பேசினால் ரூ.1000 அபராதம் தகவலுக்கு ரூ.200 சன்மானம்

by **அருண்** Tue Aug 03, 2010 12:46 pm

ராமநாதபுரம் : ஒதுக்கிய வைத்த குடும்பத்துடன் பேசினால் 1000 அபராதமும், பேசுபவர்கள் பற்றி துப்பு கொடுத்தால் 200 ரூபாய் சன்மனம் அறிவிக்கப்பட்டதாக ராமநாதபுரம் கலெக்டர் ஹரிஹரனிடம் பாதிக்கப்பட்டவர் புகார் செய்தார்.

ராமநாதபுரம் மாவட்டம் சாத்தான்குளம் அருகே குப்பன்வலசையை சேர்ந்தவர் நாகராஜ். இவர் தனது தாய் மற்றும் சகோதர்களுடன் வசித்து வருகிறார். கடந்த 2000ல் இடத்தகராறு காரணமாக பல்வேறு பிரச்னைகள் ஏற்பட்டு ,இவர் கொடுத்த புகாரின்படி சிலர் கைது செய்யப்பட்டனர். அதன் பின் கசப்பான சம்பவங்கள் தொடர, ஒரு கட்டத்தில் நாகராஜ் குடும்பத்தை ஊரை விட்டு ஒதுக்கி வைத்தனர். சுயஉதவிக்குழுக்களில் பங்கேற்கவும் தடை விதிக்கப்பட்டது. இவரதுகுடும்பத்தாருடன் யாரேனும் பேசினால் 1000 ரூபாய் அபராதமும், பேசுபவர்கள் பற்றி துப்பு கொடுத்தால் 200 ரூபாய் சன்மானம் வழங்குவதாகவும் அறிவிக்கப்பட்டது.

இதனால் மனமுடைந்த நாகராஜ் , தங்கள் நிலை குறித்து பல முறை புகார் தெரிவித்தும் வருவாய் துறையினர் உதவ முன்வரவில்லை. சுபகாரியங்களில் பங்கேற்கவும் தடை விதிக்கப்பட்டது. இது தொடர்பாக மக்கள் குறைதீர்க்கும் கூட்டத்தில் புகார் தெரிவித்தும் பயன் இல்லை. வேறு வழி தெரியாத நிலையில் , மக்கள் குறைதீர்க்கும் கூட்டத்தில் நாகராஜ் மற்றும் அவரது சகோதரர்கள் தொடர்ந்து மனு அளித்து வருகின்றனர்.

நாகராஜ் கூறியதாவது: கடந்த 10 ஆண்டுகளாக பல்வேறு சிரமங்களை சந்தித்து வருகிறோம். எங்களுடன் பேசுபவர்கள் பற்றி துப்பு கொடுப்பவர்களுக்கு சன்மானம் வழங்கும் அளவுக்கு பிரச்னை முற்றிவிட்டது. எங்களுக்கு உதவி செய்ய யாரும் முன்வரவில்லை. தொடர்ந்து நாங்கள் கலெக்டரிம் மனு அளித்து வருகிறோம், என்றார். கலெக்டர் ஹரிஹரன் கூறுகையில்,""இது தொடர்பாக விசாரித்து நடவடிக்கை எடுக்க அதிகாரிகளுக்கு உத்தரவிடப்பட்டுள்ளது,''என்றார்.