பாலுக்கு கிடைக்குமா மானியம்?

கோவை: அன்றாட
வாழ்க்கையில் உணவுப் பொருள்களில் பால் மிக முக்கியமான பொருளாக இருக்கிறது.
உணவு தானியங்களின் உற்பத்தியைப் போல, பால் உற்பத்தியிலும் கவனம் செலுத்த
வேண்டியது அவசியமாக இருக்கிறது. தமிழகத்தில் நிலவும் இப்போதைய சூழல் பால்
உற்பத்தியாளர்களான விவசாயிகள், படிப்படியாக அத் தொழிலைக் கைவிடக் கூடிய
நிலையை எட்டிச் சென்று கொண்டிருக்கிறது. தமிழகத்தில் 17 இடங்களில்
கூட்டுறவு பால் உற்பத்தியாளர் ஒன்றியங்கள் (ஆவின்) செயல்பட்டு வருகின்றன.
கூட்டுறவு ஒன்றியங்கள் ஏறத்தாழ 25 ஆயிரம் பால் கூட்டுறவுச் சங்கங்கள்
மூலமாக உற்பத்தியாளர்களிடம் இருந்து கொள்முதல் செய்து வாடிக்கையாளர்களுக்கு
விற்பனை செய்கிறது. கூட்டுறவுச் சங்கங்களில் ஏறத்தாழ ஒரு லட்சத்துக்கும்
மேற்பட்டோர் உறுப்பினர்களாக இருக்கின்றனர். நாளொன்றுக்கு 63 லட்சம்
லிட்டர் பால் விற்பனைக்கு அனுப்பப்படுகிறது. பால் விற்பனையில்
ஏராளமான தனியார் நிறுவனங்கள் நுழைந்துவிட்ட நிலையிலும் அரசு நிறுவனம் என்ற
நம்பிக்கை, தரம் ஆகியவற்றின் காரணமாக ஆவின் பால் விற்பனையில் சாதகமான
நிலையே தொடருகிறது. பெரும்பாலான கூட்டுறவு ஒன்றியங்கள் லாபத்தில் இயங்கி
வருகின்றன. ஆனால், ஒன்றியங்களுக்கு பால் வழங்கும் உற்பத்தியாளர்கள்
உற்பத்திச் செலவைக்கூட ஈடுகட்ட முடியாத நிலையில் இருக்கின்றனர். தனியார்
நிறுவனங்களில் பாட்டில்களில் அடைத்து விற்கப்படும் தண்ணீர் ஒரு லிட்டர்
ரூ.12-க்கு விற்பனை செய்யப்படுகிறது. ஆனால், ஆவின் கொள்முதல் செய்யும்
பால் சில நேரங்களில் அதைவிடக் குறைவாக தொகை நிர்ணயம் செய்யப்படுகிறது. அதேநேரம்,
லிட்டர் ரூ.20 வரை தனியார் நிறுவனங்கள் கொள்முதல் செய்வதால், கூட்டுறவு
ஒன்றியங்களைக் காட்டிலும் தனியார் நிறுவனங்களுக்கு வழங்க விவசாயிகள்
ஆர்வம் காட்டி வருகின்றனர். பெரும்பாலான இடங்களில் ஆவின் நிறுவனத்தின்
பால் கொள்முதல் திறன் குறைந்து வருவதற்கு இதுவே முக்கியக் காரணம்.
விளைபொருள்களுக்கு ஏற்ற விலை கிடைக்கவில்லை, தண்ணீர் பற்றாக்குறை உள்ளிட்ட
காரணங்களால் விவசாயம் குறைந்து வரக்கூடிய நிலையில் தற்போது கட்டுப்படியான
விலை கிடைக்கவில்லை என்பதால் பால் உற்பத்தியையும் படிப்படியாக கைவிடக்
கூடிய மனநிலைக்கு விவசாயிகள் தள்ளப்பட்டுள்ளனர். இதன் எதிரொலியாக
கொள்முதல் விலையை உயர்த்தக் கோரி தமிழகத்தின் பல்வேறு பகுதிகளிலும் பால்
உற்பத்தியாளர்கள் தொடர் போராட்டங்களை நடத்தி வருகின்றனர். "பாலின்
கொழுப்புச் சத்து அடிப்படையில் லிட்டருக்கு குறைந்தபட்சம் ரூ.11-ல்
இருந்து ரூ.14.75 வரை வழங்கப்படுகிறது. பால் உற்பத்தி செய்ய சராசரியாக
லிட்டருக்கு ரூ.25 செலவாகிறது. கொள்முதல் விலையை கடந்த சில மாதங்களுக்கு
முன்பு அரசு உயர்த்தியது. இது போதுமானதாக இல்லையென உற்பத்தியாளர்கள்
கூறிவந்த நிலையில், ஓரிரு நாள்களிலேயே தீவனங்களின் விலையும்
உயர்த்தப்பட்டது. இதனால், கொள்முதல் விலையின் பயன் விவசாயிகளுக்குக்
கிடைக்கவில்லை. கால்நடைகளுக்கு வழங்கும் முக்கியத் தீவனமான
புண்ணாக்கு 60 கிலோ கொண்ட ஒரு மூட்டை ரூ.820-க்கும், தவிடு ஒரு மூட்டை
ரூ.600-க்கும் விற்பனை செய்யப்படுகிறது. இதைக் கணக்கிட்டுப்பார்த்தால்
ஆவின் வழங்கும் தொகை உற்பத்திச் செலவை ஈடுகட்ட முடியாத நிலைக்கு
விவசாயிகள் தள்ளப்பட்டுள்ளனர்' என்கிறார் தமிழக விவசாயிகள் சங்கத்தின்
கோவை மாவட்ட செயலர் பி.கந்தசாமி. "ஆவின் நிறுவனம் மூலமாக ஏற்கெனவே
தீவனங்கள் மானிய விலையில் உற்பத்தியாளர்களுக்கு வழங்கப்பட்டன. தற்போது
தீவனங்கள் வழங்குவது நிறுத்தப்பட்டுவிட்டது. கொள்முதல் விலையோடு, ஆண்டின்
இறுதியில் ஊக்கத் தொகை மட்டுமே வழங்கப்படுகிறது. அதுவும், அனைத்து
ஒன்றியங்களிலும் வழங்கப்படுவதில்லை. பால் உற்பத்தியாளர்களுக்கு
பல்வேறு மாநிலங்களில் மானியம் வழங்கப்படுகிறது. தமிழகத்திலும் அதைக்
கொண்டு வந்தால் உற்பத்தியாளர்களின் சுமையைக் குறைப்பதாக இருக்கும்'
என்கிறார் தமிழ்நாடு விவசாயிகள் சங்க கோவை மாவட்டச் செயலர்
வி.பி.இளங்கோவன். பால் கொள்முதல் விலையை உயர்த்தினால், விற்பனை விலையையும்
உயர்த்த வேண்டும் என்பது அரசின் எண்ண ஓட்டமாக இருக்கிறது.நுகர்வோருக்கு
வழங்கப்படும் பால் விலையை உயர்த்தினால் மக்களிடம் இருந்து எதிர்ப்புகள்
உருவாகும் என்பதும் கொள்முதல் விலை உயர்த்தப்படாததற்கு ஒரு காரணமாக
இருக்கிறது. பொதுவிநியோகத் திட்டத்தில் வழங்கப்படும் அரிசி மத்திய,
மாநில அரசுகள் வழங்கும் மானியத்தில் ஒரு ரூபாய்க்கு வழங்க முடிகிறது.
அதேபோல, கூட்டுறவு ஒன்றியங்கள் கொள்முதல் செய்யும் பாலுக்கும் மானியம்
வழங்கினால் உற்பத்தியாளர்கள் பயன்பெறுவார்கள். அதோடு நுகர்வோருக்கும் சுமை
இல்லாமல் இருக்கும்.

நல்ல தகவல் அரசு சிந்திக்குமா , நன்றி நவீன்