குறிச்சி அம்மன்

அம்பிகை, மாதா, தேவி, சக்தி, நாரி, சூலி, முக்கண்ணி, பைரவி, துர்க்கை, மாயை &இப்படி பல பெயர்களால் அழைக்கப்படும் அன்னை, ராஜ ராஜேஸ்வரியாக அமைதியே உருவாக கோவை பகுதியில் அமர்ந்து பக்தர்களுக்கு அருள்பாலிக்கிறாள்.

சுமார் 40 ஆண்டுகளுக்கு முன்பு குறிச்சி வீட்டு வசதி வாரியத்தில் உள்ள ஒரு தோட்டத்தில் ஒரு புற்று தோன்றியது. அந்த தோட்டத்தை ஒட்டி ஒரு நெடுஞ்சாலை உள்ளது. அதை கடந்தால் மலையும், மலையை ஒட்டிய விவசாய நிலங்களும் உள்ளன. அந்த நிலத்திலிருந்து புறப்பட்ட ஒரு நாகம் தினசரி அந்த புற்றுக்கு வந்து சிலமணி நேரம் தங்கிச் சென்றது. இதைக்கண்ட அப்பகுதி மக்கள், அன்னை ராஜ ராஜேஸ்வரிதான் நாகப்புற்று உருவில் எழுந்தருளி உள்ளாள் என உணர்ந்தனர். எனவே, புற்றுக்கு மஞ்சள், குங்குமம் இட்டு, பூக்கள் சாற்றி, கற்பூரம், ஊதுபத்தி கொளுத்தி, பொங்கல் படையல் வைத்து, பாம்பிற்கும் பாலூற்றி வழிபடத் தொடங்கினர்.

தங்கள் குறைகளை அன்னையிடம் சொல்லி அவை நிவர்த்தியானதைத் தொடர்ந்து நேர்த்திக் கடன்களையும் செலுத்தத் தொடங்கினார்கள், பக்தர்கள். பின்னர் அன்னைக்கு அதே இடத்தில் ஆலயம் அமைத்து வழிபடத் தொடங்கினர்.

ஏகதள விமானத்துடன் கூடிய அன்னையின் ஆலயம் கிழக்கு நோக்கி அமைந்துள்ளது. ஆலய முகப்பைக் கடந்து மகாமண்டபத்தை அடையலாம். வெளிப்பிராகாரத்தின் தென் திசையில் துர்க்கையும், மேற்கு திசையில் பிள்ளையார், கருப்பராயர் மற்றும் சப்த கன்னியர் திருமேனிகள் ஆசி வழங்குகின்றன. வடக்குப் பிராகாரத்தில் ‘பஞ்ச நாகலிங்க கிருஷ்ண உரு’ நான்கடி உயர திருமேனியாக உள்ளது. வசுதேவர்&வாசுகிக்குப் பிறந்த கிருஷ்ணனை கம்சன் கையிலிருந்து தப்புவிப் பதற்காக, பெருமழை பிடித்த ஒரு நாளில் அவனை யசோதை யிடம் கொண்டு சேர்க்க வசுதேவர் சென்றபோது அவர்களை மழையிலிருந்து நாகம் குடைபிடித்துக் காத்ததே அந்த புராண சம்பவத்தை நினைவுறுத்துவதுபோல இச்சிலை அமைந்திருக்கிறது. சிவனே கிருஷ்ணன் என்ற ஒப்புமையையும் இச்சிலை விளக்குகிறது.

அர்த்தமண்டபத்தை அடுத்த கருவறையில் அன்னை ராஜ ராஜேஸ்வரி அருள் பொங்கும் புன்னகை யுடன் அமர்ந்திருக்கிறாள். தேவியின் தேவக்கோட்டத்தின் தென்புறம் கௌமாரியும், மேல்புறம் வைஷ்ணவியும், வடபுறம் பிராம்மியும் அருள்பாலிக்கின்றனர். மகா மண்டபத்தை ஒட்டி இடதுபுறம் தலவிருட்சமான அரசும், வேம்பும் விண்ணுயர செழித்து வளர்ந்துள்ளன. அவற்றின் கீழே மேடையில் பஞ்ச நாகர் சிலைகள் உள்ளன.


ராஜ ராஜேஸ்வரிக்கு சித்திரை மாத பௌர்ணமி அன்று சிறப்பு பூஜை நடைபெறுவதுடன் காலை திருக்கல்யாணமும், மதியம் சுமார் ஆயிரம் பேருக்கு அன்னதானமும் நடைபெறுகிறது. ஒவ்வொரு தமிழ் மாதத்திலும் குறிப்பிட்ட நாட்களில் அன்னைக்கு திருவிழாக் கோலம்தான். நவராத்திரி ஒன்பது நாட்களும் அன்னையை விதம் விதமாக அலங்கரித்து சிறப்பு பூஜைகள் செய்கிறார்கள். அன்னை அப்போது வீதியுலா வருவதும் உண்டு. செவ்வாய்க்கிழமை தோறும் சப்த கன்னியர்களுக்கு ராகு கால பூஜைகளும், சிறப்பு பூஜைகளும் நடைபெறுகின்றன. மாத பௌர்ணமி நாட்களில் திருவிளக்குப் பூஜை மிகவும் கோலாகலமாக நடத்தப்பெறுகிறது. ஏராளமான பெண்கள் இந்த பூஜையில் கலந்து கொள்கின்றனர்.

தன்னை நம்பியவர்களை தன் கண்போல் காக்கும் இந்த அன்னை கண் சம்பந்தமான நோய்களை தீர்க்க வல்லவள் என்றும் பார்வை கோளாறுகளை சரி செய்து அருள்புரிபவள் என்றும் பக்தர்கள் நம்புகின்றனர்.

கோவை&மதுக்கரை பேருந்து சாலையில் உக்கடம் பேருந்து நிலையத்திலிருந்து 8 கி.மீ. தொலைவில் உள்ளது குறிச்சி. உக்கடத்திலிருந்து நிறைய நகரப் பேருந்துகள் உள்ளன. குறிச்சி வீட்டு வசதி வாரியம் (பகுதி 2) என்று கேட்டு இறங்க வேண்டும். பஸ் நிறுத்தத்தில் இறங்கி நடந்தே ஆலயத்துக்குச் சென்று விடலாம்.

நன்றி