சாட்சியாக மாறினால் கே.பத்மநாதனுக்கு பொது மன்னிப்பு

நிசாந்தன் · நிசாந்தன் Mon Aug 02, 2010 1:20 am

சாட்சியாகப் பயன்படுத்தக்கூடிய விதத்தில் அரசாங்கத்துடன் ஒத்துழைக்கும் எந்தவொரு குற்றவாளிக்கும் மன்னிப்பு வழங்கக்கூடிய சட்டரீதியான ஏற்பாடுகள் நாட்டில் இருப்பதாக ஊடகத்துறை அமைச்சர் கெஹலிய ரம்புக்வெல தெரிவித்தார்.கே.பி.அல்லது குமரன் பத்மநாதன் கைது செய்யப்பட்டமை மற்றும் தடுத்து வைக்கப்பட்டிருக்கின்றமை தொடர்பான சட்ட ரீதியான பின்னணி குறித்து எழுப்பப்பட்ட கேள்விக்குப் பதிலளிக்கையிலேயே அமைச்சர் ரம்புக்வெல இதனைத் தெரிவித்தார்.

விடுதலைப் புலிகளுக்கு எதிரான யுத்தம் நடந்துகொண்டிருந்த போது நாட்டின் அழிவுக்காகப் புலிகளுக்கு உதவிய புலம்பெயர் தமிழ் சமூகம் இன்று வடக்கு,கிழக்கின் அபிவிருத்திக்காக அரசுக்கு உதவ முன்வந்திருப்பதாகத் தெரிவித்த அமைச்சரவைப் பேச்சாளரும் தகவல் மற்றும் ஊடகத்துறை அமைச்சருமான கெஹலிய ரம்புக்வெல இந்த விடயத்தில் விடுதலைப் புலிகளின் முன்னாள் முக்கியஸ்தரான கே.பி.எனப்படும் குமரன் பத்மநாதன் முக்கிய காரண கர்த்தாவாக காணப்படுவதாகவும்குறிப்பிட்டார்.

நாட்டின் அழிவுக்குக் காரணமாக கே.பி. இருந்தாலும் கூட அவர் இன்று நாட்டின் முன்னேற்றத்துக்கு உதவ முன்வந்திருப்பதன் காரணமாக சட்டப்படி அவருக்குப் பொதுமன்னிப்பளிக்க முடியும் எனவும் அமைச்சர் ரம்புக்வெல சுட்டிக்காட்டினார்.

அமைச்சரவைத் தீர்மானங்களை அறிவிக்கும் வாராந்தச் செய்தியாளர் மாநாடு நேற்று வியாழக்கிழமை அரச தகவல் திணைக்கள கேட்போர் கூடத்தில் நடைபெற்ற போது கே.பி.தொடர்பில் ஊடகவியலாளர்கள் எழுப்பிய கேள்விகளுக்குப் பதிலளிக்கையிலேயே அமைச்சர் மேற்கண்டவாறு தெரிவித்தார்.

அவர் இது தொடர்பில் மேலும் விளக்கமளிக்கையில் கூறியதாவது;

சர்வதேச மட்டத்தில் புலம்பெயர் தமிழ் சமூகம் இரண்டு பிரிவுகளாகக் காணப்படுவதையே காணமுடிகிறது. புலிகளுக்கு ஆதரவான சிறிய கூட்டமும் எதிரானவர்கள் அதிகமாகவும் இன்று காணப்படுகின்றனர்.

ஆரம்பம் முதல் புலிகளுக்கு சர்வதேச மட்டத்தில் உதவிகளைப் பெற்றுக்கொடுப்பதில் கே.பி.தான் முன்னணியில் காணப்பட்டார். புலிகளுக்கு ஆயுதம், பணம் என்பனவற்றை அவர் திரட்டிக் கொடுத்து வந்தார்.

அன்று நாட்டின் அழிவுக்காக உதவிய கே.பி.இன்று நாட்டை மேம்படுத்தவும் அபிவிருத்தி செய்யவும் உதவுவதற்கு முன்வந்துள்ளார். அவர் குற்றமிழைத்தவர் என்பதை நாம் ஒருபோதும் மறுக்கவோ மறைக்கவோ முயற்சிக்கவில்லை. ஆனால், ஒரு குற்றவாளி அரச தரப்புச் சாட்சியாக மாறும் போது அவரை மன்னிப்பதற்கு அரசியல் யாப்பின் பிரகாரம் சட்டத்தில் இடமிருக்கின்றது. அதனடிப்படையிலேயே அரசாங்கம் செயற்பட்டு வருகின்றது.

நாட்டின் எதிர்கால நலனைக் கருத்திற்கொண்டு அரசு சில நடவடிக்கைகளை எடுக்க வேண்டியுள்ளது. இதனைத் தப்பென்று கூறமுடியாது. சட்டத்தில் அதற்கு வாய்ப்பளிக்கப்பட்டுள்ளது. அதன் பிரகாரமே அரசு செயற்படுகின்றது என அமைச்சர் சுட்டிக்காட்டினார்.

இடையில் குறுக்கிட்ட ஒரு ஊடகவியலாளர் அப்படியானால் முன்னாள் இராணுவத் தளபதி ஜெனரல் சரத்பொன்சேகா விடயத்திலும் இந்த நடைமுறை கையாளப்படுமா? எனக் கேட்டபோது பதிலளித்த அமைச்சர் கெஹலிய ரம்புக்வெல;

அதற்கான கோரிக்கை முன்வைக்கப்படுமானால், அது நாட்டின் ஆரோக்கியத்துக்கு உகந்ததாக அமையுமானால் அது குறித்து நிச்சயம் கவனம் செலுத்தமுடியும். அவ்வாறான நிலை வரும்போது உரிய வேளையில் அரசு அதுகுறித்து முடிவெடுக்கும் எனத் தெரிவித்தார்.

சாட்சியாக மாறினால் கே.பத்மநாதனுக்கு பொது மன்னிப்பு

சாட்சியாக மாறினால் கே.பத்மநாதனுக்கு பொது மன்னிப்பு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக