அரிய செல்வம் கொடுக்கும் ஆடிப்பெருக்கு வழிபாடு!

மண் வளம் தழைத்து, மழை வளம் கொழிக்கும் மாதம் ஆடி. மற்ற மாதங்களைவிட ஆடி மாதத்தில் அதிகம் மழை பெய்யும் என்பதும், ஒன்றாம் தேதி முதல் 17ம் தேதிவரை பெய்யும் மழை நீரானது, நீர்நிலைகளில் புது வெள்ளமென பொங்கி வழிவதே ஆடிப்பெருக்கு என்று விவசாயிகள் கூறுகின்றனர்.
உலகத்தில் அனைத்து பாவச்செயல்களுக்கும் அடிப்படை காரணம் பட்டினிதான். மாதம் மும்மாரி பெய்து, வளம் செழித்தால் எந்த வன்முறையும் நிகழாது. மாரி என்றால் மழையை குறிக்கும். அதேநேரத்தில் உலகத்தின் முதல் வித்தான மாரியம்மனின் பெயரும் இதுவே என்பதை உணரும்போது ஆடிக்கும், மாரிக்கும் உள்ள தொடர்பு தெரியும்.

மாரி என்னும் மழையால், நீர் நிலைகள் நிறைவதால் அதனை அம்மனின் மறு உருவமாக நினைத்து ஆடிப்பெருக்கு நாளில் பக்தர்கள் வழிபாடு நடத்தி வருகின்றனர். இந்நாளில் நதிகளுக்கு ஒப்பான தங்கள் வீட்டு பெண்களை பெற்றோர் அழைத்து சீர் வரிசைகள் கொடுப்பதும், பெண்கள் மங்களநாண் அணிந்து தாலிவரம் நிலைக்க வழிபாடு நடத்துவதும், சுமங்கலிகள் கன்னி பெண்களை ஆசீர்வதிப்பதும் ஆடிப்பெருக்கின் சிறப்பம்சம். ஆடிப்பெருக்கு சமயத்தில் மகரிஷிகள் தங்கள் யோக நிஷ்டையிலிருந்து வெளிப்பட்டு பூமிக்கு மேலே வந்து, நதிகளில் நீராடி, மந்திரங்களை சொல்லி உலக மக்களை நலமுடன் வாழ வாழ்த்துவார்கள் என்ற ஐதீகம் காலம் காலமாக இருந்து வருகிறது.

இந்த ஆடிப்பெருக்கின்போது, நதிகளில் மக்கள் நீராடுவதால், மகரிஷிகளின் ஆசிகளையும் அரிய செல்வங்களையும் பெறலாம் என்று புராணங்கள் கூறுகின்றன. புண்ணிய நதிகளில் நீராடுவதற்கு முன், அதற்குரிய நியதிகளை கடைப்பிடித்து, நதி அன்னையை வழிபட்டு, தான தர்மங்கள், அன்னதானம் செய்தால் மகரிஷிகள் கொடுத்த ஆசீர்வாதங்கள் நம்மை சாரும் என்று சாஸ்திரங்கள் கூறுகின்றன. இத்தகைய ஆடிப்பெருக்கு விழா நாளை (3ம் தேதி) கொண்டாடப்படுகிறது. இந்நாளில் நீர்நிலைகளில் சிறப்பு வழிபாடு நடத்தி புண்ணியத்தை தேடிக் கொள்வோமே.
அரிய செல்வம் கொடுக்கும்

நீராடிய பின் உச்சரிக்க வேண்டிய சிறப்பு மந்திரம் புண்ணிய நதிகளில் நீராடியபின்பு இறைவனை பூஜிப்பதற்கென்று பல்வேறு திருநாமங்கள் இருந்தாலும், 11 திருநாமங்கள் முக்கியமானதாக சாஸ்திரம் கூறுகின்றது.

ஓம் சம்பூதை நம
ஓம் கல்யாண்மை நம
ஓம் காம தாயின்மை நம
ஓம் கல்யாண தீர்த்த ரூபின்யை நம
ஓம் சையாசல உத்பாயை நம
ஓம் லோபா முத்ராசுவ சாஸ்யாமா நம
ஓம் கும்ப சம்பவ வல்லபாயை நம
ஓம் விஷ்ணு மாயை நம
ஓம் சோழ மாதா நம
ஓம் தட்சிணபத ஜானவ்யை நம
ஓம் காவிரி தேவ்யை நம

என்று, இந்த பதினோரு திரு நாமாக்களை சொல்லி வழிப்பட்டாலும், நதிக்கரைகளுக்கு செல்ல இயலாதவர்கள் அம்பாள் முன்பு இந்த நாமாக்களை சொல்லி வழிப்பட்டாலும் பேறுகள் பல பெறலாம் என்பது நம் முன்னோர்களின் வாக்கு.