நீலகிரியில் சூறாவளி 20 கிராமங்கள் இருளில் மூழ்கின

நவீன் · நவீன் Wed Aug 04, 2010 2:41 pm

குன்னூர்: குன்னூர், கோத்தகிரி பகுதியில் சூறாவளி வீசியது. நீலகிரி
மாவட்டம் குன்னூர், கோத்தகிரி பகுதியில் கடந்த 10 நாட்களாக சாரல் மழையுடன்
குளிர் காற்றும், மேகமூட்டமும் காணப்படுகிறது. நேற்று முன்தினம் காலையில்
இருந்து குன்னூர், கோத்தகிரி, கொலக்கம்பை, அருவங்காடு, சேலாஸ், கட்டபெட்டு
உள்ளிட்ட பகுதிகளில் மிதமான வெயில் அடித்தது. டால்பின்நோஸ், லேம்ஸ்ராக்
ஆகிய இடங்களுக்கு சுற்றுலா பயணிகள் சென்றனர். அங்கு கருமேகங்கள்
திரண்டிருந்ததால் இயற்கை காட்சிகளை காண முடியாமல் ஏமாற்றமடைந்தனர்.

நேற்று
முன்தினம் இரவு திடீரென குன்னூர், கோத்தகிரி பகுதியில் பலத்த சூறாவளி
வீசியது. பல வீடுகளில் ஓடுகள் சேதமடைந்தன. 20க்கும் மேற்பட்ட கிராமங்களில்
மின்கம்பிகள் துண்டிக்கப்பட்டு இருளில் மூழ்கின. இதை சரி செய்யும் பணியில்
மின்வாரிய ஊழியர்கள் ஈடுபட்டுள்ளனர். கோட்டக்கல், கொலக்கம்பை சாலையில் 2
ராட்சத மரங்கள் விழுந்தன. நெடுஞ்சாலைத்துறையினரும், மக்களும் மரத்தை
வெட்டி அகற்றினர்.
சூறாவளியால் தேயிலை இலைகள் உதிர்ந்து மகசூல் குறையும் அபாயம் ஏற்பட்டுள்ளதால் விவசாயிகள் கவலை அடைந்துள்ளனர்.