பாராட்டு விழாவில் நடிகை வாணிஸ்ரீ பர்சை திருடிய ரசிகர்கள்

ரபீக் · ரபீக் Wed 4 Aug 2010 - 15:01

ஐதராபாத்தில் நடந்த பாராட்டு விழாவில் நடிகை வாணிஸ்ரீக்கு மலர்ச்செண்டு கொடுப்பது போல் நடித்து அவரது பர்சை ரசிகர்கள் நைசாக திருடிச்சென்றதால் பரபரப்பு ஏற்பட்டது.

வசந்த மாளிகை, வெள்ளி விழா, வாணி ராணி உள்பட ஏராளமான தமிழ்ப்படங்களில் நடித்திருப்பவர் பிரபல நடிகை வாணிஸ்ரீ. இவர் சிவாஜி, ஜெமினி, என்.டி. ராமாராவ், நாகேஸ்வரராவ் போன்ற நடிகர்களுக்கு ஜோடியாக நடித்துள்ளார். இவர் தற்போது ஐதராபாத்தில் வசித்து வருகிறார்.

இவரது கலைச்சேவையை பாராட்டி ஐதராபாத் தியாகராய கான சபாவில் பாராட்டு விழா நடந்தது. விழாவில் அவருக்கு பிரபல தயாரிப்பாளர் ராமாநாயுடு மலர் கிரீடம், பட்டு சால்வை அணிவித்தார். முக்கிய பிரமுகர்கள் பலர் அவருக்கு பரிசுகள் வழங்கி பாராட்டினர்.

அதன் பிறகு வாணிஸ்ரீ நன்றி தெரிவிப்பதற்காக மேடைக்கு புறப்பட்டார். அப்போது சில ரசிகர்கள் கூட்டமாக வந்து வாணிஸ்ரீ வாழ்க என்று கூறியபடி மலர்ச்செண்டுகளை அவரிடம் கொடுத்தனர். அப்போது ஒரு ரசிகர் அவரிடம் இருந்த மணிபர்சை நைசாக திருடி சென்று விட்டார். இதையறியாத வாணிஸ்ரீ மேடைக்கு சென்று நன்றி தெரிவித்தார்.

விழா முடிந்ததும் காரில் ஏற சென்றபோதுதான் தனது “பர்ஸ்” மாயமாகி இருப்பதை கண்டு அதிர்ச்சி அடைந்தார்.

அவர் கூறும்போது, பாராட்டு விழா என்றால் நான் பெரும்பாலும் வர மாட்டேன். இந்த மாதிரியான விழாக்களுக்கு வந்தால் ஏதாவது ஒரு அசம்பாவித சம்பவம் நடந்து விடுகிறது. இதற்கு முன்பு ஏற்கனவே ஒரு விழாவில் என் பர்சை திருடி சென்று விட்டனர். அப்போதிருந்தே நான் ரசிகர்களிடம் சற்று எச்சரிக்கையா கத்தான் இருந்தேன். ஆனால் தற்போது மலர்ச்செண்டு வாங்கிய சமயத்தில் நைசாக திருடி விட்டனர் என்றார்.