துணை முதல்வர் ஸ்டாலின் இன்று நெல்லை வருகை

திருநெல்வேலி
மாவட்டத்தில் இரண்டு நாள்கள் சுற்றுப்பயணம் மேற்கொள்ள உள்ள துணை முதல்வர்
மு.க. ஸ்டாலின் வியாழக்கிழமை மாலை இங்கு வருகிறார். இம்
மாவட்டத்தில் நடைபெறும் அரசு விழாக்களில் அவர் திறந்துவைக்கும் திட்டப்
பணிகள், அடிக்கல் நாட்ட உள்ள பணிகள் மற்றும் வழங்க உள்ள நலத்திட்ட
உதவிகளின் மொத்த மதிப்பு சுமார் ரூ. 203 கோடி ஆகும். தூத்துக்குடி
மாவட்ட நிகழ்ச்சிகளை முடித்துக் கொண்டு திருநெல்வேலி மாவட்டத்திற்கு வரும்
துணை முதல்வருக்கு பாளையங்கோட்டை சாரதா கல்லூ ரி அருகே மாலை 6 மணி அளவில்
மாவட்ட திமுக செயலர் வீ. கருப்பசாமி பாண்டியன் தலைமையில் வரவேற்பு
அளிக்கப்பட உள்ளது. இரவில் அவர் தாழையூத்தில் உள்ள தனியார் விருந்தினர்
மாளிகையில் தங்குகிறார். சுற்றுப்பயணத்தின் முதல் நாளான
வெள்ளிக்கிழமை காலை 9 மணிக்கு வண்ணார்பேட்டையில் ரூ.14 கோடியில்
கட்டப்பட்டுள்ள மேம்பாலத்தை துணை முதல்வர் திறந்து வைக்கிறார். பின்னர்,
வீரவநல்லூரில் மத்திய இணை அமைச்சர் நெப்போலியன் கட்டியுள்ள "மயோபதி'
தசைத்திறன் மாறுபாடு மருத்துவமனை மற்றும் ஆராய்ச்சி நிலையத்தை துணை
முதல்வர் திறந்து வைக்கிறார். காலை 10 மணிக்கு அம்பாசமுத்திரம்
தீர்த்தபதி மேல்நிலைப் பள்ளியில் நடைபெறும் அரசு விழாவில், பாளையங்கோட்டை
வண்ணார்பேட்டை மேம்பாலம், மணிமுத்தாறு, விக்கிரமசிங்கபுரம் குடிநீர்த்
திட்டம் உள்பட ரூ. 47.89 கோடி மதிப்புள்ள 354 திட்டப் பணிகளைத்
திறந்துவைக்கிறார். மேலும், பாளையங்கோட்டை குலவணிகர்புரம் ரயில்வே
கேட்டில் ரூ.25 கோடியில் மேம்பாலம் உள்பட ரூ. 55.50 கோடி மதிப்புள்ள 40
புதிய பணிகளுக்கு அடிக்கல் நாட்டுகிறார். இந்த விழாவில், 2,000 மகளிர்
சுயஉதவிக் குழுக்களுக்கான சுழல்நிதி உள்பட ரூ.18.98 கோடி மதிப்புள்ள
நலத்திட்ட உதவிகளை 34,087 பேருக்கு துணை முதல்வர் வழங்குகிறார். மாலை
4.30 மணிக்கு கடையநல்லூர் அரசு ஆண்கள் மேல்நிலைப் பள்ளியில் நடைபெறும்
அரசு விழாவில், ரூ. 39.22 கோடி மதிப்புள்ள 73 பணிகளுக்கு துணை முதல்வர்
அடிக்கல் நாட்டுகிறார். தென்காசி, செங்கோட்டை ஆகிய இடங்களில் உள்ள அரசு
மருத்துவமனைகளில் கூடுதல் கட்டடங்கள் உள்ளிட்ட மொத்தம் ரூ.20.66 கோடி
மதிப்பிலான 66 திட்டப் பணிகளைத் திறந்துவைக்கிறார். இந்த விழாவில்,
1,654 பேருக்கு ரூ.90 லட்சம் மதிப்புள்ள நலத்திட்ட உதவிகளையும் துணை
முதல்வர் வழங்குகிறார்.

2-வது நாள் சுற்றுப்பயணம்


சுற்றுப்பயணத்தின் 2-வது நாளான சனிக்கிழமை காலை 10 மணிக்கு சங்கரன்கோவில்
களப்பாகுளத்தில் நடைபெறும் விழாவில், அரியநாயகிபுரத்தில் ரூ.2.55 கோடி
செலவில் அமைக்கப்பட்டுள்ள இம் மாவட்டத்தின் 8-வது சமத்துவபுரத்தையும்,
அங்கு அமைக்கப்பட்டுள்ள பெரியார் சிலையையும் துணை முதல்வர்
திறந்துவைக்கிறார்.இங்கு மொத்தம் ரூ.10.24 லட்சம் மதிப்பிலான 27
திட்டப் பணிகளைத் திறந்துவைக்கிறார். மேலும் ரூ. 2.95 கோடி மதிப்புள்ள 10
திட்டப் பணிகளுக்கு அடிக்கல் நாட்டுகிறார். 4,420 பேருக்கு ரூ.5.30 லட்சம்
மதிப்பிலான நலத்திட்ட உதவிகளையும் அவர் வழங்குகிறார். இந்த அரசு விழாக்களுக்கு சட்டப் பேரவைத் தலைவர் இரா. ஆவுடையப்பன் தலைமை தாங்குகிறார். கடையநல்லூரில்
நடைபெறும் விழாவில் மத்திய அமைச்சர் ஜி.கே. வாசன் கலந்து கொள்கிறார்.
அமைச்சர்கள், மக்களவை, மாநிலங்களவை, சட்டப் பேரவை மற்றும் உள்ளாட்சி பிரதிநிதிகள் கலந்து கொள்கின்றனர்.

பட்டமளிப்பு விழா

சனிக்கிழமை
மாலை 4.30 மணிக்கு திருநெல்வேலி அரசு பொறியியல் கல்லூரியில் நடைபெறும்
அண்ணா பல்கலைக்கழகத்தின் முதலாவது பட்டமளிப்பு விழாவில் கலந்து கொண்டு 148
பேருக்கு நேரடியாக பட்டங்களை வழங்கிப் பேசுகிறார். இந்த விழாவில் மாநில
உயர்கல்வித் துறை அமைச்சர் க. பொன்முடி கலந்து கொள்கிறார். இந்த நிகழ்ச்சிகளுக்கு பின்னர் அவர் சென்னைக்கு புறப்பட்டுச் செல்கிறார்.

சிறப்பான ஏற்பாடுகள்

துணை
முதல்வரை வரவேற்க திருநெல்வேலி மாவட்டத்தில் அவர் பங்கேற்கும் அரசு
விழாக்கள் நடைபெறும் இடங்களில் எல்லாம் கட்சிக் கொடிகளும், தோரணங்களும்
கட்டப்பட்டு சிறப்பான ஏற்பாடுகள் செய்யப்பட்டுள்ளன. சாலையோரங்களில்
வரவேற்பு பதாகைகளையும் திமுக நிர்வாகிகளும், தொண்டர்களும் கட்டி
வைத்துள்ளனர்.