பணவீக்கத்தைக் குறைக்க உறுதியான நடவடிக்கை

பணவீக்கத்தைக் குறைக்க இன்னும் உறுதியான நடவடிக்கையை அரசு எடுக்க வேண்டும் என்று மக்களவையில் தீர்மானம் இயற்றப்பட்டது.விலைவாசி
உயர்வு காரணமாக பணவீக்கம் அதிகரித்துள்ளது. இதனால் விலைவாசியைக்
கட்டுப்படுத்த அரசு உறுதியான, இன்னும் முனைப்பான நடவடிக்கைகளை எடுக்க
வேண்டும் என்று தீர்மானத்தில் கூறப்பட்டுள்ளது. ஆனால் தீர்மானத்தில் எந்த
இடத்திலும் விலைவாசி உயர்வு என்ற வாசகம் இடம்பெறவில்லை. மிகவும்
எச்சரிக்கையாக பணவீக்கத்தைக் கட்டுப்படுத்த உறுதியான நடவடிக்கை தேவை என்று
மட்டுமே இடம்பெற்றுள்ளது.விலைவாசி உயர்வு குறித்த தொடர் விவாதம்
மக்களவையில் செவ்வாய்க்கிழமை முதல் நடைபெற்றது. இதன் பின்னர் இத்தகைய
தீர்மானம் ஒருமனதாக இயற்றப்பட்டது. விலைவாசியைக் கட்டுப்படுத்த
அரசு தவறி விட்டது. ஏழை, எளிய மக்களின் உணர்வுகளை இந்த அரசு புரிந்து
கொள்ளவில்லை என்று எதிர்க்கட்சிகள் குற்றம் சாட்டின. எதிர்க்கட்சிகளின்
குற்றச்சாட்டுகளுக்கு பிரணாப் முகர்ஜி ஒரு மணி நேரம் விளக்கம் அளித்தார்.
ஏழை, எளிய மக்கள் கஷ்டப்படக்கூடாது என்பதற்காக பல நடவடிக்கைகளை அரசு
எடுத்துள்ளதாகக் கூறினார். மத்திய அரசு அடுத்த நிதி ஆண்டு முதல்
அமல்படுத்த உத்தேசித்துள்ள சரக்கு மற்றும் சேவை வரி (ஜிஎஸ்டி) விதிப்பு
முறைக்கு அனைத்து எதிர்க்கட்சி உறுப்பினர்களும் ஆதரவு அளிக்க வேண்டும்
என்ற கோரிக்கையையும் அவர் விடுத்தார். இதன் மூலம் மத்திய, மாநில,
இறக்குமதி, உற்பத்தி வரி விதிப்புகள் நீங்கி, ஒருமுனை வரி மட்டுமே
விதிக்கப்படும் என்றும் அவர் சுட்டிக் காட்டினார்.ஏழை, எளிய
மக்களின் நலனில் அரசு அக்கறை செலுத்தவில்லை என்ற எதிர்க்கட்சிகளின்
குற்றச்சாட்டில் உண்மை இல்லை. கல்வியை அடிப்படை உரிமையாக்கும் சட்டம்,
கிராமப்புறங்களில் வேலை வாய்ப்பு சட்டம் உள்ளிட்டவற்றை அரசு
நிறைவேற்றியிருக்குமா? என்று அவர் கேள்வியெழுப்பினார். இவை அனைத்தும்
அரசின் பொறுப்பான செயல்பாடுகளின் வெளிப்பாடு என்றும் முகர்ஜி கூறினார்.பாஜக
ஆட்சிக் காலத்தில் ஒரு லிட்டர் மண்ணெண்ணெய் விலை ரூ. 2-லிருந்து ரூ.
9-க்கு உயர்த்தப்பட்டது. அப்போது மக்கள் நலனைப் பற்றி அவர்கள்
கவலைப்படவில்லையே? என்றும் அவர் கேட்டார்.பாஜக ஆட்சிக் காலத்தில்
விலைவாசி இந்த அளவுக்கு உயரவில்லை என்று கூறப்படுகிறது. அப்போது பொருளாதார
வளர்ச்சி இந்த அளவுக்கு இருந்ததா? என்பதை எண்ணிப் பார்க்க வேண்டும்.
வளர்ச்சி இருந்தால் நிச்சயம் பணவீக்க அழுத்தம் இருக்கத்தான் செய்யும்
என்பதை உணர வேண்டும்.பணவீக்க உயர்வைக் கட்டுப்படுத்த வேண்டும்
என்பதில் அரசுக்கு மாற்றுக் கருத்து கிடையாது. ஆனால் மத்திய அரசு மட்டுமே
இதில் தனித்து செயல்பட முடியாது. மாநில அரசுகளின் ஒத்துழைப்போடுதான் இதைக்
கட்டுப்படுத்த முடியும்.பொதுவிநியோக அரிசி, கோதுமையை முறைப்படுத்துவது, அத்தியாவசியப் பொருள் சட்டம் ஆகியன அனைத்தும் மாநில அரசுகளின் வசம் உள்ளன என்றார்.நிதியமைச்சரின்
பதிலில் திருப்தியடையாத எதிர்க்கட்சித் தலைவர் சுஷ்மா ஸ்வராஜ், மேடைப்
பேச்சு போல விளக்கவுரை அளித்துள்ளார் பிரணாப். அரசு என்ன உறுதியான
நடவடிக்கை எடுத்தது என்பதை அவரால் பட்டியலிட முடியவில்லை. உயர்ந்துவரும்
விலைவாசி உயர்வைக் கட்டுப்படுத்த அரசு என்ன நடவடிக்கை எடுத்துள்ளது என்று
கேட்டார்.பணவீக்கம் அதிகரித்துள்ளதை இந்த அரசு மிகவும்
உன்னிப்பாகக் கவனித்து வருவதோடு அதைக் கட்டுப்படுத்துவதற்கான நடவடிக்கைகளை
எடுத்து வருகிறது. விலைவாசியைக் குறைப்பதன் மூலம் பொதுமக்களைக் காக்க அரசு
உறுதியுடன் செயல்படுவதாக மக்களவைத் தலைவர் மீரா குமார் குறிப்பிட்டார்.
பின்னர் தீர்மானம் நிறைவேறியது.