கிராமங்களில் வீடு வீடாக சென்று சர்க்கரை நோய், ரத்த அழுத்தம் பரிசோதனை செய்ய புதிய திட்டம்

தமிழ்நாடு முழுவதும் கிராமங்களில் வீடு
வீடாக சென்று 30 வயதுக்கு மேற்பட்டவர்களுக்கு சர்க்கரை நோய் உள்ளதா? ரத்த
அழுத்தம் உள்ளதா? என்பதை அறிய புதிய திட்டம் இன்னும் 2 மாதங்களில்
அமல்படுத்தப்பட உள்ளது.
சென்னை எழும்பூரில் உள்ள ராணி மெய்யம்மை திருமண மண்டபத்தில் டாக்டர்
மோகன் நீரிழிவு சிறப்பு மையம் சார்பில் நீரிழிவு விழிப்புணர்வு கண்காட்சி
நீரிழிவு 2010 என்ற பெயரில் நேற்று தொடங்கியது. ஆகஸ்டு 1-ந்தேதி வரை
நடைபெறும் அந்த கண்காட்சியை தமிழக சுகாதாரத்துறை அமைச்சர்
எம்.ஆர்.கே.பன்னீர்செல்வம் தொடங்கி வைத்து பேசியதாவது:-
தமிழ்நாட்டில் நகர்ப்புறங்களில் 16 சதவீதம் பேர்களும், கிராமங்களில் 12
சதவீதம் பேர்களும் சர்க்கரைநோயால் பாதிக்கப்பட்டுள்ளனர். உடல் உழைப்பு
இல்லாததால்தான் சர்க்கரைநோய் அதிகம்பேருக்கு வருகிறது. சர்க்கரை நோய்
குறித்த ஆய்வை டாக்டர் மோகன் நீரிழிவு மையம் சிறப்பாக நடத்தி வருகிறது.
சர்க்கரை நோயை முழுவதும் குணப்படுத்தும் மருந்தை இந்த மையம்
கண்டுபிடிக்கவேண்டும்.
தமிழ்நாட்டில் வரும்முன் காப்போம் திட்டம் கடந்த 2006-ம் ஆண்டு
தொடங்கப்பட்டது. முதல் கட்டமாக 10 ஆயிரத்து 394 முகாம்கள் நடத்தப்பட்டன.
2-வது கட்டமாக 2 ஆண்டுகளுக்கு 9ஆயிரம் முகாம்கள் நடத்த திட்டமிட்டு இதுவரை
5 ஆயிரத்து 42 முகாம்கள் நடத்தப்பட்டுள்ளன. இதுவரை பயனாளிகளின் எண்ணிக்கை
ஒரு கோடியே 48 லட்சம். இந்த திட்டத்திற்காக ரூ.31 கோடியே 88 லட்சம்
ஒதுக்கப்பட்டது. இருதய நோய் சிகிச்சைக்காக 58 ஆயிரத்து 448 பேர்களும்,
சர்க்கரைநோய் சிகிச்சைக்காக 5 லட்சத்து 8 ஆயிரத்து 128 பேர்களும், கண்
அறுவை சிகிச்சைக்காக 1 லட்சத்து 52 ஆயிரத்து 994 பேர்களும், ரத்த உயர்
அழுத்த சிகிச்சைக்காக 4 லட்சத்து 67ஆயிரத்து 793 பேர்களும், புற்றுநோய்
சிகிச்சைக்காக 36 ஆயிரத்து 853 பேர்களும், ஸ்கேன் எடுத்து 7லட்சத்து
7ஆயிரத்து 737 பேர்களும் பயன் அடைந்துள்ளனர். இதுவரை ரூ.28 கோடியே 40
லட்சம் செலவிடப்பட்டுள்ளது.
கிராமப்புற மக்களின் நலன் கருதி சர்க்கரை நோய் மற்றும் உயர் ரத்த
அழுத்தம் பற்றி கண்டறியும் புதிய திட்டம் தமிழகத்தில் கொண்டு வரப்பட
உள்ளது. மத்திய அரசும் தமிழக அரசும் இணைந்து இந்த திட்டம் கொண்டு
வரப்படுகிறது. இதற்காக தன்னார்வலர்களுக்கு பயிற்சி அளிக்கப்படும். ஒருவர்
50 வீடுகளுக்கு சென்று 30 வயதுக்கு மேற்பட்டவர்களிடம் அவர்களுக்கு
சர்க்கரை நோய் உள்ளதா? ரத்த உயர் அழுத்தம் உள்ளதா என்பதை என்பதை
பரிசோதித்து அவர்களுக்கு ஆஸ்பத்திரிக்கு அழைத்து சென்று சிகிச்சை
அளிப்பார்கள். இந்த திட்டம் இன்னும் ஒன்று அல்லது 2 மாதங்களில்
தொடங்கப்படும். கலைஞர் காப்பீட்டு திட்டத்தில் இதுவரை 1 லட்சத்து 53
ஆயிரம் பேர் பயன் அடைந்துள்ளனர். சர்க்கரை நோயை வரும்முன்காக்க பொதுமக்கள்
விழிப்போடு இருக்கவேண்டும். இவ்வாறு அமைச்சர் எம்.ஆர்.கே.பன்னீர்செல்வம்
பேசினார்.
டாக்டர் மோகன் நீரிழிவு சிறப்பு மைய தலைவர் டாக்டர் வி.மோகன்,
இயக்குனர் டாக்டர் ரஞ்சித் உன்னிகிருஷ்ணன், இந்திய மருத்துவ சங்க செயலாளர்
டாக்டர் டி.வி.ரவிசங்கர் உள்பட பலர் பேசினார்கள். தொடக்கத்தில் டாக்டர்
மோகன் நீரிழிவு சிறப்பு மைய இயக்குனர் டாக்டர் ஆர்.எம்.அஞ்சனா வரவேற்றார்.