மதுரை புறநகர்ப் பகுதியில் முத்திரைத்தாள் தட்டுப்பாடு!

மதுரை: மதுரை
மாவட்டம், புறநகர்ப் பகுதிகளில் குறிப்பிட்ட ரூபாய் மதிப்பிலான
முத்திரைத்தாள்களுக்கு தட்டுப்பாடு ஏற்பட்டுள்ளதாகப் புகார் எழுந்துள்ளது.
இதனால், பொதுமக்கள் பத்திரப் பதிவு செய்வதில் தாமதம் ஏற்பட்டுள்ளது. தமிழகத்தில்
574 சார்-பதிவாளர் அலுவலகங்கள் உள்ளன. இதில் மதுரை மண்டலத்தில்
விருதுநகர், மதுரை, சிவகங்கை, புதுக்கோட்டை, திண்டுக்கல், ராமநாதபுரம்,
தேனி, விருதுநகர் உள்ளிட்ட மாவட்டங்கள் வருகின்றன. மதுரை
மாவட்டத்தில் மதுரை தெற்கு, மதுரை வடக்கு, அரசரடி, சோழவந்தான்,
வாடிப்பட்டி, திருமங்கலம், திருப்பரங்குன்றம், சொக்கிகுளம்,
கருங்காலக்குடி, மேலூர், உசிலம்பட்டி உள்ளிட்ட இடங்களில் இயங்கிவரும்
சார்-பதிவாளர் அலுவலகங்களில் பத்திரப் பதிவு நடைபெறுகிறது. இந்த
அலுவலகங்களில் சொத்துப் பரிமாற்றம், நிலம் விற்பது-வாங்குவது, சொத்து
உயில் பதிவு, வீடு ஒத்தி உள்ளிட்ட பல்வேறு விஷயங்களுக்காக பத்திரப் பதிவு
செய்யப்பட்டு வருகிறது. ரூ.10, ரூ.20, ரூ.50, ரூ.100, ரூ.500,
ரூ.1000, ரூ.5000 என பல்வேறு மதிப்புகளில் சொத்து மதிப்புக்கு ஏற்ப
பத்திரம் பதிவு செய்யப்படுகிறது. இதற்கான முத்திரைத்தாள்கள் அரசு உரிமம்
பெற்ற முத்திரைத்தாள் விற்பனையாளர்களால் விற்கப்படுகிறது. கிராமப்புறப்
பகுதிகளை ஒட்டிய சார்-பதிவாளர் அலுவலகங்களில் குறைந்த மதிப்பிலான
முத்திரைத்தாள்கள் அதிகளவில் விற்பனை செய்யப்படுவது வழக்கம். இந்த
முத்திரைத்தாள்களை உரிமம் பெற்ற முத்திரைத்தாள் விற்பனையாளர்கள், அரசுக்
கருவூலத்தில் இருந்து பெற்று, பொதுமக்களுக்கு விநியோகிக்கின்றனர். மாவட்ட
கருவூலத்தில் இருந்து அந்தந்தப் பகுதி தாலுகா கருவூலங்களுக்கு
முத்திரைத்தாள் அனுப்பப்பட்டு அங்கிருந்து, முத்திரைத்தாள்
விற்பனையாளர்களுக்கு வழங்கப்படுகிறது. இந் நிலையில், கடந்த ஒருமாத
காலமாக மதுரை புறநகர்ப் பகுதியில் உள்ள வாடிப்பட்டி, சோழவந்தான்,
அலங்காநல்லூர், செக்கானூரணி உள்ளிட்ட பகுதிகளில் குறிப்பிட்ட ரூபாய்
மதிப்பிலான முத்திரைத்தாள்களுக்கு தட்டுப்பாடு ஏற்பட்டுள்ளதாகப் புகார்
எழுந்துள்ளது.வாடிப்பட்டி, சோழவந்தான் பகுதி சார்-பதிவாளர் அலுவலகங்களைச்
சேர்ந்த முத்திரைத்தாள் விற்பனையாளர்கள், வாடிப்பட்டி கருவூலத்தில்
இருந்து முத்திரைத்தாள்களை பெறுவது வழக்கம். இந் நிலையில், கடந்த
20 நாள்களுக்கும் மேலாக ரூ.1,000, ரூ.500, ரூ.100, ரூ.50, ரூ. 20
ஆகியவற்றுக்கான முத்திரைத்தாள்கள் வாடிப்பட்டி சார்-கருவூலத்தில் இல்லை.
இதனால், பொதுமக்களுக்கு அதற்கான முத்திரைத்தாள் கிடைப்பதில் தட்டுப்பாடு
ஏற்பட்டுள்ளது. இதுகுறித்து முத்திரைத்தாள் விற்பனையாளர் ஒருவர் கூறியதாவது:
வாடிப்பட்டி சார்-கருவூலத்தில் முத்திரைத்தாள் இல்லை என்கின்றனர். ஆனால்,
மாவட்ட கருவூலத்தில் போதுமான அளவில் முத்திரைத்தாள் இருப்பதாகவும்
கூறுகின்றனர். இதனால், எங்களிடம் வரும் பொதுமக்களுக்கு முத்திரைத்தாள்
வழங்குவதில் காலதாமதம் ஏற்படுகிறது. போதிய முத்திரைத்தாள்கள் இல்லாததால்,
பத்திரம் எழுதுவோருக்கும் வேலையிழப்பு ஏற்பட்டு வருகிறது என்றார். வெப்
கேமரா மூலம் புகைப்படம் மற்றும் கைரேகைகளைப் பயன்படுத்தி பத்திரப் பதிவு
செய்யும் புதிய முறை தமிழகத்தில் கடந்த சில தினங்களுக்கு முன்பு
தொடங்கப்பட்டது. நவீன முறைகளைப் பயன்படுத்தி பத்திரப் பதிவுகளில்
ஏற்படும் மோசடிகளைத் தடுக்க அரசு பல்வேறு புதிய நடவடிக்கைகளை எடுத்து
வரும் நிலையில், முத்திரைத்தாள்கள் தட்டுப்பாடு இன்றி கிடைக்கவும்
நடவடிக்கை எடுக்க வேண்டும் என்பதே பொதுமக்கள் மற்றும் முத்திரைத்தாள்
விற்பனையாளர்களின் எதிர்பார்ப்பாகும்.