அடிக்கடி பழுதாகும் ஊட்டி மலை ரயில்பயணிகள் சிரமம் தவிர்க்க நேரம் மாற்றம்

குன்னூர்:ஊட்டி மலை ரயில் பயணத்தில் ஏற்படும் இடையூறுகளை போக்க, மலை
ரயிலின் நேரம் மாற்றியமைக்கப்பட்டுள்ளது. இதனால், மேட்டுப்பாளையம் -
சென்னை செல்லும் நீலகிரி எக்ஸ்பிரஸ் தாமதமில்லாமல் குறிப்பிட்ட
நேரத்திற்கே இயக்கும் வாய்ப்பு ஏற்பட்டுள்ளது.நூறாண்டு பழமை வாய்ந்த ஊட்டி
மலை ரயில், சமீபகாலமாக பல சோதனைகளை எதிர்கொண்டு வருகிறது. நீராவி
இன்ஜினில் அடிக்கடி ஏற்படும் கோளாறால், பல மணி நேரம் தாமதம் ஏற்படுகிறது.
தவிர, குன்னூர் - மேட்டுப்பாளையம் மலை ரயில் பாதையில் யானைகள் அவ்வப்போது
உலா வருவதாலும், பயணம் பாதி வழியில் முடிந்து விடுகிறது.
தினமும் பகல் 2.45 மணிக்கு ஊட்டியில் புறப்பட்டு, 4.20 மணிக்கு
குன்னூர் வந்து, மாலை 4.35 மணிக்கு குன்னூரில் இருந்து புறப்பட்டு மாலை
6.30 மணிக்கு மேட்டுப்பாளையம் செல்லும் ரயிலில் தினமும் நூற்றுக்கும்
மேற்பட்டோர் பயணிக்கின்றனர்.இவர்களில் பெரும்பாலானோர் இரவு 7.45 மணிக்கு
மேட்டுப்பாளையத்தில் இருந்து சென்னை செல்லும் நீலகிரி எக்ஸ்பிரஸ் ரயிலில்
பயணம் செய்யும் பயணிகள். ஊட்டி மலை ரயில், நீலகிரி எக்ஸ்பிரஸ் ரயிலின்
இணைப்பு ரயிலாக விளங்குகிறது.மலை ரயில் இன்ஜினில் அடிக்கடி ஏற்படும்
கோளாறு, வன விலங்குகளின் குறுக்கீடுகளால் பல சமயங்களில் ரயில்
நடுக்காட்டில் நின்று விடுகிறது. இதனால், பயணிகள் பஸ், பிற வாகனம் மூலம்
மேட்டுப்பாளையம் அனுப்பி வைக்கப்படுகின்றனர்.
அவர்களின் வருகைக்காக காத்திருக்கும் நீலகிரி எக்ஸ்பிரஸ் ரயிலும்,
தாமதமாக புறப்பட வேண்டியுள்ளது.இந்த சிக்கலை தீர்க்க, ஊட்டி மலை ரயிலின்
பயண நேரத்தை மாற்றியமைக்க சேலம் கோட்ட ரயில்வே நிர்வாகம்
முடிவெடுத்துள்ளது. வரும் அக்டோபர் 15ம் தேதி முதல், பகல் 2.00 மணிக்கு
ஊட்டியில் புறப்பட்டு மாலை 3.10 மணிக்கு குன்னூர் வந்து, 3.30 மணிக்கு
குன்னூரில் இருந்து புறப்பட்டு மேட்டுப்பாளையம் செல்லும் வகையில் பயண
நேரம் மாற்றியமைக்கப்பட்டுள்ளது.இந்த நேர மாற்றத்தால் மாலை 5.30 மணிக்கே
பயணிகள் மேட்டுப்பாளையம் சென்று விடலாம்.
இடையில் இன்ஜின் கோளாறு, வன விலங்கு இடையூறு காரணமாக, தாமதம்
ஏற்பட்டாலும், இரவு 7.45 மணிக்குள் மேட்டுப்பாளையத்திற்கு பயணிகளை
பாதுகாப்பாக கொண்டுபோய் சேர்த்து விட முடியும்; இதன் மூலம் சரியான
நேரத்தில் நீலகிரி எக்ஸ்பிரசை இயக்க முடியும் என, ரயில்வே நிர்வாகம்
கணக்கிட்டு ரயில் நேரத்தை மாற்றி அமைத்துள்ளது.உள்ளூர் ரயில் நேரமும்
மாற்றம்: தற்போது குன்னூரில் இருந்து பகல் 1.30க்கு புறப்பட்டு 2.30
மணிக்கு ஊட்டியை அடையும் ரயில், அக்டோபர் 15ம் தேதி முதல், பகல் 12.30
மணிக்கு குன்னூரில் புறப்பட்டு 1.30 மணிக்கு ஊட்டியை அடையும் வகையில் நேர
மாற்றம் செய்யப்பட்டுள்ளது.