விசா வழங்குவதில் மலேசியா கெடுபிடி; சுற்றுலாப் பயணிகளுக்கு சிக்கல்

கோலாலம்பூர்: மலேசியாவுக்கு சுற்றுலா செல்லும் இந்தியர்கள் பலர், விசா
காலம் முடிந்த பின்னும் சட்ட விரோதமாக அங்கு தங்கியிருப்பதை தடுக்கும்
வகையில், விசா வழங்குவதில் கடும் கட்டுப்பாடுகளை மலேசிய அரசு
விதித்துள்ளது. தற்போது நடைமுறையில் உள்ள "வி.ஒ.ஏ., முறை ரத்து
செய்யப்பட்டுள்ளது. இந்தியாவில் இருந்து மலேசியாவுக்கு சுற்றுலா விசாவில்
செல்லும் பலர், தங்களது விசா காலம் முடிந்த பின்னும் தொடர்ந்து அங்கு
தங்கி விடுகின்றனர். சுற்றுலா விசாவில் மலேசியாவுக்கு வந்த 40 ஆயிரம்
பேர், அங்கேயே தொடர்ந்து தங்கி விட்டதாகவும், அவர்களை கண்டுபிடிக்க
முடியவில்லை என்றும் மலேசிய அரசு தெரிவித்துள்ளது. இந்த பிரச்னையை தடுக்க,
இந்தியர்களுக்கான சுற்றுலா விசா வழங்குவதில் கட்டுப்பாடுகள்
விதிக்கப்பட்டுள்ளன. இது குறித்து விவாதிப்பதற்காக மலேசியாவின் வெளிநாட்டு
தொழிலாளர் விவகாரத் துறை அமைச்சகத்தின் கூட்டம் நேற்று முன்தினம் நடந்தது.
கூட்டத்துக்கு பின், துணை பிரதமர் முகியுதீன் யாசின் கூறியதாவது: விசா
காலம் முடிந்தும், சட்ட விரோதமாக தங்கியுள்ளவர்கள் எண்ணிக்கை அதிகரித்து
வருகிறது. கடந்த காலங்களில் இதே பிரச்னை இருந்தும், சில நாடுகள்
விவகாரத்தில் விட்டுக் கொடுக்கும் மனப்பான்மையுடன் செயல்பட்டோம்.
குறிப்பாக, மலேசியாவுக்கு வருவதற்கான விசா ("விசா-ஆன்-அரைவல்' அல்லது
வி.ஒ.ஏ., ) மட்டும் வைத்திருப்பவர்களையும் அனுமதித்தோம். ஆனால், இந்த
நடைமுறை தவறாக பயன்படுத்தப்படுகிறது. எனவே, இந்தியா, சீனா, பூடான்,
நேபாளம், வங்கதேசம், மியான்மர், தைவான் உள்ளிட்ட எட்டு நாடுகளுக்கான
தற்போது பின்பற்றப்படும் வி.ஒ.ஏ., நடைமுறை ரத்து செய்யப்பட்டுள்ளது.
இந்தியாவின் டில்லி, மும்பை, பெங்களூரு போன்ற நகரங்களில் இருந்து வரும்
சுற்றுலா பயணிகளால் எந்த பிரச்னையும் இல்லை. சென்னையில் இருந்து வருவோரால்
தான் பிரச்னை உள்ளது. இவ்வாறு முகியுதீன் யாசின் கூறினார்.