ஆள் மாறி அடக்கம் செய்த விவகாரம்:இறந்த பெண் யார் என்பது தெரிந்தது

கொல்லம்;ஓராண்டுக்கு முன் மாயமாகி விட்ட, மூன்று குழந்தைகளின் தாய்
உப்பங்கழியில் பிணமாக கிடந்ததாக கருதி உடல் அடக்கம் செய்யப்பட்ட நிலையில்,
மாயமான பெண் கள்ளக்காதலனுடன் போலீசில் சிக்கினார். இவ்விஷயத்தில்
உப்பங்கழியில் பிணமாக மிதந்த பெண் யார் என்பது தற்போது தெரிய
வந்துள்ளது.கேரள மாநிலம், கொல்லம் மாவட்டம் பூந்தலத்தாழம் பகுதியைச்
சேர்ந்தவர் சோமன். இவரது மனைவி சுனிதி. இத்தம்பதியினரின் மகள் ஷைனி (27).
இவருக்கு திருமணமாகி மூன்று குழந்தைகளுடன் மய்யநாடு கிராமத்தில், கணவர்
சுனில் என்பவருடன் வசித்து வந்தார்.அவரது கணவர் கூலிவேலை செய்து
வருகிறார். இந்நிலையில் கடந்தாண்டு ஆகஸ்ட் மாதம் அவர் திடீரென மாயமாகி
விட்டார். அவரை பல இடங்களில் தேடியும் கிடைக்காததால், இரவிபுரம் போலீசில்
அவரது பெற்றோர் புகார் செய்தனர்.
இந்நிலையில் 18ம் தேதி பரவூர் போலீஸ் நிலைய பகுதியில் உப்பங்கழியில்
ஒரு பிணம் கிடந்தது. அது, மாயமாகி விட்ட ஷைனியின் உருவத்தை
ஒத்திருந்தது.ஷைனியின் பெற்றோர், அது தனது மகள் தான் என உறுதி செய்தனர்.
பிணம் அடக்கம் செய்யப்பட்டது. இதை அடுத்து தனது மகள் கொலை
செய்யப்பட்டிருக்கலாம் என, ஷைனியின் பெற்றோர் போலீசில் தெரிவித்தனர்.இது
குறித்து போலீசார் விசாரணை துவக்கினர். அப்போது ஷைனி வசித்து வந்த
பகுதியிலேயே கலேஷ் என்பவரும் அதே தினத்தில் மாயமானது தெரிந்தது. கலேஷின்
பெற்றோரிடம், போலீசார் விசாரித்தனர். பத்தனம்திட்டா மாவட்டம்,
மண்ணாரக்குளஞ்சி கிராமத்தில் தலைமறைவு வாழ்க்கை நடத்தி வந்த கலேஷை
பிடிக்கச் சென்றபோது, இறந்து விட்டதாக கருதி அடக்கம் செய்யப்பட்ட
ஷைனியும், அவருடன் இருந்தார். அவர்கள் இருவரையும் போலீசார் கைது செய்தனர்.
ஷைனி உயிரோடு கிடைத்து விட்ட நிலையில், அடக்கம் செய்யப்பட்ட பெண் யார்
என்பது குறித்து பரவூர் போலீசார் விசாரித்தனர். அடக்கம் செய்யப்பட்ட பெண்
பிணத்தில் இருந்து கைப்பற்றப்பட்ட செருப்பு, ஆடைகள், கழுத்தில் இருந்த நகை
ஆகியவற்றை கொண்டு விசாரித்தனர். அப்போது அது, அதே கிராமத்தைச் சேர்ந்த
அம்பிகா (21) என தெரிந்தது.அம்பிகா கொலை செய்யப்பட்டாரா என, போலீசார்
விசாரித்து வருகின்றனர்.