மலேசியா ஸ்ரீ மாரான் மரத்தாண்டவர் ஆலயம்

**சிவா** · **சிவா** Fri Jul 30, 2010 5:51 pm

மலேசியத் தலைநகர் கோலாலம்பூரிலிருந்து கிழக்குப் பகுதியில் குவாந்தான் நகரை நோக்கிச் செல்லும் நெடுஞ்சாலையின் இடப்புறத்தில், முதல் ஆலயமாக அமைந்திருக்கிறது, ஸ்ரீ பாலசுப்பிரமணியர் ஆலயம். இக்கோயில், பெந்தோங் மாவட்டத்தைச் சேர்ந்ததாகும். காராக் நகரின், முறைப்படி பதிவு செய்யப்பட்ட ஒரே ஆலயம் இதுவாகும். 1926ம் ஆண்டில், அன்றைய அரசாங்க ஊழியர்களால் ஒரு சிறிய கூடாரத்தில் ஆரம்பிக்கப்பட்டு, இக்கோயிலின் வழிபாடுகள் துவங்கப்பட்டது. அதன் பிறகு படிப்படியாக வளர்ச்சி அடைந்து, தற்போதைய தோற்ற நிலையை அடைந்துள்ளது.

தலவரலாறு: மலேசியாவின் பஹாங் மாநிலத்திலுள்ள மாரான் என்ற ஊரில் அமைந்துள்ளது ஸ்ரீ மாரான் மரத்தாண்டவர் கோயில். சுமார் 120 வருடங்களுக்கு முன் கோலாலம்பூரிலிருந்து குவாந்தான் நகருக்கு சாலை அமைக்கும் வேலை நடந்துகொண்டிருந்தது. ஒரு பெரிய மரத்தை வெட்டும்போது அதிலிருந்து ரத்தம் கசிந்தது. அதே வேளையில் மரம் வெட்டிக்கொண்டிருந்த தமிழர் ஒருவருக்கு அருள் வந்து, அந்த மரத்தை வெட்டக்கூடாதென்றும், சாலையைச் சிறிது தூரத்திற்கு அப்பால் போடவேண்டுமென்று சொன்னார். அதைச் செய்ய மறுத்தார் ஆங்கிலேய மேற்பார்வையாளர். உடனே சிறிய குழந்தை வடிவு கொண்ட தழும்பு அந்த மரத்தில் தோன்றியது. அதைப்பார்த்து வியந்த மேற்பார்வையாளர் மரத்தை வெட்டாமல் சாலையை சிறிது தூரத்திற்கு அப்பால் போட உத்தரவிட்டார். அன்றிலிருந்து அந்த இடம் ஒரு புனித இடமாகி, ஸ்ரீ மரத்தாண்டவ பால தண்டாயுதபாணி என்ற பெயர் உருவானது.

இங்கு தூய பக்தியோடு வருபவர்களுக்கு எல்லா நன்மைகளும் வந்து சேர்கின்றன. ஊனமுற்றோர் நடப்பது, ஊமைகள் பேசுவது, நோயுற்றோர் குணமாவது போன்ற அற்புதங்கள் பல இங்கு நிகழ்ந்து வருகின்றன. இதுபற்றி கோயிலின் தலைமை அர்ச்சகர் கே.எஸ்.கணபதி கூறுகையில், நான் இந்தக் கோயிலுக்கு 1955ம் ஆண்டு, என் முப்பதாவது வயதில் வந்தேன். மாதச் சம்பளம் அப்பொழுது 20 ரிங்கிட் தான். முதலில் இக்கோயில் வெறும் தகரத்தாலும் மரப்பலகையாலும் அமைந்திருந்தது. அப்பொழுதெல்லாம் இங்கு அடிக்கடி நிகழும் அற்புதம் என்னவென்றால், இந்தச் சாலையில், நிற்காமல் செல்லும் வாகனங்கள் சிறிது தூரம் சென்றவுடன் ஓட முடியாமல் நின்றுவிடும். கோயிலிலிருந்து விபூதியை தேய்த்த பிறகுதான் மீண்டும் ஓடும்.

பங்குனி உத்திரம்தான் இந்தக் கோயிலின் மிகச்சிறப்பான திருவிழாவாகும். பல பக்தர்களின் வேண்டுதல்கள் நிறைவேறுகின்றன. அந்தக்காலத்தில் சுமார் 500 அர்ச்சனைகள் நடைபெறும். இப்போதோ 3லட்சத்திற்கும் மேல் அர்ச்சனைகள் நடைபெறுகின்றன என கூறினார். ஏன் இத்தனை காலமாக இங்கேயே இருக்கிறீர்கள் என கேட்டதற்கு அவர், 1962ல் நான் ஒரு கனவு கண்டேன். அதில் சுமார் 200 வருடங்களுக்கு முன்னர் இங்கே வசித்த ஒரு முருகபக்தர், இந்த கோயிலுக்குப் பக்கத்தில் இருக்கும் ஓடையில் குளித்துவிட்டு, இந்த மரத்தினுள் ஐக்கியமானதைக் கண்டேன். அதே மகான் கனவில் என்முன் தோன்றி இங்கேயே என்னை சேவை செய்யச் சொன்னார். அதன்படிதான் நான் முழுமனதோடு இங்கே சேவை செய்து வருகிறேன் என்றார்.

கோயில் நேரங்கள்: காலை 5.30 மணி முதல் இரவு 9 மணி வரை. அபிஷேகங்கள்: காலை 5.30; 10.30 மற்றும் மாலை 5.30 மணி.

ஸ்ரீ விநாயகர் துதி

ஐந்து கரத்தனை, யானை முகத்தனை,
இந்தின் இளம்பிறை போலும் எயிற்றனை,
நந்தி மகன்தனை, ஞானக் கொழுந்தினைப்
புந்தியில் வைத்தடிப் போற்றுகின்றேனே.

அருள்மிகு மரத்தாண்டவர் துதி

மலைவளம் சூழ் மாரானில் மயிலேறி விளையாடும் மால் மருகா,
திருமுருகா, மன்னவனே, வடிவேலா,
மாண்புடனே வீற்றிருந்து மக்களுக்கே காட்சி தரும்
மரத்தாண்டவரைத் தொழுது வரம் பெற்று உயர்வோமாக.

அம்பாள் துதி

வையம் முழுதும் படைத்து அளிக்கின்ற
அம்பிகைதன் புகழ் வாழ்த்துகின்றோம்.
செய்யும் வினைகள் அனைத்துமே வெற்றி
சேர்ந்திட நல்லருள் செய்கவென்றே.