முட்டை ஏற்றிச் சென்ற லாரியை கடத்தி துண்டு துண்டாக வெட்டி விற்பனை செய்த 2 பேர் கைது

ஆத்தூர் : தூத்துக்குடி துறைமுகத்துக்கு முட்டை ஏற்றிச் சென்ற
டிரெய்லர் லாரியை கடத்தி, துண்டு துண்டாக வெட்டி விற்பனை செய்த இருவரை
ஆத்தூர் போலீசார் கைது செய்தனர். லாரி கடத்தல் வழக்கில் தொடர்புடைய மேலும்
இருவரை தேடி வருகின்றனர்.
சேலம் மாவட்டம் ஆத்தூர் அருகே அம்மம்பாளையம் நரிக்குறவன் காலனி
எம்.ஜி.ஆர்., நகர் பகுதியை சேர்ந்தவர் ரமேஷ் (24). இவரது விவசாய
தோட்டத்தில், ஒரு வாரமாக புது டிரெய்லர் லாரியை நிறுத்தி வைத்து, லாரியை
வெல்டிங் மூலம் வெட்டி எடுத்து சரக்கு ஆட்டோவில் கொண்டு சென்று விற்பனை
செய்வது பற்றியும் ஆத்தூர் போலீசாருக்கு தகவல் கிடைத்தது. டி.எஸ்.பி.,
கிருஷ்ணராஜ் மேற்பார்வையிலான குற்றப்பிரிவு எஸ்.ஐ., பாண்டியராஜன்,
ஏட்டுகள் பிரபு, முரளி, வெங்கடேசன் உள்ளிட்ட போலீசார் நேரில் சென்று
விசாரணை செய்தனர். அப்போது டிரெய்லர் லாரியின் "சேஸ்' நம்பரை அழித்து,
சேஸ் முழுவதும் வெட்டி எடுக்கப்பட்டிருந்தது.
இதுதொடர்பாக ரமேஷை கைது செய்து போலீசார் விசாரணை செய்தனர். ஆத்தூர்
தெற்குகாடு செந்தில்குமார்(25) என்பவர் லாரியை கொடுத்த தாக தெரிவித்தார்.
தொடர்ந்து ரமேஷ், செந்தில்குமார் ஆகிய இருவரிடமும் விசாரித்ததில்,
முன்னுக்கு பின் முரணாக பதிலளித்தனர். சந்தேகமடைந்த போலீசார், டிரெய்லர்
லாரி சேசில் நாமக்கல் பதிவு எண் இருந்ததால், நாமக்கல் போலீசாருக்கு தகவல்
அளித்தனர். நாமக்கலில் இருந்து வெளிநாடுகளுக்கு முட்டை ஏற்றுமதி செய்யும்
எஸ்.எஸ்.எஸ்., எக்ஸ்போர்ட்ஸ் நிறுவனத்துக்கு சொந்த மான டிரெய்லர் லாரி
(டி.என்-28, எ.இ. 9866) என்பது தெரியவந்தது.
எஸ்.எஸ்.எஸ்., எக்ஸ்போர்ட்ஸ் நிறுவன நிர்வாக இயக்குனர் சையது கொடுத்த
புகாரின் பேரில், ஆத்தூர் போலீசார் வழக்கு பதிவு செய்து, லாரி கடத்திய
நரிக்குறவன் காலனி ரமேஷ் (24), தெற்குகாடு செந்தில்குமார் (24) ஆகிய
இருவரையும் கைது செய்தனர். பல்வேறு பாகங்களாக உடைக்கப்பட்ட லாரி சேஸ்,
சக்கரம், ஜாக்கிகள் உள்ளிட்டவைகளையும் பறிமுதல் செய்தனர். மேலும்,
வழக்கில் தொடர்புடைய எஸ்.எஸ்.எஸ்., எக்ஸ்போர்ட்ஸ் நிறுவன லாரி டிரைவர்
தம்மம்பட்டியை சேர்ந்த சுதாகர், கோபி உள்ளிட்ட இருவரை தீவிரமாக
தேடிவருகின்றனர்.
இதுகுறித்து ஏற்றுமதி நிறுவன நிர்வாக இயக்குனர் சையது கூறியதாவது:
"நாமக்கலில் இருந்து தூத்துக்குடிக்கு கடந்த 22ம் தேதி முட்டை ஏற்றிச்
சென்ற டிரெய்லர் லாரி லோடு இறக்கி விட்டு திரும்பி வரவில்லை. அதுப்பற்றி
தூத்துக்குடி துறைமுக போலீசில் புகார் செய்தோம். கடந்த 28ம் தேதி
டிரெய்லர் லாரியின் முன்பகுதி பெரம்பலூர் சாலையில் இருப்பதாக தகவல்
கிடைத்தது. டிரெய்லர் சேஸ் உள்ளிட்டவைகள் கம்பெனி டிரைவர் சுதாகர்
உதவியுடன் ஆத்தூரில் வெட்டி எடுத்துள்ளனர். 20 லட்சம் ரூபாய் மதிப்புள்ள
டிரெய்லர் லாரியில் வெறும் சேஸ், சக்கரங்கள் மட்டுமே உள்ளன. 2009ம் ஆண்டு
நவம்பர் மாதம் புதிதாக வாங்கிய லாரியை ஏழு மாதத்தில் துண்டுகளாக உடைத்து
விற்பனை செய்துள்ளனர். இவ்வாறு சையது கூறினார்.