21 வயது மகனை 38 வயது பெண் கடத்தியதாக புகார் : தாயாருடன் செல்ல மகனுக்கு ஐகோர்ட் அனுமதி

மதுரை : திண்டுக்கல் மாவட்டம் கொடைக்கானலில் 38 வயதான மூன்று
குழந்தைகளின் தாயாரால் கடத்தப்பட்ட 21 வயது வாலிபரை, அவரது விருப்பப்படி
பெற்ற தாயுடன் செல்ல மதுரை ஐகோர்ட் கிளை உத்தரவிட்டது.
கொடைக்கானலை சேர்ந்தவர் சாந்தி. மகன் பிரதீப்புடன்(21)வசித்து
வருகிறார்; தனியார் நிறுவனத்தில் பணிபுரிகிறார். இவருடன், அதே பகுதியை
சேர்ந்த லதாவும்(38) பணிபுரிகிறார். இவருக்கு, ஏற்கனவே ஜான் என்பவருடன்
திருமணமாகி மூன்று குழந்தைகள் உள்ளனர். அவர், தற்போது கணவர் மற்றும்
குழந்தைகளை பிரிந்து வாழ்கிறார். இந்நிலையில், பிரதீப்பை 2009 ஆக., 17
முதல் காணவில்லை. சாந்தி, கொடைக்கானல் போலீசில் புகார் கொடுத்தார். மகனை
ஆஜர்படுத்தக் கோரி ஐகோர்ட் கிளையில் ஹேபியஸ் கார்பஸ் மனுவும் செய்தார்.
மனுவில், "என் மகனை காணவில்லை. விசாரித்த போது, அவரை லதா
கடத்தியிருக்கலாம் என தெரிகிறது. போலீசில் புகார் கொடுத்தும் நடவடிக்கை
இல்லை. மகனை கண்டுபிடித்து ஆஜர்படுத்த வேண்டும்' என கோரியிருந்தார்.
மனு, நீதிபதிகள் எம்.சொக்கலிங்கம், எம்.துரைச்சாமி கொண்ட பெஞ்ச் முன்
நேற்று விசாரணைக்கு வந்தது. பிரதீப்பை போலீசார், அரசு வக்கீல் செந்தூர்
பாண்டியன் மூலம் ஆஜர்படுத்தினர். மனுதாரரும் ஆஜரானார். விசாரணையில்
பிரதீப், "தான், லதாவுடன் வசித்து வருவதாகவும், அவர், தன் மனைவி எனவும்'
தெரிவித்தார். அவரது வயது, லதாவின் வயது குறித்து நீதிபதிகள் கேள்வி
எழுப்பினர். இறுதியில், தாயாருடன் செல்ல விரும்புவதாக பிரதீப்
தெரிவித்தார். மேலும், மனுதாரர் புகார் மீதான நடவடிக்கை குறித்து
நீதிபதிகள் கேள்வி எழுப்பினர். அதற்கு அரசு வக்கீல், ""பிரதீப்பை
கடத்தியதாக லதா மீது வழக்கு பதிவு செய்யப்பட்டுள்ளது,'' என்றார். அவற்றை
பதிவு செய்த நீதிபதிகள், பிரதீப் விருப்பப்படி தாயாருடன் செல்லலாம் என
உத்தரவிட்டனர். விசாரணையையொட்டி, லதாவையும் போலீசார் அழைத்து
வந்திருந்தனர். பிரதீப், தாயாருடன் செல்ல ஐகோர்ட் உத்தரவிட்டதையறிந்து,
லதா மயங்கி விழுந்தார். அவரை போலீசார் தேற்றி அழைத்துச் சென்றனர்.