பெண் போலீஸை கண்டித்து வியாபாரிகள் ஆர்ப்பாட்டம்

சென்னை வேளச்சேரியில் பணம் கேட்டு மிரட்டுவதாக பெண் போலீஸ் சப் இன்ஸ்பெக்டரைக் கண்டித்து வியாபாரிகள் இன்று காலை ஆர்ப்பாட்டம் நடத்தியுள்ளனர்.
வேளச்சேரி விஜயநகரில் உள்ள ஒரு டீக்கடையில் ஊழியராக பணிபுரிபவர் வில்சன் (21). நேற்று இரவு 9 மணி அளவில் இவர் டீ கடையில் இருந்தார். வேளச்சேரி போலீஸ் நிலையத்தில் இருந்து பெண் போலீஸ் சப்-இன்ஸ் பெக்டர் கவுசல்யா அங்கு சென்றார். அவர் டீ கடை ஊழியர் வில்சனை அடித்து உதைத்து போலீஸ் நிலையத்துக்கு கூட்டுச் சென்றதாக கூறப்படுகிறது.

இந்த நிலையில், இன்று காலை 11.30 மணிக்கு வியாபாரிகள் மற்றும் காங்கிரஸ் கட்சியினர் வேளச்சேரி போலீஸ் நிலை யத்தை முற்றுகையிட்டு பெண் சப்-இன்ஸ்பெக்டர் கவுசல்யாவை கண்டித்து போராட்டம் நடத்தினார்கள். போராட்டத்துக்கு தமிழ்நாடு வணிகர் சங்க பேரமைப்பு தலைவர் விக்ரமராஜா தலைமை தாங்கினார்.

இதில் ஜோதிலிங்கம், மோகன், தேசிகன், கண்ணன், காங்கிரஸ் பிரமுகர் பிதாப், கனிபாண்டியன் உள்பட ஏராளமானோர் கலந்து கொண்டு பெண் சப்-இன்ஸ் பெக்டருக்கு எதிராக கோஷமிட்டனர். இந்த முற்றுகை போராட்டம் காரணமாக அந்த பகுதியில் போக்கு வரத்து பாதிப்பு ஏற்பட்டது.

தகவல் அறிந்ததும், கிண்டி போலீஸ் உதவி கமிஷனர் செந்தில்குமார் போராட்டம் நடத்தியவர்களிடம் பேச்சு வார்த்தை நடத்தினார். அப்போது, அவர்கள் பெண் போலீஸ் சப்-இன்ஸ்பெக்டர் கவுசல்யா மீது சரமாரி புகார் கூறினர்.

இதையடுத்து அவர், குற்றச்சாட்டுக்கான புகாரை எழுதி கொடுத்தால், சம்பந்தப்பட்ட பெண் போலீஸ் சப்-இன்ஸ்பெக்டர் மீது நடவடிக்கை எடுக்கப்படும் என்றார். அதை தொடர்ந்து புகார் மனுக்கள் அளிக்கப்பட்டன.

பெண் போலீஸ் சப்-இன்ஸ்பெக்டர் அடித்து உதை¢த்ததாக கூறப்படும் வில்சன் கொடுத்த புகார் மனுவில் கூறி இருப்பதாவது:-

நேற்று இரவு 9 மணி அளவில் டீக்கடையில் இருந்தேன். அப்போது சப்-இன்ஸ்பெக்டர் கவுசல்யா, என்னிடம் பிரதாப் வீடு எங்கே என்று கேட்டார். அவரது அலுவலகம் தான் எனக்கு தெரியும் என்றேன். உடனே என்னை அடித்து உதைத்தார்.

சட்டையை பிடித்து இழுத்துச் சென்று போலீஸ் ஜீப்பில் ஏற்றி குற்றவாளி போல் துன்புறுத்தினார். நீண்ட நேரத்துக்கு பிறகு வேளச்சேரி போலீஸ் நிலையத்துக்கு என்னை கொண்டு சென்றார். இரவு 1 மணி வரை அவர் போலீஸ் நிலையத்தில் இருந்தார். தவறு செய்யாத என்னை அப்போதும் துன்புறுத்தினார். அவர் மீது உரிய நடவடிக்கை எடுக்கும்படி கேட்டுக் கொள்கிறேன்.

இவ்வாறு அதில் கூறப்பட்டிருந்தது.

காங்கிரஸ் சார்பில் கொடுக்கப்பட்ட புகாரில் சப்-இன்ஸ்பெக்டர் கவுசல்யா முறைகேடாக செயல்படுபவதாகவும், பணம் வாங்கிக் கொண்டு கட்ட பஞ்சாயத்து செய்வதாகவும், குறிப்பிடப்பட்டுள்ளது. ரவுடிகள் மூலம் மாமூல் வசூலிப்பதாகவும் கூறி உள்ளார்.

போராட்டம் குறித்து விக்ரமராஜா கூறியதாவது:-

சப்-இன்ஸ்பெக்டர் கவுசல்யா வியாபாரியை துன்புறுத்தி பணம் வசூலிக்கிறார். சென்னை போலீஸ் கமிஷனர் கட்டப்பஞ்சாயத்தை ஒழிக்க நடவடிக்கை எடுத்து வருகிறார். அதற்கு நாங்கள் ஒத்துழைப்பு கொடுத்து வருகிறோம்.

ஆனால், இவர், கட்டபஞ்சாயத்து நடத்தி பணம் வசூலிக்கிறார். தவறு செய்யாத ஓட்டல் தொழிலாளியை அடித்து உதைத்து சித்ரவதை செய்து இருக்கிறார். அவர் மீது நடவடிக்கை எடுக்க கோரி போராட்டம் நடத்தினோம். நடவடிக்கை எடுக்கா விட்டால் போராட்டம் தொடரும்.

இவ்வாறு அவர் கூறினார்.