லக்னோ விமான நிலையத்தில் உலா வந்த பாம்பு தீயணைப்பு வீரரை கடித்தது

ரபீக் · ரபீக் Tue Jul 27, 2010 1:49 pm

உத்தரபிரதேச மாநிலம் தலைநகரம் லக்னோவில் விமான நிலையம் உள்ளது. இங்கு பயணிகள் நடமாடும் பகுதியில் பாம்பு ஒன்று நடமாடியது. அப்போது அங்கு வந்த மவுரியா என்ற தீயணைப்பு வீரரை கடித்தது. பின்னர் அங்கிருந்து ஓடி மறைந்து விட்டது.

வலியால் துடித்த அவர் சிறிது நேரத்தில் மயங்கி விழுந்தார். அவரை பல்கலைக்கழக ஆஸ்பத்திரியில் சேர்த்தனர். கவலைக்கிடமான நிலையில் சிகிச்சை பெற்று வருகிறார்.

மற்ற தீயணைப்பு வீரர்கள் அந்த பாம்பை பிடிக்க முயற்சித்தனர். ஆனால் அது மறைந்து இருந்த இடத்தை கண்டுபிடிக்க முடியவில்லை.

இதனால் பாம்பு பிடிக்கும் நிபுணர்களும், வனத்துறையினரும் வரவழைக்கப்பட்டனர். அவர்களும் பல இடங்களில் தேடினார்கள். ஆனால் இதுவரை பாம்பை கண்டுபிடிக்க முடியவில்லை.

எனவே எந்தநேரத்தில் பாம்பு பயணிகள் மத்தியில் தோன்றுமோ என்ற பீதி ஏற்பட்டு உள்ளது. இதனால் பயணிகள் அமரும் பகுதியில் கூடுதல் போலீஸ் பாதுகாப்பு போடப்பட்டு உள்ளது.
லக்னோ விமான நிலையம் 1200 ஏக்கர் நிலப்பரப்பில் பரந்து விரிந்துள்ளது. அங்குள்ள புதர்களில் இருந்து பாம்பு விமான நிலையத்துக்குள் வந்திருக்கலாம் என்று கருதப்படுகிறது.