ஆப்கானிஸ்தான் போரில் தோல்வி?: சர்தாரிக்கு அமெரிக்கா கண்டனம்

வாசிங்டன்
ஆப்கானிஸ்தான் போரில் அமெரிக்கா தோற்று வருவதாக கூறிய பாகிஸ்தான் அதிபர் சர்தாரிக்கு அமெரிக்கா கண்டனம் தெரிவித்துள்ளது.
ஆப்கானிஸ்தானில் தலிபான்களுக்கு எதிரான போரில் அமெரிக்கா தலைமையிலான
நேட்டோ எனப்படும் பன்னாட்டு படைகள் ஈடுபட்டுள்ளன. இதுகுறித்து பிரான்சு
நாட்டு பத்திரிகைக்கு பேட்டி அளித்த பாகிஸ்தான் அதிபர் சர்தாரி,
ஆப்கானிஸ்தான் போரில் பன்னாட்டு படைகள் தோற்று வருவதாக கூறினார். அவர்
மேலும் கூறியதாவது:-
ஆப்கன் மக்களின் இதயங்களை வெல்வதற்கான போரில் தோற்று விட்டதால்,
தலிபான்களுடனான போரிலும் தோல்வி ஏற்பட்டு வருகிறது. படை பலத்தை
அதிகரிப்பது, சிறிய பதிலடி நடவடிக்கைதான். ஆப்கன் மக்களின் இதயங்களை
வெல்ல, பொருளாதார மேம்பாட்டை கொண்டுவர வேண்டும். அவர்களின் வாழ்க்கையை
மாற்றுவது மட்டுமின்றி, மேம்படுத்தவும் முடியும் என்று நிரூபிக்க
வேண்டும். இவ்வாறு அவர் கூறினார்.
சர்தாரியின் இந்த கருத்துக்கு அமெரிக்கா கண்டனம் தெரிவித்துள்ளது.
இதுகுறித்து வெள்ளை மாளிகை செய்தித்தொடர்பாளர் ராபர்ட் கிப்ஸ் கூறியதாவது:-
சர்தாரியின் பேட்டியை நான் படிக்கவில்லை. எந்த அடிப்படையில் இந்த
முடிவுக்கு அவர் வந்தார் என்று தெரியவில்லை. அவரது கருத்தை அதிபர் ஒபாமா
ஏற்றுக்கொள்வார் என்று நான் கருதவில்லை. ஆப்கானிஸ்தானில் கடந்த சில
மாதங்களாக எடுக்கப்பட்ட நடவடிக்கைகள், அந்நாட்டு மக்களின் இதயங்களையும்,
மனங்களையும் கவனத்தில் கொண்டே எடுக்கப்பட்டன. ஆப்கன் போரில் முன்னேற்றம்
ஏற்பட்டு வருவதாக ஒபாமாவும் கூறியுள்ளார்.
கடந்த ஆண்டு, இஸ்லாமாபாத்துக்குள் தலிபான்கள் நுழைய முயன்றபோது,
அவர்களின் கொடூர முகத்தை பாகிஸ்தான் மக்கள் அறிந்தார்கள். அதுபோலவே,
தலிபான்களின் கொடூர முகத்தை ஆப்கன் மக்களும் அறிவார்கள். தீவிரவாதிகளுக்கு
எதிராக பாகிஸ்தான் எடுத்த நடவடிக்கை, அவர்களும், நாங்களும் பெருமைப்படக்
கூடியதுதான். ஆனால், பாகிஸ்தான் இன்னும் செய்ய வேண்டியது நிறைய
இருக்கிறது. இவ்வாறு அவர் கூறினார்.
அமெரிக்க வெளியுறவுத்துறை செய்தித்தொடர்பாளர் பி.ஜே.குரோலியும் சர்தாரிக்கு கண்டனம் தெரிவித்துள்ளார். குரோலி கூறியதாவது:-
ஆப்கன் போரில் நாங்கள் இன்னும் வெற்றி பெறவில்லை. அதற்காக தோற்று
வருகிறோம் என்று கூற முடியாது. வெற்றி பெறும்வரை கடினமாக போராட நாங்கள்
தீர்மானித்துள்ளோம். இது தெற்கு ஆசியாவுக்கு மட்டுமான போர் அல்ல. உலகம்
முழுவதற்குமான போர். இவ்வாறு அவர் கூறினார்.