ஒரு தலைக்காதலால் கல்லூரி மாணவி கொலை

by நவீன் Wed Aug 04, 2010 11:00 am

ஒரு தலைக்காதலால் கல்லூரி மாணவி கொலை : மனமுடைந்த காதலன் தூக்கிட்டு தற்கொலை :

பட்டுக்கோட்டை: பட்டுக்கோட்டை அருகே கல்லூரி மாணவியை துப்பட்டாவினால்
கழுத்தை நெறித்து கொலை செய்துவிட்டு தப்பியோடிய கல்லூரி மாணவன் மனமுடைந்து
தூக்கிட்டு தற்கொலை செய்துகொண்டார்.
தஞ்சை மாவட்டம் பட்டுக்கோட்டை அடுத்த பெருமகளூர் கிராமத்தை சேர்ந்தவர்
அடைக்கலம் மகள் வனிதா (18). புதுக்கோட்டை அரசு மகளிர் கலைக்கல்லூரியில்
முதலாம் ஆண்டு பட்டப்படிப்பு படித்து வந்தார். தினமும் கல்லூரிக்கு
பேராவூரணியில் இருந்து பஸ்ஸில் சென்று வந்தார்.வனிதாவின் வீட்டருகே
வசித்து வரும் முருகன் மகன் கண்ணதாசன் (20), புதுக்கோட்டைக்கு செல்லும்
வழியில் உள்ள ஆலங்குடியில் உள்ள பாலிடெக்னிக் கல்லூரியில் மூன்றாம் ஆண்டு
மெக்கானிக்கல் இன்ஜினியரிங் படித்து வந்தார். இருவரும் தினமும் ஒரே
பகுதியில் இருந்து ஒரே பஸ்ஸில் சென்று வந்ததால், கண்ணதாசன் வனிதாவை
ஒருதலைபட்சமாக காதலித்துள்ளார்.
ஆகஸ்ட் ஒன்றாம் தேதி மதியம் வயலில் வேலை பார்த்துக் கொண்டிருந்த தனது
தாயாருக்கு சாப்பாடு எடுத்து சென்றபோது வழிமறித்த கண்ணதாசனுக்கும்,
வனிதாவுக்கும் இடையே கடுமையாக வாக்குவாதம் நடந்தது. அப்போது அவ்வழியாக
பனம்பழம் பறிக்கச் சென்றவர்கள் பார்த்துவிட்டு ஊருக்குள் வந்து
கூறியுள்ளனர்.சிறிது நேரத்தில் கண்ணதாசன் வனிதாவின் துப்பட்டாவை எடுத்து
அவரது கழுத்தை நெறித்து கொலை செய்து அருகிலிருந்த பள்ளத்தில் உடலை
வீசிவிட்டு தப்பியோடிவிட்டார்.அதன் பின் இரவு அந்த இடத்துக்கு வந்த முகம்
தெரியாமல் இருக்க இறந்து கிடந்த வனிதாவின் முகத்தில் ஆசிட் ஊற்றி அடையாளம்
தெரியாமல் ஆக்க முயற்சி செய்துள்ளார்.
இதற்கிடையே தனது மகளை காணவில்லை என தேடி வந்த பெற்றோருக்கு வனிதா கொலை
செய்யப்பட்டு கிடந்ததை அறிந்து கதறினர். சம்பவ இடத்துக்கு வந்த போலீஸார்
மற்றும் கைரேகை நிபுணர்கள், கொலைக்காண காரணத்தை ஆராய்ந்தனர்.இதற்கிடையில்,
கண்ணதாசன் தனது பெற்றோருடன் தலைமறைவாகிவிட்டார். அதைத்தொடர்ந்து பேராவூரணி
போலீஸார் விசாரித்து கண்ணதாசனை கைது செய்யும் நடவடிக்கையில்
ஈடுபட்டனர்.அதற்குள் நேற்று முன்தினம் புதுக்கோட்டை மாவட்டம் திருமயத்தில்
உள்ள தனது உறவினர்கள் வீட்டுக்கு கண்ணதாசன் சென்றுள்ளார். அங்கும் போலீஸ்
தன்னை தேடிவந்ததை அறிந்து திருமயம் வயல்வெளியில் மரத்தில் தூக்கிட்டு
கண்ணதாசன் தற்கொலை செய்து கொண்டார். இதுகுறித்து, திருமயம் போலீஸார்
விசாரிக்கின்றனர்.