பட்டாசு தொழிற்சாலையில் திடீர் தீ : மூவர் பலி, ஐவருக்கு பலத்த காயம்

ஹரிப்பாடு : பட்டாசு தொழிற்சாலையில் திடீரென தீப்பிடித்து விபத்து ஏற்பட்டதில், மூன்று பேர் கருகி, பலியாயினர்.
கேரள மாநிலம் ஆலப்புழா மாவட்டம் மட்டம்காவில் கிராமத்தில், முஜீப்
என்பவர் வீடு உள்ளது. இவ்வீட்டில் அனுமதியின்றி பட்டாசு தொழிற்சாலை
செயல்படுகிறது. ஓணம் பண்டிகை வருவதை ஒட்டி, பட்டாசுகள் தயாரிக்கும் பணி
தீவிரமாக நடந்து வந்தது. இங்கு தமிழகத்தில், விருதுநகர் மாவட்டம் சிவகாசி
பகுதியைச் சேர்ந்த எட்டு பேர், பட்டாசு தயாரிக்கும் பணியில்
ஈடுபட்டுள்ளனர். நேற்று முன்தினம் பிற்பகல் 1.55 மணிக்கு, மதிய உணவுக்காக
பட்டாசு தயாரிப்பு பணிகள் நிறுத்தப்பட்டன. அப்போது, யாரும் எதிர்பாராத
வகையில், அடுக்கி வைத்திருந்த பட்டாசுகள் திடீரென வெடித்தன. வெடிமருந்துப்
பொருட்கள் அடங்கிய மூட்டைகளும் வெடித்து சிதறின.
வெடிச்சத்தம் மூன்று கி.மீ., வரை கேட்டது. வீட்டின் முற்றத்தில்
காயங்களுடன் கிடந்தவர்களை, அங்கு கூடியிருந்த மக்களே, ஹரிப்பாடு அரசு
மருத்துவமனைக்கு அனுப்பினர். வீட்டின் மேற்கூரை, ஓடு மற்றும் ஆஸ்பெஸ்டாஸ்
தகடு ஆகியவை கொண்டு அமைக்கப்பட்டிருந்ததால், வீடு இடிந்து விழுந்தது.
வீட்டின் உரிமையாளர் முஜீபின் சகோதரி சுனிதா(38) சிவகாசியைச் சேர்ந்த
மூர்த்தி (42) மைக்கேல் ராஜ் (50) ஆகியோர் சிகிச்சை பலனின்றி இறந்தனர்.
மேலும் ஐந்து பேர், ஆபத்தான நிலையில் சிகிச்சை பெற்று வருகின்றனர்.
இத்தயாரிப்பு தொழிற்சாலையை முன் அனுமதியின்றி நடத்தி வந்த முஜீப்
மற்றும் அவரது சகோதரர் நவாஸ் ஆகியோர், போலீசாரிடம் சரணடைந்தனர். இவர்களது
சகோதரி தான், மரணமடைந்த சுனிதா; வாய் பேச முடியாதவர். சில ஆண்டுகளுக்கு
முன், முஜீபின் தந்தை ராஜன் மற்றும் சகோதரன் சுராஜ் ஆகியோரும், இதே போல்
முன் அனுமதியின்றி பட்டாசு தொழிற்சாலை நடத்தி, அப்போது நடந்த வெடி
விபத்தில் பலியாயினர்.

தகுந்த...பாதுகாப்பின்றிச்...செய்யும்...இத்தொழிலால்...
இதுதான்...ஆபத்து...!