சவால்களை சமாளிப்பாரா சஹாபுதீன் குரோஷி!

புதிய தலைமைத் தேர்தல் கமிஷனராக சகாபுதீன் யாகூப் குரேஷி. பொறுப்பேற்றுள்ளார், இதன்மூலம்,இந்திய தலைமைத் தேர்தல் கமிஷனராக பொறுப்பேற்றுள்ள முதல் முஸ்லிம் என்ற பெருமை இவருக்கு கிடைத்துள்ளது.

இதற்கு முன் தலைமைத் தேர்தல் கமிஷனராக பதவி வகித்தவர்கள், பரபரப்பு, சர்ச்சை, புகார் போன்ற விஷயங்களில் சிக்கியது போல் இவர் மீது புகார் எதுவும் இல்லை என்பது தான், இவரது சிறப்பம்சம். சர்ச்சைகளில் சிக்காதவர். குரேஷி தலைமைத் தேர்தல் கமிஷனராக பதவியேற்பதற்கு முன், மத்திய அரசின் பல்வேறு துறைகளில் திறம்பட பணியாற்றிய அனுபவம் உடையவர். விளையாட்டு மற்றும் இளைஞர் நலத் துறை அமைச்சகத்தின் செயலர், அரியானா முதல்வரின் முதன்மை செயலர், தூர்தர்ஷன் உள்ளிட்ட துறைகளில் பணியாற்றியவர்.

தலைமைத் தேர்தல் கமிஷனர் பொறுப்பை ஏற்றுள்ள குரேஷிக்கு தற்போது பல சவால்கள் காத்திருக்கின்றன. முதலாவதாக, பீகார் சட்டசபை தேர்தலை நடத்த வேண்டும். இதற்காக, நக்சலைட் பிரச்னை, தேர்தல் கலவரம் போன்ற பிரச்னைகளை அவர் சமாளிக்க வேண்டும். அடுத்தாண்டில், மேற்கு வங்கம், தமிழகம், கேரளா, புதுச்சேரி, அசாம் மாநிலங்களுக்கு வரிசையாக சட்டசபை தேர்தல்கள் நடக்கவுள்ளன. இவற்றையும் நடத்த வேண்டும். தலைமைத் தேர்தல் கமிஷனர் என்ற முறையில் முதலாவதாக, தேர்தலில் ஓட்டுப் பதிவை அதிகரிக்கச் செய்ய வேண்டும் என்பதற்காக, சில அதிரடி முடிவுகளை அவர் எடுத்துள்ளார்.

பல்வேறு துறைகளைச் சேர்ந்த பிரபலங்களை விழிப்புணர்வு பிரசாரம் செய்ய வைத்து, ஓட்டுப் பதிவு சதவீதத்தை அதிகரிப்பது, நகர்ப்புற மக்களை தேர்தலில் பங்கேற்க வைப்பது, தேர்தல் விடுமுறையில் மக்கள் உல்லாச பயணம் மேற்கொள்வதை தடுக்கும் வகையில், திங்கள் மற்றும் வெள்ளிக் கிழமைகளில் தேர்தலை நடத்தாமல் இருப்பது போன்ற அதிரடியான நடவடிக்கைகளை செயல்படுத்தவுள்ளார். பணநாயகம் என்ற விஷயம் குரேஷியின் கவலையை அதிகரிக்கச் செய்துள்ளது. இதுபோன்ற நடவடிக்கைகள் ஜனநாயகத்தின் மதிப்பை ஒட்டு மொத்தமாக சீர்குலைத்து விடும் என்பது அவரது கருத்து.

எனவே, இதுபோன்ற முறைகேடுகளை தடுப்பதற்கும் முயற்சித்து வருகிறார். மேலும், ஓட்டுப் பதிவு இயந்திரத்தில் முறைகேடு செய்ய முடியாது என்பதை அவர் உறுதியாக நம்புகிறார். இருந்தாலும், இதில் மக்களுக்கு முழு நம்பிக்கை ஏற்படுத்தும் வகையில் சில முடிவுகளை எடுக்க திட்டமிட்டுள்ளார்.