தவறான தகவல்களை வெளியிடுகிறார் ஜெயலலிதா: மு.கண்ணப்பன் குற்றச்சாட்டு

நவீன் · நவீன் Thu Aug 05, 2010 3:13 pm

கோவை,

பொறுப்பான பதவியில் இருந்த அதிமுக பொதுச்செயலர் ஜெயலலிதா, தவறான தகவல்களை
வெளியிடுவது எந்த வகையில் நியாயம்? என்று முன்னாள் மத்திய அமைச்சர்
மு.கண்ணப்பன் கேள்வி எழுப்பியுள்ளார். அதிமுக பொதுச்செயலர்
ஜெயலலிதா நீதிமன்றங்களில் தொடர்ந்து வாய்தா வாங்குவதை கண்டித்து கோவை
செஞ்சிலுவை சங்கக் கட்டடம் அருகே திமுக இளைஞர் அணி சார்பில் புதன்கிழமை
நடைபெற்ற ஆர்ப்பாட்டத்தில் அவர் பேசியது: தமிழகத்தில் உள்ள 80
சதவீத பயனாளிகளுக்கு இலவச கலர் டிவி வழங்கப்பட்டுள்ளது. மீதமுள்ள 20 சதவீத
பேர்களுக்கு இந்த ஆண்டுக்குள் கலர் டிவி வழங்கப்பட்டுவிடும் என்று துணை
முதல்வர் மு.க.ஸ்டாலின் கூறியுள்ளார். ஆனால், பெரும்பாலானவர்களுக்கு கலர்
டிவி வழங்கப்படவில்லை என ஜெயலலிதா ஆதாரமின்றி குற்றஞ்சாட்டுகிறார்.
கோவையில் நடைபெற்ற அதிமுக பொதுக்கூட்டத்தில் பேசிய ஜெயலலிதா, கலைஞர்
காப்பீடு திட்டத்துக்கு ரூ.2 ஆயிரம் கோடி ஒதுக்கப்பட்டு, அதில் ரூ.400
கோடி கருணாநிதி குடும்பத்துக்கு லஞ்சமாக வழங்கப்பட்டுள்ளது என தவறான தகவலை
வெளியிட்டுள்ளார். 2009-10-ம் ஆண்டின் தமிழக பட்ஜெட்டில் இத்
திட்டத்துக்கு ரூ.750 கோடி மட்டுமே ஒதுக்கப்பட்டது. இத் திட்டத்தின்கீழ்
ஜூலை 14-ம் தேதி வரை 1 லட்சத்து 50 ஆயிரம் பேர் சிகிச்சை பெற்றுள்ளனர்.
இதன் மூலம் தமிழக அரசுக்கு ரூ.638 கோடி செலவு ஏற்பட்டுள்ளது.
சட்டப்பேரவையில் எதிர்கட்சித் தலைவராக இருக்கும் ஜெயலலிதா, எந்தவித
ஆதராரமும் இன்றி தவறான தகவல்களை பரப்பி வருகிறார். 1991-ல்
ஜெயலலிதா முதல்வர் பொறுப்பு ஏற்கும்முன்பு அவரது சொத்துமதிப்பு ரூ.2 கோடி.
1996-ல் அவர் ஆட்சிப் பொறுப்பில் இருந்து இறங்கும்போது அவரது சொத்து
மதிப்பு ரூ.66 கோடியே 44 லட்சம். 5 ஆண்டுகளில் அவரது சொத்து மதிப்பு பல
மடங்கு எப்படி அதிகரித்தது?. தன் மீதான சொத்து குவிப்பு வழக்கில்
இதுவரை 7ஆண்டுகளாக வாய்தா வாங்கிக்கொண்டு வழக்கை இழுத்தடித்து வருகிறார்.
மீண்டும் ஆட்சிக்கு வந்துவிட்டால் வழக்கில் இருந்து தப்பித்துக்கொள்ளலாம்
என பகல் கனவு காண்கிறார், அது நடக்காது. இவ் வழக்கை நீதிமன்றம் விரைந்து
விசாரிக்க வேண்டும் என்றார். ஆர்ப்பாட்டத்துக்கு, கோவை மாவட்ட
திமுக இளைஞர் அணி அமைப்பாளர் அருண்குமார் தலைமை வகித்தார். முன்னாள்
எம்.பி.க்கள் மு.ராமநாதன், க.ரா.சுப்பையன், இரா.மோகன், விடுதலைவிரும்பி,
கோவை துணை மேயர் நா.கார்த்திக், மாநகராட்சி எதிர்கட்சித் தலைவர்
வெ.ந.உதயக்குமார், தெற்கு மண்டலத் தலைவர் பைந்தமிழ், கவுன்சிலர்கள் மீனா
லோகநாதன், கார்த்திக் செல்வராஜ், சேரலாதன் உள்பட பலர் பங்கேற்றனர்.

**அருண்** · **அருண்** Thu Aug 05, 2010 3:15 pm

காப்பீடு திட்டத்துக்கு ரூ.2 ஆயிரம் கோடி ஒதுக்கப்பட்டு, அதில் ரூ.400
கோடி கருணாநிதி குடும்பத்துக்கு லஞ்சமாக வழங்கப்பட்டுள்ளது...................சரியாகதான் சொல்லிருக்கிறார்........