எம்.பி.,க்கள் அமளியால் ஒரே வாரத்தில் ரூ.40 கோடி காலி

சரவணன் · சரவணன் Sun Aug 01, 2010 4:52 pm

விலைவாசி உயர்வு பிரச்னையில் எதிர்க்கட்சிகள் நடத்திய போராட்டம் காரணமாக, கடந்த ஒரு வாரமாக பார்லிமென்ட் நடவடிக்கைகள், எந்த அலுவல்களும் நடக்காமல் முற்றிலும் முடங்கியதால், 40 கோடி ரூபாய் மக்கள் வரிப் பணம் வீணடிக்கப்பட்டுள்ளது.

பார்லிமென்டின் மழைக்கால கூட்டத்தொடர், கடந்த மாதம் 26ல் துவங்கியது. இறந்தவர்களுக்கு அஞ்சலி செலுத்தும் வகையில், முதல் நாளன்று மட்டும் வழக்கமான முறையில் சபை ஒத்தி வைக்கப்பட்டது. இதையடுத்து, தொடர்ந்து நான்கு நாட்கள் ராஜ்யசபா, லோக்சபா என இரு சபைகளுமே வழக்கமாகக் கூடினாலும், எந்த அலுவல்களும் உருப்படியாக நடக்கவில்லை. விலைவாசி பிரச்னையை முன்வைத்து,
அனைத்து எதிர்க்கட்சிகளும் ஒரே அணியில் திரண்டு, அமளியில் ஈடுபட்டது தான் இதற்கு காரணம். விலைவாசி பிரச்னை குறித்து ஓட்டெடுப்புடன் கூடிய விவாதம் நடத்த வேண்டும் என்றும், ஒத்தி வைப்பு தீர்மானம் கொண்டு வர அனுமதிக்க வேண்டும் என்றும் அனைத்து எதிர்க்கட்சிகளும் குரல் கொடுத்தன. ஆனால், ஆளும் தரப்பு இதற்கு சம்மதிக்கவில்லை. எதிர்க்கட்சிகளை சமாதானப்படுத்த சபாநாயகர்
மீரா குமார் மேற்கொண்ட நடவடிக்கைகள் பலன் அளிக்கவில்லை. எதிர்க்கட்சியினரிடையே கருத்து வேறுபாடு ஏற்படும் என, எதிர்பார்த்திருந்த காங்கிரசின் முயற்சியும் பலன் அளிக்கவில்லை. இதனால், தொடர்ச்சியாக நான்கு நாட்கள் சபை நடவடிக்கைகள் முடங்கிப் போயின; எந்த ஒரு முக்கிய அலுவலும் நடக்கவில்லை.

40 கோடி ரூபாய் வீண்: ஒவ்வொரு நாளும் சபை நடவடிக்கைகள் நடப்பதற்கு, அரசு தரப்பில் இருந்து 7.65 கோடி ரூபாய் செலவிடப்படுகிறது. இது, மக்களின் வரிப் பணம். கடந்த ஒரு வாரமாக சபை நடவடிக்கைகள்
முடங்கியதால், ஒட்டு மொத்தமாக 38.3 கோடி ரூபாய் மக்களின் வரிப் பணம், மக்கள் பிரதிநிதிகளால் வீணடிக்கப்பட்டுள்ளது. கடந்த வாரம் சபைக்கு மிகக் குறைவான எண்ணிக்கையிலான எம்.பி.,க்களே வந்திருந்தனர். கடந்த 26ம் தேதி, 132 எம்.பி.,க் கள் சபைக்கு வரவில்லை. அதற்கு அடுத்த நாள், 101 எம்.பி.,க்கள் சபையை புறக்கணித்தனர். கடந்த 28ம் தேதி 91 எம்.பி.,க்களும், 29ம் தேதி 92 எம்.பி.,க்களும் சபைக்கு வரவில்லை. காங்கிரஸ் தலைவர் சோனியா, காங்கிரஸ் பொதுச் செயலர் ராகுல் ஆகியோர் கடந்த வாரம் சபைக்கு வரவில்லை. இதனால், காங்கிரஸ் எம்.பி.,க் கள் பலரும் சபைக்கு வருவதில் ஆர்வம் காட்டவில்லை. இதற்கு எதிர்க்கட்சி எம்.பி.,க்களும் விதிவிலக்கல்ல. எதிர்க்கட்சி வரிசையிலும் கணிசமான இருக்கைகள் காலியாக இருந்தன.

இதுகுறித்து அரசியல் வட்டாரங்கள் கூறியதாவது: சாதாரண மக்களின் வாழ்வாதாரத்தை பாதிக்கும் விலை உயர்வு பிரச்னைக்காகவே போராடுகிறோம் என, எதிர்க்கட்சிகள் கூறி வருகின்றன. ஆனால், சபை நடவடிக்கைகள் நடக்காததால், மக்கள் வரிப் பணம் வீணடிக்கப்படுகிறது. இதுவும் சாதாரண மக்களுக்கு பாதிப்பை ஏற்படுத்த கூடிய விஷயம் தான் என்பதை அவர்கள் உணரவில்லை. அதேபோல், எதிர்க்கட்சிகளின் கோரிக்கைகளை ஏற்காமல், பிடிவாதம் பிடித்து வரும் அரசு தரப்பும், மக்களின் வரிப் பணம் வீணடிக்கப்படுவதற்கு முக்கிய காரணமாக உள்ளது. இவ்வாறு அரசியல் வட்டாரங்கள் தெரிவித்தன.

நன்றி: தின எம்.பி.,க்கள் அமளியால் ஒரே வாரத்தில் ரூ.40 கோடி காலி 154550