ஆனந்த விகடன்