இல்லாத ஊரிலுள்ள பள்ளியில் மாற்றுத்திறனாளி ஆசிரியைக்கு பதவி உயர்வு

இல்லாத ஊரில் உள்ள ஒரு பள்ளியில் பதவி உயர்வு கிடைத்துள்ளதால், அதில் சேர முடியாத நிலையில் மாற்றுத்திறனாளி ஆசிரியை கிருஷ்ணவேணி உள்ளார் .
மதுரை மாவட்டம் உசிலம்பட்டி அரசு மேல்நிலைப் பள்ளியின் இடைநிலை (ஆங்கிலப் பாடம்) ஆசிரியை கிருஷ்ணவேணி.

இவர் சென்னையில் கடந்த மாதம் 12-ம் தேதி நடைபெற்ற பட்டதாரி ஆசிரியர்களுக்கான பதவி உயர்வு கலந்தாய்வில் பங்கேற்றார்.

கலந்தாய்வில் சிவகங்கை மாவட்டம், செந்துறை அரசு மேல்நிலைப் பள்ளியில் காலி இடம் இருப்பதாக காண்பிக்கப்பட்டது. அந்த இடத்தை கிருஷ்ணவேணி தேர்வு செய்தார். அவருக்கு பட்டதாரி ஆசிரியராகப் பதவி உயர்வு அளித்து, சேர வேண்டிய பள்ளியின் முகவரி அச்சடிக்கப்பட்ட நியமனக் கடிதம் வழங்கப்பட்டது.

அதன்படி, அவர் சிவகங்கை சென்று முதன்மை கல்வி அலுவலரை (சி.இ.ஓ) சந்தித்தபோது, கடிதத்தில் குறிப்பிட்டுள்ளபடி செந்துறை என்ற ஊர் இங்கு இல்லை என்றும் வேறு இடத்தில் இருக்கிறதா என பாருங்கள் என்றும் பதில் தரப்பட்டது.

பின்னர், செந்துறை என்ற ஊர் திண்டுக்கல்லில் இருப்பது தெரிந்து அங்கு சென்றபோது, இந்தப் பள்ளியில் காலிப்பணியிடம் எதுவும் இல்லை. தவிர, பதவி உயர்வு கடிதத்தில் இந்தப் பள்ளி குறிப்பிடப்படவில்லை என்ற பதில் கிடைத்தது.

அதன் பின்னர் சென்னையில் பள்ளிக் கல்வி இயக்குநர் அலுவலகத்தைத் தொடர்பு கொண்ட போது, சிவகங்கையில் அந்த ஊர் இல்லை என்று சான்றிதழ் வாங்கி வாருங்கள் என்று கூறியுள்ளனர்.

சிவகங்கை சி.இ.ஓ.-வோ அலுவலகத்திலோ இல்லாத ஊரில் உள்ள பள்ளிக்கு நாங்கள் எப்படிச் சான்றிதழ் தர முடியும் என்று அனுப்பிவிட்டனர். பட்டதாரி ஆசிரியர்களாகப் பதவி உயர்வு பெற்றவர்கள் ஆகஸ்ட் 2-க்குள் பணியில் சேர வேண்டும் என்று அறிவுறுத்தப்பட்டிருந்ததால், பதவி உயர்வு பெற்றவர்கள் பள்ளியில் திங்கள்கிழமை சேர்ந்துவிட்டனர். ஆனால், கல்வித் துறையின் அலட்சியத்தால் ஆசிரியை கிருஷ்ணவேணி பதவி உயர்வு பெற்றும் பலன் பெற முடியாத நிலையில் உள்ளார்.

பதவி உயர்வு கிடைத்து வேறு பள்ளிக்கு மாற்றல் ஆகிச் செல்லும் ஆசிரியர் ஒருவர், நியமனக் கடிதம் கிடைத்த ஒரு வாரத்துக்குள் ஏற்கெனவே பணி செய்யும் பள்ளியில் இருந்து விடுபட்டுச் செல்ல வேண்டும் என்று கூறப்படுகிறது. இதனால் ஆசிரியை கிருஷ்ணவேணிக்கு இப்போது பணி செய்யும் உசிலம்பட்டி பள்ளியிலும் நெருக்கடி கொடுக்கப்படுகிறது.

மாற்றுத்திறனாளி ஆசிரியர்களுக்கு அவர்கள் பணி செய்யும் ஊரிலேயே பணி வழங்க வேண்டும் என்று விதி உள்ளது. ஆசிரியை கிருஷ்ணவேணிக்கு 5 வயதில் பெண் குழந்தையும், 2 வயதில் ஆண் குழந்தையும் உள்ளனர்.

மாற்றுத்திறனாளிகள் துறைக்கு பல நன்மைகளை அளித்தும் வரும் முதல்வர் கருணாநிதி இந்த விஷயத்தில் உரிய நடவடிக்கை எடுக்க வேண்டும் என்று அனைவரும் எதிர்பார்க்கின்றனர்.