நடிகர் சார்லி சாப்ளினின் கொள்ளுப்பேத்தியின் பெயர் இந்தியா

ஆங்கில திரைப்பட நகைச்சுவை நடிகர் சார்லி சாப்ளின் தனது கொள்ளு பேத்திக்கு இந்தியா என்று பெயர் வைத்தார். இந்தியாவின் மீது அவருக்கு ஒருவித ஈர்ப்பு. மாணவர்களாகிய நீங்கள் ஒழுக்கமானவர்களாக, இந்தியாவை நேசிப்பவர்களாக இருக்க வேண்டும் என்று ப.சிதம்பரத்தின் சகோதரர் ப.லட்சுமணன் தெரிவித்துள்ளார்.
பேராசிரியர் அ.ச.ஞா. இலக்கிய மன்ற ஆண்டு விழா சென்னை கொடுங்கையூரில் வியாழக்கிழமை நடைபெற்றது.
விழாவில் தலைமை விருந்தினராக ப.லட்சுமணன் (மத்திய அமைச்சர் ப.சிதம்பரத்தின் சகோதரர்) கலந்துகொண்டு பேசியது:

பல்வேறு சிரமங்களுக்கு இடையேயும் கலாசாரம், பாரம்பரியத்தைப் போற்றும் வகையில் சிறந்த முறையில் இப்பள்ளி வளர்ந்து வருவது பாராட்டத்தக்கது.

இதற்கு பள்ளியின் தாளாளர் தியாகராஜனின் விடாமுயற்சியே காரணம் ஆகும். தான் வருந்தி உழைப்பதன் மூலம் மற்றவர்கள் பலன் அடைவார்கள் எனில் அவரே நல்லான் என நூல்கள் தெரிவிக்கின்றன.

தமிழில் பெரும் புலமை பெற்றவர் அ.ச.ஞா.: அ.ச.ஞா.வின் தந்தை சரவண முதலியாரும் ஒரு தமிழ் புலவர்தான்.

திருச்சி மாவட்டம், லால்குடி தாலுகா, அரசங்குடியில் பிறந்த அ.ச.ஞா. சிதம்பரம் அண்ணாமலை பல்கலைக் கழகத்தில் தமிழில் ஹானர்ஸ் பட்டம் பெற்று பெரும் புலமை பெற்றார். அவரிடம் பாடம் படித்ததை என்னைப் போன்ற மாணவர்கள் ஒரு பாக்கியமாகவே கருதுகிறோம்.
1916-ல் பிறந்து, 2002-ல் அ.ச.ஞா. மறைந்தார். அவர் அள்ளித் தெளித்ததில் கற்றவைதான் நாங்கள் கற்ற தமிழ். பல நல்ல மாணாக்கர்களை உருவாக்கியவர் அ.ச.ஞா. என்றால் அது மிகையல்ல. அவரது படைப்புகளை, குரலை அவரது காலத்தில் பதிவு செய்ய இயலாமல் போனது வருத்தம் அளிக்கிறது. திருக்குறள் குறித்து அவர் எழுதிய நூல் சிறப்புக்கு உரியது,

பிலிப்ஸ் நிறுவனத்தின் தலைமை அலுவலகம் ஐரோப்பாவின் ஆஸ்லோ நகரில் உள்ளது. இந்த அலுவலகத்தின் எதிரில் இந்நிறுவனத்தை ஏற்படுத்திய பிலிப் என்பவரின் சிலை உள்ளது. இச்சிலையைச் சுற்றி வந்த இளைஞன் ஒருவன், நான் ஒரு நாள் உன்னை வெல்வேன் என்றான். அவன்தான் ஜப்பானைச் சேர்ந்த சோனி.

வாழ்நாள் முழுவதும் தாழ்த்தப்பட்ட மக்களுக்காக உழைத்தவர் பெரியார். அனைத்திலும் சிக்கனத்தைப் போதித்தார்.
எனவே நாம் இன்னாரைப்போல் வாழ வேண்டும் என்பதை பள்ளி பருவத்திலேயே மாணவர்கள் தேர்வு செய்ய வேண்டும்.

சுதேசியை புறக்கணிக்கும் ஆட்சியாளர்கள்:

தண்ணீரை விலை கொடுத்து வாங்கும் காலம் வரும் என பெரியார் கூறினார். இன்று அதே நிலை தொடர்கிறது. ஒரு பிரிட்டன் கம்பெனியால் அடிமைப்படுத்தப்பட்டு பின் சுதந்திரம் பெற்ற இந்தியாவை, இன்று பல்வேறு வெளிநாட்டு நிறுவனங்கள்தான் ஆள்கின்றன. சுத்தம் செய்யும் வேலை, ஓட்டுநர் வேலை போன்ற வேலைகள்தான் இனி இந்தியர்களுக்கு கிடைக்கும்.

சாதாரண மளிகைக் கடைகளைக்கூட இனி காண முடியாது. இந்தியாவில் எங்கு பார்த்தாலும் அந்நிய மோகம் தலைவிரித்தாடுகிறது. காந்திஜியின் சுதேசி கொள்கைக்கு நேர் எதிரானவர்கள் கையில் ஆட்சி சிக்கி உள்ளதே, இதற்கெல்லாம் காரணம். இந்த நாட்டைப் பற்றி அறியாதவர்கள் ஆட்சியில் உள்ளனர். இவர்கள் புற்றுநோய் போல் நாட்டை அழித்து வருகின்றனர்.

ஆங்கில திரைப்பட நகைச்சுவை நடிகர் சார்லி சாப்ளின் தனது கொள்ளு பேத்திக்கு இந்தியா என்று பெயர் வைத்தார். இந்தியாவின் மீது அவருக்கு ஒருவித ஈர்ப்பு. மாணவர்களாகிய நீங்கள் ஒழுக்கமானவர்களாக, இந்தியாவை நேசிப்பவர்களாக இருக்க வேண்டும் என்றார் லட்சுமணன்.

நிகழ்ச்சியில் பள்ளியின் தாளாளர் தியாகராஜன், பள்ளியின் முதல்வர் சங்கரன், சின்மயா அறக்கட்டளை அறங்காவலர் விஸ்வநாதன் உள்ளிட்டோர் கலந்து கொண்டனர். விழாவில் மாணவ, மாணவியர் பங்கேற்ற கலைநிகழ்ச்சிகள் நடைபெற்றன.