தமிழகத்தில் தீண்டாமை இன்னும் முற்றிலுமாக ஒழிக்கப்படவில்லை: ப.சிதம்பரம்

தமிழகத்தில் தீண்டாமை இன்னும் முற்றிலுமாக ஒழிக்கப்படவில்லை. இரட்டை தம்ளர் முறை இன்றும் தொடர்கிறது. உயர்ந்த சாதி, தாழ்ந்த சாதி ஆண், பெண் காதலித்தால் பிரச்னை ஏற்படுகிறது. அதனால் கௌரவக் கொலைகளும் நடக்கின்றன என்று ப.சிதம்பரம் தெரிவித்துள்ளார்.
தலித்துகள், சிறுபான்மையின மக்கள் காங்கிரசில் இணைக்க வேண்டும் என்றும் அவர் வலியுறுத்தினார்.

மதுரையில் சனிக்கிழமை நடைபெற்ற காங்கிரஸ் முன்னாள் அமைச்சரும், தியாகியுமான கக்கன் நூற்றாண்டு நிறைவு விழாவில் சிறப்பு மலரை வெளியிட்டு அவர் சனிக்கிழமை பேசியதாவது:

மதுரையில் தாழ்த்தப்பட்ட மக்கள் கோயிலுக்குள் செல்லவேண்டும் என வைத்தியநாதய்யர் தலைமையில் நடைபெற்ற ஆலயப்பிரவேசத்தில் பங்கேற்றவர்களில் கக்கனும் ஒருவர். இச்சம்பவம் மிகப்பெரிய புரட்சியாகும். ஆனால், நாட்டில் இன்னும் பல இடங்களில் தாழ்த்தப்பட்ட மக்கள் கோயிலுக்குள் செல்ல அனுமதி இல்லாத நிலை உள்ளது.

தமிழகத்தில் தீண்டாமை இன்னும் முற்றிலுமாக ஒழிக்கப்படவில்லை. இரட்டை தம்ளர் முறை இன்றும் தொடர்கிறது. உயர்ந்த சாதி, தாழ்ந்த சாதி ஆண், பெண் காதலித்தால் பிரச்னை ஏற்படுகிறது. அதனால் கெüரவக் கொலைகளும் நடக்கின்றன. இங்கேயே இப்படி என்றால் பிகார், உத்தரப்பிரதேசம், மத்தியப் பிரதேசம் போன்ற மாநிலங்களின் நிலையைப் பற்றிச் சொல்லவா வேண்டும்?

உத்தரப்பிரதேசத்தில் சத்துணவு பரிமாறும் பணிக்கு தாழ்த்தப்பட்டோரை நியமித்தால் உயர்ந்த சாதியினர், அப்பள்ளியிலிருந்து தங்களது குழந்தைகளை வேறு பள்ளியில் சேர்க்கும் அவல நிலை உள்ளது.

பொதுவாழ்வில் நேர்மையையும் தூய்மையையும் கடைபிடித்து வாழ்ந்தவர் கக்கன். சமுதாயக் கொடுமைகளை எதிர்த்துப் போராடியவர் அவர். அவரின் வாழ்க்கை வரலாற்றை இன்றைய இளம் தலைமுறையினருக்கு எடுத்துக்கூறவே நூற்றாண்டு விழா கொண்டாடப்படுகிறது..

சாதி ஒழியவேண்டும் எனில் மக்கள் மனதில் புரட்சி ஏற்படவேண்டும். அதை ஜவாஹர்லால் நேரு, காமராஜர், அம்பேத்கர், ஜெகஜீவன்ராம் போன்ற தலைவர்கள் ஏற்படுத்தினர்.

தாழ்ந்தவன், உயர்ந்தவன் என்ற பேதத்தை நம்பாதவனே காங்கிரஸ்காரனாக இருக்கமுடியும். தீண்டாமை கொடுமை ஒழிக்கவேண்டும் என நினைப்பவனே காங்கிரஸ்காரனாக இருக்கமுடியும். ஆகவே தீண்டாமை உள்ளிட்ட சமூகக் கொடுமையை ஒழிக்க காங்கிரசார் பாடுபடவேண்டும்.
தமிழக இளைஞர் காங்கிரசில் 13 லட்சம் பேரில் பெரும்பான்மை தலித் சமூகத்தவர் எனக் கூறினர்.

தலித் இளைஞர்களுக்கு கூறுவது என்னவென்றால், தனிப்பாதையாக, கட்சியாக இருந்து எதையும் சாதிக்க முடியாது. இதுவே சிறுபான்மை இனத்துக்கும் பொருந்தும். தலித் தலைவர்கள் அரிய சாதனை நிகழ்த்தியது காங்கிரஸில் இணைந்து இருந்தபோதுதான்.

காங்கிரஸ் ஆட்சியில் காமராஜர் தலைமையிலான அரசில் இடம்பெற்றபோதுதான் கக்கன் பல அரிய சாதனையை நிகழ்த்தினார். எனவே தலித் மக்கள் சாதனை புரிய வேண்டுமானால் காங்கிரசுக்கு வரவேண்டும். தலித்துகள் சோனியா, ராகுல் தலைமையில் காங்கிரஸில் இணைந்தாலே, சாதனை நிகழ்த்த வாய்ப்பு ஏற்படும் என்றார்.

கக்கன் நூற்றாண்டு விழா மலரை மத்திய உள்துறை அமைச்சர் ப.சிதம்பரம் வெளியிட, அதை மத்திய கப்பல் போக்குவரத்துத் துறை அமைச்சர் ஜி.கே.வாசன் பெற்றுக் கொண்டார்.

இந்நிகழ்ச்சியில் தமிழக காங்கிரஸ் தலைவர் கே.வீ.தங்கபாலு உள்ளிட்டோர் கலந்துகொண்டனர்.