உத்தரகாண்ட் மாநிலத்தில் பள்ளத்தில் லாரி கவிழ்ந்து 23 பக்தர்கள் பலி

by நவீன் Mon Aug 02, 2010 5:47 pm

உத்தரகாண்ட் மாநிலத்தில் 500 அடி பள்ளத்தில் லாரி கவிழ்ந்த விபத்தில் 23 பக்தர்கள் பலி ஆனார்கள்.
அரியானா மாநிலத்தைச் சேர்ந்த சிவ பக்தர்கள் சிலர் உத்தரகாண்ட் மாநிலம்
கங்கோத்ரி நோக்கி லாரி ஒன்றில் சென்று கொண்டிருந்தனர். உத்தரகாண்ட்
மாநிலம் உத்தர்காசி மாவட்டத்தில் உள்ள தாப்ரனி என்ற இடத்தில்
ரிஷிகேஷ்-கங்கோத்ரி தேசிய நெடுஞ்சாலையில் அந்த லாரி போய்க் கொண்டிருந்த
போது, திடீரென்று டிரைவரின் கட்டுப்பாட்டை இழந்து, சுமார் 500 அடி ஆழ
பள்ளத்தில் கவிழ்ந்து விபத்துக்கு உள்ளானது. இந்த கோர விபத்தில், லாரியில்
பயணம் செய்த பக்தர்கள் 23 பேர் சம்பவ இடத்திலேயே உயிர் இழந்தனர்.
விபத்து குறித்து தகவல் கிடைத்ததும், மாவட்ட சூப்பிரண்டு மற்றும் உயர்
அதிகாரிகள் சம்பவ இடத்திற்கு விரைந்து சென்றனர். மாநில போலீசாரும்,
இந்தோ-திபெத்திய எல்லை பாதுகாப்பு படையினரும் அங்கு சென்று மீட்புப்
பணியில் ஈடுபட்டனர். பல மணி நேரம் போராடி, அந்த பகுதியில் இருந்து
பலியானவர்களின் உடல்களை அவர்கள் மீட்டனர்.
உத்தரகாண்ட் முதல்-மந்திரி ரமேஷ் பொக்ரியால் நிஷாங்க், இந்த விபத்தில்
பலியானவர்களின் குடும்பத்தினருக்கு இரங்கல் தெரிவித்துள்ளார். அவர்
வெளியிட்டுள்ள இரங்கல் செய்தியில் "இந்த சம்பவத்தை கேள்விப்பட்டு, கடும்
அதிர்ச்சி மற்றும் ஆழ்ந்த வேதனை அடைந்ததாகவும், விபத்தில் பலியானவர்களின்
ஆன்மா சாந்தியடைய பிரார்த்திப்பதாகவும்" தெரிவித்துள்ளார். மேலும் இந்த
விபத்தில் பாதிக்கப்பட்டுள்ளவர்களுக்கு உரிய நிவாரணம் வழங்கவும் மாவட்ட
நிர்வாகத்திற்கு உத்தரவிட்டுள்ளார். விபத்து குறித்து நீதிமன்ற
விசாரணைக்கும் உத்தரவிடப்பட்டுள்ளது.
இந்த கோர விபத்திற்கு உத்ரகாண்ட் மாநிலத்தில் கடந்த சில நாட்களாக
பெய்து வரும் பலத்த மழைதான் காரணம் என்று கூறப்படுகிறது. அந்த மாநிலத்தில்
கடந்த 44 ஆண்டுகளில் இல்லாத அளவுக்கு கடந்த சில நாட்களாக பலத்த மழை பெய்து
வருகிறது. இதனால் பெரும்பாலான இடங்களில் வெள்ளப்பெருக்கு ஏற்பட்டுள்ளது.
பல்வேறு பகுதிகளில் முக்கியமான ரோடுகள் வெள்ளத்தில் அடித்துச்
செல்லப்பட்டு விட்டன. மேலும் ஏராளமான கிராமங்களுடனான தொடர்பும்
துண்டிக்கப்பட்டுள்ளது. பலத்த மழை காரணமாக அந்த மாநிலத்தில் மின்
உற்பத்தியும் பெருமளவுக்கு பாதிக்கப்பட்டுள்ளது