கேரளாவில் 22-ந் தேதி சசிதரூர் சுனந்தா காதல் திருமணம்

கேரள எம்.பி.யும் முன்னாள் மத்திய மந்திரியுமான சசிதரூர் காஷ்மீர் மாடல் அழகி சுனந்தாவை காதலித்து வந்தார்.

அவர் ஐ.பி.எல். கிரிக்கெட்டில் கொச்சி அணி பங்கை காதலி சுனந்தாவுக்கு வாங்கி கொடுத்ததாக சர்ச்சை எழுந்தது. இந்த பிரச்சினையால் அவர் மத்திய மந்திரி பதவியை இழக்க நேரிட்டது.

இந்த நிலையில் சசிதரூர் சுனந்தாவை திருமணம் செய்து கொள்ள அனைத்து ஏற்பாடுகளையும் செய்தார். சமீபத்தில் பெங்களூரில் அவர்களுக்கு திருமண நிச்சயதார்த்தம் நடந்தது. நேற்று அவர்கள் இருவரும் மராட்டிய மாநிலம் ஷான் சிங்கனாபூர் கோவிலில் நடந்த விசேஷ பூஜையில் கலந்து கொண்டனர்.

இதை தொடர்ந்து திருமண ஏற்பாடுகள் நடந்து வருகின்றன. வருகிற 22-ந் தேதி திருமணம் நடைபெறும் என்று சசிதரூர் குடும்பத்தினர் தெரிவித்து உள்ளனர்.

கேரள மாநிலம் எலவாஞ்சேரியில் உள்ள மன்டாரத் தாரவாட் என்ற இடத்தில் வைத்து திருமணம் நடக்கிறது.

22-ந் தேதி ஓணம் தினவிழாவின் முதல் நாளாகும். இந்த நாளில் சசிதரூர் குடும்பத்தினர் ஒவ்வொரு ஆண்டும் எலவாஞ்சேரியில் கூடுவது வழக்கம். அந்த நேரத்தில் திருமணத்தை வைத்துக் கொள்ள முடிவு செய்துள்ளனர்.

திருமண நாளுக்கு முன்னதாகவே சுனந்தா குடும்பத்தினர் கேரள மாநிலம் பாலக்காட்டுக்கு வந்து உள்ளனர்.

திருமண வரவேற்பு நிகழ்ச்சி செப்டம்பர் 3-ந் தேதி டெல்லியில் நடக்க உள்ளது. சசிதரூருக்கு இது 3-வது திருமணம் ஆகும். ஏற்கனவே 2 முறை திருமணம் ஆன அவர் 2-வது மனைவியான கனடா பெண்ணை சமீபத்தில் தான் விவாகரத்து செய்தார். சுனந்தாவும் ஏற்கனவே 2 முறை திருமணம் ஆனவர் என்பது குறிப்பிடத்தக்கது.