தடுப்பிலுள்ள புலிகள் சர்வதேச வலையமைப்புடன் தொடர்பாம்

நிசாந்தன் · நிசாந்தன் Sun Aug 01, 2010 4:49 pm

மருதமடு புனர்வாழ்வு முகாமில் உள்ள முன் நாள் போராளிகள் தமது சர்வதேச வலையமைப்பினருக்கு தகவல் வழங்கியுள்ளதாக இராணுவப் பேச்சாளர் மேஜர் ஜெனரல் உபாய மெதவல தெரிவித்தார். விடுதலைப் புலிகளின் உறுப்பினர்கள் தம்மிடம் இரகசியமான முறையில் மறைத்து வைத் திருந்த 17 கையடக்க தொலைபேசிகள் உட்பட பல உபகரணங்கள் மீட்கப்பட்டுள்ளன. இதுகுறித்து கருத்து வெளியிடுகையிலேயே அவர் இதனைக் கூறினார். சில கையடக்கத் தொலைபேசிகளை அவர்கள் தமக்கு தேவையான நேரத்தில் பயன்படுத்திய பின்னர் புதைத்துவைத்திருந்ததாகவும் அவர் கூறியுள்ளார்.

இது தொடர்பாக அவர் கூறுகையில், இந்த சம்ப வத்துடன் தொடர்புடைய புலிகளின் சந்தேக நபர்கள் வெளி நாடுகளுக்கு அழைப்புகளை மேற் கொண்டுள்ளனர். இவர்கள் தமது சர்வதேச வலையமைப்பினருக்கு தகவல்களை வழங்கியிருக்கலாம் எனவும் பாதுகாப்புப் படையினர் சந்தேகம் வெளியிட்டுள்ளனர். தொலைபேசிகளில் எடுக்கப் பட்ட அழைப்புக்கள் தொடர்பாக விசாரணைகள் நடத்தப்பட்டு வருகின்றன. கையடக்கத் தொலைபேசிகளுடன் 14 சிம் அட்டைகள் முப்பது பற்றரிகள் மற்றும் 21 சார்ஜர்கள் என்பன கைப்பற்றப்பட்டுள்ளன. புனர்வாழ்வு முகாமில் அதிகாரிகள் மேற்கொண்ட தேடுதலில் இவை கைப்பற்றப்பட்டுள்ளன.அதேவேளை இது குறித்து இராணுவப் புலனாய்வுப் பிரிவினர் துரிதமான விசாரணையை ஆரம்பித்துள்ளதாகவும் இராணுவப் பேச்சாளர் குறிப்பிட்டுள்ளார்.

இருப்பினும் இவ்வாறான தகவல்களை வெளியிடுவதன் மூலம் முன் நாள் போராளிகளை தொடர்ந்தும் தடுப்புகாவலில் வைத்திருக்கவே திட்டமிட்டு வெளியிடப்படுகிறது. புணர்வாழ்வு முகாமில் உள்ள முன் நாள் போராளிகளை விடுதலைசெய்யும் நாட்கள் எட்டியுள்ள நிலையில், அவர்கள் சர்வதேச வலைப்பின்னலோடு தொடர்பு வைத்திருக்கிறார்கள் என்று கூறி அவர்களை தொடர்ந்தும் தடுப்புக்காவலில் வைத்திருக்க இலங்கை புலனாய்வுத் துறை முயற்சிக்கிறது என்பதே தற்போது வெட்டவெளிச்சமாகத் தெரிகிறது.

தடுப்பிலுள்ள புலிகள் சர்வதேச வலையமைப்புடன் தொடர்பாம்

தடுப்பிலுள்ள புலிகள் சர்வதேச வலையமைப்புடன் தொடர்பாம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக