இலங்கை அரசின் போக்கை 'தி எல்டர்ஸ்' அமைப்பு விமர்சித்துள்ளது

நிசாந்தன் · நிசாந்தன் Wed Aug 04, 2010 3:23 pm

இலங்கையில் இடம்பெற்றதாகக் கூறப்படும் போர்க்குற்றங்கள் குறித்த ஆலோசனைக்காக ஐ.நா செயலாளர் பான் கி மூன் அமைத்துள்ள நிபுணர் குழுவுக்கு இலங்கை அரசு ஒத்துழைப்பு வழங்க வேண்டும் என்றும், இது சம்பந்தமாக இந்தியா, அமெரிக்கா, சீனா, ஜப்பான் உள்ளடங்கலான சர்வதேச சமூகம் இலங்கைக்கு வலியுறுத்த வேண்டும் என்றும் தி எல்டர்ஸ் எனப்படும் மூத்தோர் அமைப்பு தனது அறிக்கையில் சுட்டிக்காட்டியுள்ளது. இந்த மூத்தோர் அமைப்பானது தென்னாபிரிக்க தலைவர் நெல்சன் மண்டேலாவால் 2007 ஆம் ஆண்டில் அமைக்கப்பட்டது. சர்வதேசத்தின் மூத்த முன்னாள் தலைவர்கள் அங்கம் வகிக்கும் இவ்வமைப்பில், பேராயர் டெஸ்மண்ட் ட்டு தலைவராகவும், முன்னாள் பின்லாந்து ஜனாதிபதி மார்ட்டி அஹ்திசாரி, ஐ.நாவின் முன்னாள் செயலர் கோபி அனான், முன்னாள் ஐ.நா மனித உரிமை ஆணையர் மேரி ரொபின்சன், முன்னாள் ஐ.நா. தூதர் லக்தார் பிரஹிமி போன்றோர் உறுப்பினர்களாகவும் உள்ளனர்.

மேலும், இலங்கை அரசானது மனித உரிமைகளைப் புறந்தள்ளும் மனோபாவத்துடன் செயற்படுகிறது. இந்த நடவடிக்கைகள் பற்றி சர்வதேச சமூகம் இலங்கை மீது மேலும் கடுமையான பதில் நடவடிக்கைகளை எடுக்க வேண்டும். இலங்கையின் இப்போக்குக்கும், அங்கு இருக்கும் விமர்சகர்களையும், மாற்றுக் கருத்துக் கொண்டோர்களையும் அடக்கி ஒடுக்குவதற்காக இலங்கை எடுத்து வரும் நடவடிக்கைகளுக்கும் சர்வதேச சமுதாயம் மேலும் கடுமையான பதில் நடவடிக்கைகளை எடுக்க வேண்டும் என்று அவ்வமைப்பு மிகவும் காட்டமாகத் தனது அறிக்கையில் குறிப்பிட்டுள்ளது.

இலங்கையின் போக்குக்கு சர்வதேச சமூகம் இதுவரை காட்டிவரும் மௌனம் மற்ற நாடுகளையும் இலங்கையின் வழியில் செல்ல வைக்கும்.
போருக்குப் பிந்தைய இலங்கையில் சில முன்னேற்றகரமான மாற்றங்கள் ஏற்பட்டிருக்கின்றன. போருக்குப் பின்னான இலங்கையில் நடந்திருக்க வேண்டும் என ஒருவரால் எதிர்பார்க்கப்பட்ட அளவுக்கு அங்கு முன்னேற்றம் ஏற்படவில்லை என மூத்தோர் அமைப்பின் உறுப்பினரான முன்னாள் பின்லாந்து ஜனாதிபதி குறிப்பிட்டுள்ளார்.

வடக்கில் சில முன்னேற்றங்கள் நிகழ்ந்திருந்தாலும், இந்த முன்னேற்றகரமான விடயங்களுக்கு களங்கம் ஏற்படுத்தும் அம்சங்களாக, கருத்து மாறுபடுவோர்களை சகித்துக் கொள்ளாமல் ஒடுக்குவது, அரசுக்கு நெருக்கமாக இருப்பவர்களுக்கு சட்டத்தின் பிடியிலிருந்து விலக்களிப்பது போன்றவை நிகழ்கின்றன எனவும் அவ்வறிக்கை சுட்டிக்காட்டியுள்ளது.

ஐ.நா அமைத்துள்ள நிபுணர் குழுவுடன் சேர்ந்து பணியாற்றுவதற்குப் பதிலாக, கடந்த ஆண்டு மே மாதத்தில் நிகழ்ந்ததாகக் கூறப்படும் போர்க்குற்றங்கள் குறித்த குற்றச்சாட்டுகளை விசாரணை செய்ய தாம் விசாரணைக்குழு அமைத்துள்ளதாக இலங்கை கூறியுள்ளமை திருப்திகரமானதாக இல்லை. இதற்கு முன்னர் அமைக்கப்பட்ட விசாரணைக்குழுக்களை உதாரணமாக எடுத்துக்கொண்டால், இதிலும் ஒருவருக்கும் நம்பிக்கை வராது என்றும் மூத்தோர் அமைப்பு தெரிவித்துள்ளது

இலங்கை அரசின் போக்கை 'தி எல்டர்ஸ்' அமைப்பு விமர்சித்துள்ளது

இலங்கை அரசின் போக்கை 'தி எல்டர்ஸ்' அமைப்பு விமர்சித்துள்ளது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக