சிறையில் நடைப்பயிற்சி அனுமதி வேண்டி சீமான் வழக்கு

ரபீக் · ரபீக் Wed 28 Jul 2010 - 12:26

வேலூர் சிறையில் அடைக்கப்பட்டிருக்கும் இயக்குநர் சீமானுக்கு நடைப்பயிற்சி அனுமதி வேண்டி அவரது வழக்கறிஞர் உயர்நீதிமன்றத்தில் வழக்கு தொடுத்துள்ளார்.
தேசிய பாதுகாப்பு சட்டத்தின் கீழ் வேலூர் சிறையில் அடைக்கப்பட்டுள்ள டைரக்டர் சீமான் சென்னை ஐகோர்ட்டில் கேபியர்ஸ் கார்பஸ் மனு ஒன்றை தாக்கல் செய்துள்ளார். அதில் கூறியிருப்பதாவது:-

சிறையில் விதிமுறைகளை மீறி என்னை தனி அறையில் அடைத்து வைத்துள்ளனர். மேலும் முதல் வகுப்பு வசதி செய்யாமல் சாதாரண வகுப்பில் வைத்துள்ளனர். தனிமை சிறையை நீக்கி முதல்வகுப்பு தர உத்தரவிட வேண்டும் என்று கூறியிருந்தார்.

இந்த வழக்கு நீதிபதிகள் நாகப்பன், சிவக்குமார் ஆகியோர் பெஞ்ச் முன்பு இன்று விசாரணைக்கு வந்தது. அப்போது அரசு தரப்பு கூடுதல் குற்றவியல் வக்கீல் அசன்முகமது ஜின்னா ஆஜராகி வாதாடினார். அப்போது தனிமை சிறையில் சீமானை அடைக்கவில்லை. அவருக்கு முதல் வகுப்பு வசதிகள் தரப்பட்டுள்ளதாகவும் கூறினார்.

இதற்கு சீமான் தரப்பில் வக்கீல் ராதாகிருஷ்ணன் பதில் மனுதாக்கல் செய்தார். அதில், சீமானுக்கு பக்கத்து அறையில் 15 கைதிகளை அடைத்து வைத்து விட்டு இவரை 50 பேர் அடைக்க கூடிய அறையில் தனியாக வைத்துள்ளனர்.

காலை, மாலை நேரங்களில் “வாக்கிங்” செல்லக்கூட இவருக்கு மட்டும் அனுமதி தருவதில்லை. “வாக்கிங்” செல்ல அவருக்கு அனுமதி தரவேண்டும் என்று கூறப்பட்டிருந்தது.

இதையடுத்து நீதிபதிகள் உத்தரவு பிறப்பித்தனர். அதில், சிறைசூழலை பற்றி சீமான் எழுத்து பூர்வமாகவும், அரசு தரப்பில் பதில் மனுவாகவும் அளிக்க வேண்டும் என உத்தரவிட்டு வழக்கை வருகிற திங்கட்கிழமைக்கு (2-ந்தேதி) ஒத்தி வைத்தனர்.