ஊசி போடுற டாக்டருக்கே ஊசி பெண்டை நிமிர்த்திய டைரக்டர்!

ஜே.கே.ரித்தீஷ் மாதிரி திடீரென்று அனைவரையும் திரும்பி பார்க்க வைப்பார்கள் சிலர். திரும்பிய இடத்திலெல்லாம் போஸ்டர் இருக்கும். திகட்ட திகட்ட விளம்பரங்கள் வரும். மொட்டை மாடியில் துணிக்கு பதிலாக கரன்ஸியை காய போட்டிருப்பார்களோ என்று அச்சத்தை ஏற்படுத்துகிற அளவுக்கு 'எடுத்து விடுவார்கள்' இஷ்டத்திற்கும்! டாக்டர் சீனிவாசனும் அந்த பிரிவை சார்ந்தவர்தான் என்கிறது அலுவலக அட்மாஸ்பியர். டீ கொடுக்கிற பையன் கழுத்திலும் கார்ப்பரேட் ஸ்டைலில் ஐடென்டிடி அட்டை!

ஏற்கனவே இரண்டு படங்களை எடுத்து ரீ ரெக்கார்டிங் முடித்த கையோடு தனது மூன்றாவது படத்தை எடுத்துக் கொண்டிருக்கிறார் டாக்டர். முன்னே கேட்ட கதையை விடவும் பிரமாதமான கதையை சொன்னாரு ராம் பரத சக்கரவர்த்தி. அதனால் இந்த படத்தை முடிச்சு ரிலீஸ் பண்ணிட்டு மற்ற படங்களை அப்புறம் விடலாம்னு இருக்கேன் என்றார் சர்வசாதாரணமாக! இந்த படத்தின் பெயர் லத்திகா. அது என் பொண்ணு பேருங்க என்கிறார் சீனிவாசன்.

நான் கன்னடத்தில் இரண்டு படங்கள் இயக்கியிருக்கேன். இருந்தாலும் தாய் மொழியில் ஜெயிக்கறதுதானே திருப்தி. தயாரிப்பாளர்கள் கிடைக்காம அல்லாடிகிட்டு இருந்தப்போதான் டாக்டரை பார்க்கிற வாய்ப்பு கிடைச்சுது. நான் சொன்ன கதை அவருக்கும் பிடிச்சு போனதால முந்தைய பட வேலைகளை அப்படியே வச்சுட்டு இந்த படத்தை ஆரம்பிச்சாரு. செப்டம்பர்ல லத்திகா ரிலீஸ். நான் நேர்மையா வேலை பார்த்ததன் காரணமாக அவருடைய தயாரிப்பில் நான் இயக்கும் பூங்கொடி ஜன்னலில் என்ற படத்தையும் உடனே தொடங்குறோம் என்றார் பரதன்.

"ஒரு டாக்டர்ங்கிற முறையில எங்கிட்ட வர்றவங்களுக்கு ட்ரிட்மென்ட் கொடுத்திருக்கேன். ஆனால் லத்திகா படத்தில் சேசிங், பைட் என்று எனக்கே ஊசி போடுற அளவுக்கு பெண்டை நிமித்திட்டாரு டைரக்டர். என்ன பண்றது. நடிக்கணும்னு வந்தாச்சு. கஷ்ட நஷ்டங்களை பார்க்க முடியுமா?" என்றார் டாக்டர். ஆச்சர்யம் என்னன்னா இந்த லத்திகா படத்தின் டைரக்டரும் இவர்தான்!

அதானே... கஷ்ட நஷ்டங்களை பார்க்க முடியுமா என்றோம் நாமும்?!