ஆஸ்திரேலியா பெண்ணின் கடைசி ஆசை நிறைவேறியது

சண்டிகர்: இரண்டு ஆண்டுகளுக்கு முன்பு இறந்த ஆஸ்திரேலிய பெண்ணின் கடைசி
ஆசையை, தற்போது நிறைவேற்றியுள்ளார் அரியானாவை சேர்ந்த கிளார்க் ஒருவர்.
கடந்த 1945ம் ஆண்டு ஆங்கிலேயர் ஆட்சி காலத்தில் லாகூரில் பிறந்தவர் ஜில்
வில்லர்ஸ். இவரது பூர்வீகம் ஆஸ்திரேலியா. அங்கு மவுன்ட் பார்க்கர்
பகுதியில் வசித்து வந்த ஜில் வில்லர் இரண்டு ஆண்டுகளுக்கு முன்பு
இறந்தார். அதற்கு முன்பாக, தனது கடைசி ஆசையை தன் மகள் லிண்டா
விப்பர்லேவிடம் கூறியுள்ளார். தனது அஸ்தியை ஹரித்வாரில் ஓடும் கங்கை
நதியில் கரைக்க வேண்டும் என்பதுதான் அந்த ஆசை. எனவே, அவரது அஸ்தியை
பத்திரப்படுத்தி வைத்திருந்தார் மகள் லிண்டா. இவர் ஆஸ்திரேலிய சைக்கிளிங்
அணியின் மேனேஜராக உள்ளார்.

காமன்வெல்த் விளையாட்டு போட்டியில்
கலந்து கொள்வதற்காக கடந்த வாரம் டெல்லி வந்தார். தன்னுடன் தாயின்
அஸ்தியையும் எடுத்து வந்தார். ஆனால் அவருக்கு ஹரித்வார் சென்று தாயின்
அஸ்தியை கரைக்க நேரம் கிடைக்கவில்லை. இதை வருத்தத்துடன் டெல்லி
நிருபர்களிடம் தெரிவித்துள்ளார் லிண்டா.
இச்செய்தியை பத்திரிகையில்
படித்து நெகிழ்ச்சியடைந்தார் அரியானா முதல்வர் அலுவலகத்தில் பணிபுரியும்
கிளார்க் ரவீந்தர் குமார் அனேஜா. லிண்டாவை தொடர்பு கொண்டு, அவருடைய தாயின்
கடைசி ஆசையை நிறைவேற்ற தயாராக இருப்பதாக கூறினார்.

மனம் உருகிய
லிண்டா தனது தாயின் அஸ்தியை ரவீந்தர் குமாரிடம் ஒப்படைத்தார். தனது சொந்த
செலவில் ஹரித்வார் சென்று கங்கை ஆற்றில் ஜில் வில்லர்ஸின் அஸ்தியை
கரைத்தார் ரவீந்தர் குமார். அதன் விவரங்களை இ&மெயில் மூலம்
லிண்டாவுக்கு அனுப்பி வைத்தார். இதுகுறித்து கருத்து தெரிவித்த ரவீந்தர்
குமார், ‘‘மனிதாபிமான அடிப்படையில் இதைச் செய்தேன்’’ என்றார். ‘‘எனது
அம்மா பிறந்த இடத்துக்கே திரும்ப வர தேவதைகளும் கடவுள்களும்
வழிகாட்டியுள்ளன’’ என குறிப்பிட்டுள்ளார் லிண்டா.