தெருநாய்கள் அட்டகாசம் அதிகரிப்பு : ஓசூரில் ஆறு மாதத்தில் 1,806 பேருக்கு "கடி'

ஓசூர்: ஓசூர் நகரில் ஆறு மாதத்தில் 1,806 பேர் தெருநாய்கள் கடித்து
அரசு மருத்துவமனையில் சிகிச்சை பெற்றுள்ளனர். சாலையில் நடமாட முடியாத
அளவுக்கு தெருநாய்கள் அட்டகாசம் அதிகரித்துள்ளதால், பொதுமக்கள் பெரும்
பீதியடைந்துள்ளனர்.
தொழில் நகரமான ஓசூரில் தொழிற்வளர்ச்சிக்கு ஏற்ப மக்கள் தொகையும்,
குடியிருப்புகள் எண்ணிக்கையும் நாளுக்கு நாள் அதிகரித்து வருகிறது. நகரின்
வளர்ச்சி மற்றும் மக்கள் தொகை பெருக்கத்திற்கேற்ப நகராட்சி நிர்வாகம்
போதிய அடிப்படை கட்டமைப்பு வசதிகளை செய்து கொடுக்காததால், பொதுமக்கள்
பல்வேறு பிரச்னைகளை சந்தித்து வருகின்றனர். கொள்ளை, வழிபறி மற்றும்
தெருநாய்கள் தொல்லை ஆகியவற்றால் நகர மக்கள் பெரிதும் அவதிப்பட்டு
வருகின்றனர். தெருக்களில் பொதுமக்கள் தனியாக நடமாட முடியாத அளவுக்கு
தெருநாய்கள் தொல்லை அதிகரித்துள்ளது.
ஓசூர் நகரில் காமராஜர் காலனி, சாந்திநகர், ரயில்வே ஸ்டேஷன்,
ராயக்கோட்டை ஹவுசிங் ஃபோர்டு, பாகலூர் ஹவுசிங் போர்டு, என்.ஜி.ஓ., காலனி,
பழைய மற்றும் புதிய ஏ.எஸ்.டி.சி., ஹட்கா, நேரு நகர், சுண்ணாம்பு ஜுபி,
ராம்நகர் ஆகிய இடங்களில் குடியிருப்புகள் நெருக்கமாக உள்ளன. இங்கு,
ஏராளமான அரசு மற்றும் தனியார் பள்ளிகள், கோவில்கள், பூங்காங்கள் உள்ளன.
இப்பகுதிகளில் ஆறு மாதமாக தெருநாய்கள் தொல்லை அதிகமாக உள்ளது.காமராஜர்
காலனி, ராம்நகர் மற்றும் பாகலூர் ஹவுசிங் ஃபோர்டு காலனி பகுதியில்
சுற்றித்திரியும் தெருநாய்கள் பொதுமக்களை துரத்திக் கடித்துக் குதறி
வருகின்றன. நாய்களிடம் கடிபட்டவர்கள் தினமும் அரசு மருத்துவமனையில்
சிகிச்சைக்காக அனுமதிக்கப்பட்டு வருகின்றனர்.
இரு சக்கர வாகனங்களில் செல்வோரையும் தெருநாய்கள் விரட்டி கடிக்கின்றன.
பைக்கில் செல்லும்போது குறுக்கே நாய்கள் பாய்வதால், கீழே விழுந்து பலர்
படுகாயம் அடைந்துள்ளனர். தெருநாய்கள் கடித்து அரசு மருத்துவமனைக்கு
சிகிச்சைக்கு செல்வோர் எண்ணிக்கை அதிகரித்து வருகிறது. கடந்த ஜனவரி மாதம்
267 பேரும், ஃபிப்ரவரியில் 269 பேரும், மார்ச்சில் 302 பேரும், ஏப்ரலில்
358 பேரும், மே மாதம் 286 பேரும், ஜூனில் 241 பேரும், ஜூலையில் 285 பேரும்
நாய்கள் கடித்து அரசு மருத்துவமனையில் சிகிச்சைக்காக
அனுமதிக்கப்பட்டுள்ளனர். சராசரியாக தினம் எட்டு முதல் பத்து பேர் வரை
நாய்களிடம், "கடி' வாங்கியுள்ளனர். பொதுமக்கள் பெரும் பீதியடைந்துள்ளனர்.
நகராட்சி நிர்வாகம் போர்க்கால அடிப்படையில் தெருநாய்களை கட்டுப்படுத்த
நடவடிக்கை எடுக்க வேண்டும்.

கடி வாங்குவதில் கின்ன்ஸ் சாதனை படைத்தது விடும் போலருக்கு ஓசூர்