கணவன் மனைவி பிரச்சனைக்கு சமரசம் செய்து விட்டு ரூ.70,000 திருட்டு!

ஜெயம்கொண்டம் கீழ்குடியிருப்பு பகுதியைச் சேர்ந்தவர் அன்பழகன் (37). இவரது மனைவி ராஜம்மாள் (27). இவர்களுக்குள் கடந்த சில நாட்களுக்கு முன் வாக்குவாதம் ஏற்பட்டது. இதையடுத்து ராஜம்மாள் கணவருடன் கோபித்துக்கொண்டு, அவரது தாயார் வசிக்கும் கிராமத்துக்கு சென்று விட்டார்.

சில நாட்கள் கழித்து வந்துவிடுவார் என்று எதிர்பார்த்த மனைவி நீண்ட நாள் கழித்தும் வரவில்லை என்பதால், தனக்கு சொந்தமான நிலத்தை விற்று சில நாள் காலத்தை கடத்திய அன்பழகன், தனது நண்பர்களிடம் மனைவியுடன் சேர்ந்து வாழ விரும்புவதாக கூறியுள்ளார். இதையடுத்து அவரது நண்பர்களும் சமசரம் செய்வதாக கூறியுள்ளனர். பிறகு அன்பழகன் தனது நண்பர்களுடன், மனைவி இருக்கும் கிராமத்துக்குச் சென்றுள்ளார். அங்கு வேறொரு வேலை காரணமாக ராஜம்மாள் வெளியே சென்றிருந்தார். இதையடுத்து அங்கு இருந்த அவரது தாயாரிடம் அன்பழகன், ராஜம்மாளுடன் சேர்ந்து வாழ விரும்புகிறார். எனவே இருவரும் மனக் கசப்புகளை விட்டு, ஒன்றாக வாழ வாழ வேண்டும் என்று ராஜம்மாள் தாயாருடன் சமரசம் பேசி விட்டு திரும்பினர்.

ஊர் திரும்பிய நண்பர்கள் அன்பழகனிடம், மனைவியுடனான பிரச்சனையை தீர்த்ததற்கு மதுபான விருந்து வைக்கும்படி கூறியுள்ளனர். இதற்கு சம்மதம் தெரிவித்து மதுபான விருந்து அளித்த அன்பழகன் தானும் குடித்து குடிபோதையில் மயக்கம் அடைந்தார். பிறகு மயக்கம் தெளிந்த அன்பழகன், தன்னிடம் இருந்த பணத்தை காணவில்லை என்று ஜெயங்கொண்டம் காவல் நிலையத்தில் புகார் அளித்துள்ளார். புகாரை ஏற்று ஆய்வாளர் மணிமாறன் விசாரணை நடத்தினார். அதில் அன்பழகனுடன் மது அருந்திய நண்பர்கள்தான் பணத்தை திருடியதாக தெரியவந்தது.

அன்பழகனுடன் மது அருந்திய அவரது நண்பர்களை, காவல்நிலையத்துக்கு அழைத்து விசாரித்ததில் ரமேஷ் உள்பட இருவர் பணத்தை திருடியதாக ஒப்புக்கொண்டனர். அவர்களிடம் இருந்து 70 ஆயிரம் ரூபாயை பறிமுதல் செய்து, அன்பழகனிடம் ஒப்படைத்த இன்ஸ்பெக்டர், பணம் திருடியவர்கள் மீது வழக்குப்பதிவு செய்து சிறையில் அடைத்தார்.சமரசம் செய்ய சென்றவர்கள் கைது செய்யப்பட்ட சம்பவம் அப்பகுதியில் அனைவரையும் ஆச்சரியம் அடைய வைத்தது.

இந்த ப்ளான் நமக்கு தெரியாம போச்சே?