பக்தர்கள் தலையில் தேங்காய் உடைக்கும் விழா

கரூர் அருகே பக்தர்களின் தலையில் தேங்காய் உடைத்து நேர்த்திக்கடன் செலுத்தும் திருவிழா புதன்கிழமை நடைபெற்றது.கரூர்
மாவட்டம், கிருஷ்ணராயபுரம் அருகேயுள்ளது மேட்டுமகாதானபுரம் மகாலட்சுமி
அம்மன் கோயில். கிருஷ்ணதேவராயர் ஆட்சியில் கட்டப்பட்ட இக் கோயிலில் ஆடி
19-ல் பக்தர்கள் தலையில் தேங்காய் உடைக்கும் நிகழ்ச்சி சிறப்பாக
நடைபெறும். இதையொட்டி, ஆடிப்பெருக்கான ஆகஸ்ட் 3-ல் இந்தத்
திருவிழா தொடங்கியது. இரவில் அம்மனுக்கு சிறப்பு பூஜைகள் நடத்தப்பட்டு,
அலங்காரத்துடன் திருக்காவிரிக்குச் சென்று தீர்த்தவாரி நடைபெற்றது.
பின்னர், புதன்கிழமை காலை காவிரியிலிருந்து புறப்பட்ட அம்மன், வழியில்
பக்தர்களின் பூஜையை ஏற்றுக்கொண்டு கோயிலுக்குச் சென்றார். இதைத்
தொடர்ந்து பக்தர்கள் தலையில் தேங்காய் உடைக்கும் நிகழ்ச்சி தொடங்கியது.
தேங்காய் உடைப்பதற்காக அனுமதிச் சீட்டு பெற்றிருந்த சுமார் 500 பேர்
கோயில் வளாகத்திற்குள் வரிசையாக அமர வைக்கப்பட்டிருந்தனர். கோயிலுக்குள்
சென்ற அம்மனுக்கும், பரிவார தெய்வங்களுக்கும் பூசாரி பெரியசாமி பூஜை
செய்தார். தொடர்ந்து, இரும்புமுள் பாதணியும், கையில் ஆயுதங்களுடன்
பூஜை நடத்திய பூசாரி, கோயிலின் முன்புள்ள தீபக் கல் மீது தீபத்தை ஏற்றி
வைத்து, பக்தர்களின் தலைகளில் தேங்காய்களை உடைக்கத் தொடங்கினார்.