காமன்வெல்த் போட்டி குளறுபடி-ஆசிய விளையாட்டுப் போட்டியை நடத்த இந்தியா விண்ணப்பிக்காது

காமன்வெல்த் போட்டியில் பெரும் குளறுபடிகும், நிதி மோசடிகளும் சரமாரியாக வந்தவண்ணம் இருப்தால் 2019ம் ஆண்டுக்கான ஆசிய விளையாட்டுப் போட்டியை நடத்த இந்தியா போட்டியிடாது என்று தெரிகிறது.

தோண்டத் தோண்ட ஊழல் குறித்த செய்திகளாக வந்து கொண்டுள்ளது டெல்லியில் நடைபெறவுள்ள காமன்வெல்த் போட்டிகள் குறித்து. மிகப் பெரிய அளவில் நிதி மோசடிகள் நடந்திருப்பதாகவும் சந்தேகிக்கப்படுகிறது. ஆனால் போட்டியை நடத்தும் இந்திய ஒலிம்பிக் சங்கத்தின் தலைவர் சுரேஷ் கல்மாடி ஒரு காங்கிரஸ்காரர் என்பதால் இந்த விவகாரத்தில் மத்திய அரசு பெரும் தர்மங்கடத்தில் மூழ்கியுள்ளது.

இந்த நிலையில், 2019ம் ஆண்டுக்கான ஆசிய விளையாட்டுப் போட்டியை நடத்த இந்தியா விரும்பாது என்று தெரிகிறது. இதுகுறித்து விளையாட்டு அமைச்சக தகவல்கள் கூறுகையில், காமன்வெல்த் போட்டி குளறுபடிகளைப் பார்க்கும்போது இந்தியா ஆசிய விளையாட்டுப் போட்டியை நடத்த விரும்பாது என்றே தெரிகிறது. ஆசிய விளையாட்டுப் போட்டியை நடத்தும் நாட்டை தேர்வு செய்யும் ஏலத்தில் பங்கேற்க வேண்டுமானால் மத்திய அமைச்சரவையின் ஒப்புதலைப் பெற வேண்டும்.

ஆனால் தற்போதைய சூழ்நிலையில் அது கிடைக்குமா என்பது பெரும் கேள்விக்குறியாக உள்ளது. காமன்வெல்த் போட்டிகள் குறித்து தொடர்ந்து வரும் சர்ச்சைகள், ஊழல் புகார்களால் விளையாட்டு அமைச்சகம் விரக்தி அடைந்துள்ளது.

ஆசிய விளையாட்டுக்கான ஏலத்தில் கலந்து கொள்வது என இந்திய ஒலிம்பிக் சங்கம் தன்னிச்சையாக முடிவெடுத்திருப்பது கண்டனத்துக்குரியது. விளையாட்டு அமைச்சகத்துடன் அது கலந்து ஆலோசித்த பின்னரே இதை
செய்திருக்க வேண்டும் என்றனர்.

காமன்வெல்த் போட்டிகள் பெரும் குழப்பத்தில் சின்னாபின்னமாகி வருவதால், ஆசிய விளையாட்டுப் போட்டியை நடத்த மத்திய அரசின் ஒப்புதல் கிடைப்பது சந்தேகம்தான் என்று இந்திய ஒலிம்பிக் சங்க அதிகாரிகளே அவ நம்பிக்கையுடன்தான் உள்ளனர்.