நில புரோக்கரின் பல்லை பிடுங்கி சித்ரவதை:கொடூர வக்கீல் கைது: ஐந்து பேருக்கு வலை

நவீன் · நவீன் Wed 4 Aug 2010 - 11:39

சென்னை:தொழில் போட்டியில் நில புரோக்கரை தனி அறையில் அடைத்து, பல்லை
பிடுங்கி சித்ரவதை செய்த வக்கீல் போலீசில் சிக்கினார். மேலும் ஐந்து பேரை
போலீசார் தேடி வருகின்றனர்.மதுரையை சேர்ந்தவர் ஆறுமுகம் (42); வக்கீல்.
பாரிமுனையில் அலுவலகம் வைத்து கொண்டு, ரியல் எஸ்டேட் தொழிலும் செய்து
வந்தார். பல ஏக்கர் நிலத்தை விற்றதில், கமிஷனை பிரித்து கொள்வதில்
இவருக்கும், தண்டையார்பேட்டை ஓய்.எம்.சி.ஏ., குப்பத்தை சேர்ந்த வினோத்
குமாருக்கும் (34) மோதல் ஏற்பட்டது. இருவரும் தனித்தனியாக தொழில் நடந்தி
வந்தனர்.
"நிலம் விற்பனை செய்வது தொடர்பாக பேச வேண்டும்' என வினோத்குமாரை,
மொபைல்போன் மூலமாக ஆறுமுகம் தனது அலுவலகத்திற்கு அழைத்தார். நேற்று
முன்தினம், கொடுங்கையூரை சேர்ந்த சீனிவாசனுடன், வினோத்குமார்,
ஆறுமுகத்தின் அலுவலகம் சென்றார்.போதையிலிருந்த ஆறுமுகம் உள்ளிட்ட ஆறு
பேர், இருவரையும் தனி அறையில் அடைத்து, ஐந்து லட்சம் ரூபாய் கேட்டு
மிரட்டி, சரமாரியாக தாக்கினர்.அக்கும்பலிடமிருந்து, சீனிவாசன் சாதுர்யமாக
தப்பினார். இதில் மேலும் ஆத்திரமடைந்த கும்பல் வினோத்குமாரை கத்தியால்
கீறியது. அவரது பல்லை கட்டிங் பிளேயரால், பிடுங்கி சித்ரவதை செய்தது.
கொடுமை தாங்காமல், "மனைவியின் நகைகளை விற்று பணம் தருகிறேன்' என்றார்
வினோத்குமார். அதையும் பொருட்படுத்தாமல், அக்கும்பல் வெறித்தனமாக
தாக்கியது.இதையடுத்து வினோத்குமார், தான் அடைக்கப்பட்டிருந்த இரண்டாவது
மாடியிலிருந்து கீழே குதித்தார். இதில் எலும்பு முறிந்ததால் அவரால் நடக்க
முடியவில்லை.
வக்கீல் ஆறுமுகம் கும்பல் கீழே வந்து, "உன் மனைவியின் நகைகளை எடுத்து
தா' எனக்கூறி, ஆட்டோவில் ஏற்றிக் கொண்டு வீடு நோக்கிச் சென்றது.இரவு
நேரத்தில் தம்புச் செட்டி தெரு வழியாக சென்ற போது, ஆட்டோவிலிருந்து
குதித்த வினோத்குமார், "காப்பாற்றுங்கள்' என கூச்சல் போட்டார். பொதுமக்கள்
கூடியதும் ஆறுமுகம் கும்பல் ஆட்டோவில் தப்பியது.விவரமறிந்து சம்பவ
இடத்திற்கு விரைந்த ஐகோர்ட் உதவி கமிஷனர் முருகேசன், எஸ்பிளனேடு
இன்ஸ்பெக்டர் அருள் மற்றும் போலீசார், காயங்களுடன் கிடந்த வினோத்குமாரை,
சிகிச்சைக்காக ஸ்டான்லி அரசு மருத்துவமனைக்கு அனுப்பி வைத்தனர்.கொலை
முயற்சி வழக்கில், ஆறுமுகத்தை போலீசார் கைது செய்து, கோர்ட்டில்
ஆஜர்படுத்தி சிறையில் அடைத்தனர். தலைமறைவாகவுள்ள மேலும் ஐந்து பேரை
போலீசார் தேடி வருகின்றனர்.

நில புரோக்கரின் பல்லை பிடுங்கி சித்ரவதை:கொடூர வக்கீல் கைது: ஐந்து பேருக்கு வலை

நில புரோக்கரின் பல்லை பிடுங்கி சித்ரவதை:கொடூர வக்கீல் கைது: ஐந்து பேருக்கு வலை

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக