அதிக மதுபான கடைகளுக்கு ஆந்திரா அனுமதி

ஆந்திர மாநில காங்கிரஸ் அரசு, மாநிலத்திலுள்ள மதுபானக் கடைகளின்
எண்ணிக்கையை அதிகரிப்பதன் மூலம், வருவாயைப் பெருக்கும் வகையில் மதுபான
கடைகளுக்கு உரிமம் வழங்குவதில் சில விதிகளைத் தளர்த்தியுள்ளது. கூடுதலாக
மதுபானக் கடைகள், அதனால் கூடுதல் வருமானம் என்ற கருத்தில், அரசு இம்முடிவை
எடுத்திருக்கிறது.
இந்தியாவில் அதிகளவு மது விற்பனையாகும் மாநிலங்களில் ஆந்திராவும்
ஒன்று. மது விற்பனை மூலம் மாநில அரசுக்கு கடந்த நிதியாண்டில் மட்டும், 11
ஆயிரம் கோடி ரூபாய் வருவாய் வந்தது. இந்த நிதியாண்டில் அது, 13 ஆயிரம்
கோடி ரூபாயாக அதிகரிக்கும் என எதிர்பார்க்கப்படுகிறது.இந்நிலையில்,
வருவாயைப் பெருக்குவதில் குறியாக உள்ள அம்மாநில அரசு, மதுபான கடைகளுக்கு
உரிமம் வழங்குவதற்கான விதிகளில் சிலவற்றைத் தளர்த்தி, பரவலான அளவில்
உரிமம் வழங்குகிறது.கடந்த மாதம், மாநில அரசு ஒரு மதுபான கடை உரிமம் பெற
கட்டணமாக 7,000 ரூபாய் நிர்ணயித்திருந்தது.
நாட்டில் மிக அதிக
பட்சமாக நிர்ணயிக்கப்பட்ட உரிமக் கட்டணம் இதுதான். அந்த ஏலத்தில் மொத்தம்,
ஆறாயிரத்து 596 சில்லரைக் கடைகள் சார்பில் பங்கேற்றனர். இதில் மூன்று
கோடியில் இருந்து நாலரை கோடி ரூபாய் வரை, 100 கடைகளும், நாலரை கோடி
ரூபாய்க்கு மேல் 45 கடைகளும் ஏலம் போயின.இந்த உரிமம் 2010 முதல் 2012
வரையிலான இரண்டு ஆண்டுகளுக்கு மட்டும் பொருந்தும்.இந்நிலையில் சமீபத்தில்,
உரிமம் வழங்குவதில் மேலும் சில விதிகளைத் தளர்த்தியுள்ளது ஆந்திர அரசு.
அதன்படி, ஏழு லட்சம் பேருக்கு அதிகமுள்ள மக்கள் தொகை கொண்ட
மாநகராட்சிகளில் 12 ஆயிரம் பேருக்கு கூடுதலாக ஒரு கடை வீதம் உரிமம்
வழங்கப்படும்.அதேபோல், மூன்று லட்சம் பேர் வரையுள்ள நகராட்சிப் பகுதிகளில்
30 ஆயிரம் பேருக்கு ஒரு கடை வீதமும், மூன்று லட்சத்திலிருந்து ஏழு லட்சம்
வரையுள்ள நகராட்சிப் பகுதிகளில் 20 ஆயிரம் பேருக்கு ஒரு கடை வீதமும்
உரிமம் வழங்கப்படும்.மேலும், கிராமப் பகுதிகளில் ஐயாயிரம் பேர் இருந்தால்
அங்கு கடை திறக்க உரிமம் வழங்கப்படும். உரிம விதிகள்
தளர்த்தப்பட்டுள்ளதால் தற்போதைய கடைகளை விட, 400லிருந்து 500 கடைகள்
கூடுதலாக உரிமம் பெறக் கூடும் என எதிர்பார்க்கப்படுகிறது.
மாநில அரசின் இத்திட்டத்துக்கு எதிர்க்கட்சிகளும் மகளிர் அமைப்புகளும்
கடும் கண்டனம் தெரிவித்துள்ளன.தெலுங்கு தேச கட்சித் தலைவர் சந்திரபாபு
நாயுடு, "மது மூலம் வரும் வரியை முக்கிய வருவாயாக காங்கிரஸ் அரசு
ஆக்கிவிட்டது. ஒவ்வொருவரையும் குடிகாரராக ஆக்க முயல்கிறது. இதை எதிர்த்து
ஆர்ப்பாட்டம் நடத்துவோம்' என தெரிவித்துள்ளார். 1995ல் தனக்கு முன்
முதல்வராக இருந்த என்.டி.ராமராவ் கொண்டு வந்த மதுவிலக்கை நீக்கியவர்
சந்திரபாபு நாயுடு என்பது குறிப்பிடத்தக்கது.இருப்பினும் வருவாயைப்
பொருத்து, படிப்படியாக மதுவிலக்கை அமல்படுத்துவோம் என மாநில அரசு
உறுதியளித்துள்ளது.- நமது சிறப்பு நிருபர் -

அப்போ இனி அதிகவிவாகரத்துக்கு அனுமதிவழகிடவேண்டியதுதான்