அஜ்மல் கசாபுக்கு தண்டனையை உறுதி செய்யும் வழக்கு 12-ம் தேதிக்கு ஒத்தி வைப்பு

மும்பை பயங்கரவாத தாக்குதலில் தூக்கு தண்டனை பெற்ற அஜ்மல் கசாபுக்கு தண்டனையை உறுதி செய்யும் வழக்கு விசாரணை இம்மாதம் 12-ம் தேதிக்கு ஒத்தி வைக்கப்பட்டுள்ளது.
மும்பையில் 2008-ம் ஆண்டு நடைபெற்ற பயங்கரவாத தாக்குதலில் 166 பேர் உயிரிழந்தனர். பாகிஸ்தானிலிருந்து இந்தியாவுக்குள் நுழைந்த 10 பயங்கரவாதிகளில் 9 பேரை அதிரடி கமான்டோக்கள் சுட்டுக் கொன்றனர். இதில் அஜ்மல் கசாப் மட்டும் உயிருடன் பிடிபட்டார்.

இந்த வழக்கு விசாரணை முடிவடைந்து கடந்த மே மாதம் 6-ம் தேதி தீர்ப்பு வழங்கப்பட்டது. இதில் அஜ்மல் கசாபுக்கு தூக்கு தண்டனை வழங்கப்பட்டது. ஆனால் ஃபஹீம் அன்சாரி மற்றும் சஹாபுதீன் ஷேக் ஆகிய இருவர் மீதான குற்றச் சாட்டுக்கள் நிரூபிக்கப்படாததால் அவர்கள் விடுவிக்கப்பட்டனர்.

கசாபுக்கு வழங்கப்பட்ட தூக்கு தண்டனையை உறுதி செய்யும் வழக்கு நீதிபதிகள் ரஞ்சனா தேசாய், விஜயா தஹில்ரமணி ஆகியோர் முன்னிலையில் விசாரணைக்கு வந்தது. அப்போது அரசு தரப்பு வழக்கறிஞர் பாண்டுரங்க போல் ஆஜரானார். இந்த வழக்கில் ஃபஹீம் அன்சாரி, சஹாபுதீன் ஷேக் ஆகியோர் விடுதலை செய்யப்பட்டதை எதிர்த்து மாநில அரசு மேல் முறையீடு செய்யப் போவதாகக் குறிப்பிட்டார். இதையடுத்து இந்த வழக்கு விசாரணையை இம்மாதம் 12-ம் தேதிக்கு நீதிபதிகள் ஒத்தி வைத்தனர்.

ஆர்தர் சாலை சிறையில் பலத்த காவலில் கசாப் வைக்கப்பட்டுள்ளார். பாதுகாப்பு கருதி, திங்களன்று அவர் நீதிமன்றத்தில் ஆஜர்படுத்தப்படவில்லை. இந்நிலையில் கசாப் சார்பில் வாதிடுவதற்கு அமின் சோல்கர் மற்றும் ஃபர்ஹானா ஷா ஆகிய இரண்டு வழக்கறிஞர்களை மகாராஷ்டிர மாநில சட்ட ஆணையம் நியமித்துள்ளது.

திங்களன்று கசாப்பின் வழக்கறிஞர்களில் ஒருவரான அமின் சோல்கர் நீதிமன்றத்துக்கு வரவில்லை. மேல் முறையீடு செய்வதற்கு தங்களுக்கு 2 மாத காலம் தேவை என மற்றொரு வழக்கறிஞர் ஃபர்ஹானா ஷா நீதிபதிகளிடம் தெரிவித்தார். இருப்பினும் இந்த வழக்கு விசாரணையை ஆகஸ்ட் 12-ம் தேதிக்கு ஒத்திவைப்பதாக நீதிபதிகள் குறிப்பிட்டனர்.

முன்னதாக அரசு தரப்பு வழக்கறிஞராக உஜ்வல் நிகாம் ஆஜராகி, கசாப்புக்கு தூக்கு தண்டனை பெற்றுத் தர காரணமாக இருந்தார். இருப்பினும் ஃபஹீம் அன்சாரி, சஹாபுதீன் ஷேக் ஆகியோர் விடுவிக்கப்பட்டதை எதிர்த்து மனு தாக்கல் செய்யப்போவதாக குறிப்பிட்டிருந்தார்.

ஆனால், திங்களன்று நீதிமன்றத்தில் நிகாம் ஆஜராகவில்லை. அவருக்குப் பதிலாக பாண்டுரங்க போல் ஆஜரானார். கசாப்பின் தூக்கு தண்டனையை உறுதி செய்யும் மனு மற்றும் கசாப்பின் மனு ஆகிய இரண்டையும் ஒரே சமயத்தில் மும்பை உயர் நீதிமன்றம் விசாரிக்கும் என தெரிகிறது.