வடபழனி, கந்தகோட்டம் கோயில்களில் 1 லட்சம் பக்தர்கள் தரிசனம்

by நவீன் Thu 5 Aug 2010 - 15:09

சென்னை பாரிமுனையில் உள்ள கந்தகோட்டம் ஸ்ரீ முத்துக்குமாரசுவாமி கோயிலில்
நடைபெற்ற ஆடிக் கிருத்திகை விழாவில் வெள்ளி ரதத்தில் உலா வந்து
பக்தர்களுக்கு அருள

ஆடிக் கிருத்திகை
விழாவையொட்டி வடபழனி முருகன் கோயில், பாரிமுனை கந்தக்கோட்டம் முருகன்
கோயில்களில் சுமார் 1 லட்சம் பக்தர்கள் குவிந்தனர். கட்டணமில்லா தரிசன வரிசையில் சென்ற பக்தர்கள் 1 மணி நேரம் காத்திருந்து சாமி தரிசனம் செய்தனர் தமிழ்க்
கடவுள் என்றழைக்கப்படும் முருகப் பெருமானுக்கு தைப் பூசம், பங்குனி
உத்திரம், வைகாசி விசாகம், ஆடிக் கிருத்திகை, ஐப்பசி மாத சஷ்டி போன்றவை
சிறப்பாகக் கொண்டாடப்படும். அதன்படி, ஆடி மாத பரணி நட்சத்திரம் செவ்வாய்க்கிழமை முடிந்து கார்த்திகை நட்சத்திரம் புதன்கிழமை வந்தது. இதைக் கொண்டாடும் வகையில், எல்லா கோயில்களிலும் குறிப்பாக முருகன் கோயில்களில் சிறப்பு பூஜைகள் நடத்தப்பட்டன. வடபழனி
முருகன் கோயில், கந்தக் கோட்டம் முத்துக்குமாரசாமி கோயில், என்.எஸ்.சி.
போஸ் சாலை குமரக் கோட்டம், ஓட்டேரி சண்முகக் கோட்டம், திருப்போருர்,
குன்றத்தூர், வல்லக்கோட்டை, சிறுவாபுரி முருகன் கோயில்களில் ஆடிக்
கிருத்திகை விழா புதன்கிழமை சிறப்பாக கொண்டாடப்பட்டன. எல்லா
கோயில்களிலும் அதிகாலையிலேயே நடைகள் திறக்கப்பட்டு, சிறப்பு அபிஷேகம்
நடத்தப்பெற்று, அலங்கார பூஜைகள் செய்யப்பட்டன. திருப்புகழ்ப் பாடல்கள்
பாடப்பெற்றன. கார்த்திகை விரதம் இருப்பவர்கள் காலையிலேயே சாமி தரிசனத்தை
முடித்துவிட்டு மதியம் விரதத்தை நிறைவு செய்தனர். வடபழனி முருகன்
கோயிலில் காலை 8 மணி வரை சுமாரான அளவிலேயே பக்தர்கள் வந்து சாமி தரிசனம்
செய்திருந்தனர். நேரம் செல்லச் செல்ல பக்தர்களின் எண்ணிக்கை அதிகரித்தது.
இரவு வரை நீண்ட வரிசை இருந்தது. பக்தர்கள் தங்கக் கவசம் சாத்தப்பட்ட
முருகனை தரிசனம் செய்தனர். இக் கோயிலில் சிறப்பு தரிசனத்துக்கும்
ஏற்பாடு செய்யப்பட்டிருந்தது. ரூ. 50 கட்டண தரிசனத்தில் சுமார் 4 ஆயிரம்
பக்தர்களும், ரூ. 20 கட்டணத்தில் சுமார் 20 ஆயிரம் பக்தர்களும், கட்டணம்
இல்லா தரிசனத்தில் சுமார் 30 ஆயிரம் பக்தர்களும் முருகப் பெருமானை
வழிபட்டுச் சென்றனர். இரவு 8 மணி அளவில் வடபழனி ஆண்டவர் தங்க
மயில் வாகனத்தில் வீதி உலா வந்தார். வடபழனி முருகன் கோயிலில் பக்தர்கள்
மூலம் சுமார் ரூ. 30 லட்சம் காணிக்கையாக வந்திருக்கும் என்று எதிர்பார்க்கக்படுகிறது. கந்தக்
கோட்டம் கோயிலில்... பாரிமுனை, கந்தக் கோட்டம் முத்துக்குமாரசாமி கோயிலில்
ரூ. 5 சிறப்பு தரிசனம், வி.ஐ.பி. தரிசனம் (கோயில் வளர்ச்சிக்கு
உதவியவர்கள் உள்ளிட்டோர். இவர்களுக்கு கட்டணம் கிடையாது), கட்டணமில்லா
தரிசனம் ஆகியவை இருந்தன. ரூ. 5 தரிசனத்தில் சுமார் 20 ஆயிரம் பக்தர்களும்,
வி.ஐ.பி. தரிசனத்தில் 10 ஆயிரம் பக்தர்களும், கட்டணமில்லா தரிசனத்தில் 20
ஆயிரம் பக்தர்களும் முத்துக்குமார சாமியை வழிபட்டனர். வடபழனி முருகன் கோயில் போல் கந்தக் கோட்டத்திலும் சுமார் ரூ. 25 லட்சம் காணிக்கை வந்திருக்கும் என்று எதிர்பார்க்கப்படுகிறது. அதேபோல் குயப்பேட்டை (ஓட்டேரி) சண்முகக் கோட்டத்திலும் ஏராளமான பக்தர்கள் சாமி தரிசனம் செய்தனர்.