இறந்த நண்பனை தேடியவர் பலி : குடி, குடியை கெடுத்தது

ganie006 · ganie006 Wed Jul 28, 2010 8:47 am

சூலூர் : "குடி, குடியை கெடுக்கும்' என, மதுபாட்டில்கள் மீது
அச்சிடப்பட்டிருக்கும் வாசகம் உண்மையாகிவிட்டது. நண்பர்கள் இருவர் போதை
தலைக்கேறிய நிலையில் நிதானமின்றி பிரிந்து சென்று, அடுத்தடுத்து விபத்தில்
சிக்கி உயிரிழந்தனர்; இரண்டு குடும்பங்கள் சோகத்தில் துவண்டன.
சூலூர், காங்கயம்பாளையத்திலுள்ள மேட்டூரைச் சேர்ந்தவர் குமார்(35);
தர்மபுரியைச் சேர்ந்தவர் பெருமாள்(28); இருவரும் நண்பர்கள். ஒரே கட்டுமான
நிறுவனத்தில் தொழிலாளிகளாக பணிபுரிந்து வந்தனர். இரண்டு நாட்களுக்கு முன்
வேலை முடிந்து இருவரும் மது அருந்த சூலூர் வந்தனர். அளவுக்கு அதிகமாக மது
அருந்தி விட்டு வீட்டுக்கு தள்ளாடியபடியே கிளம்பினர். கொங்கு வேளாளர்
மண்டபம் அருகே நடந்து செல்லும் போது குமார் போதை தலைக்கேறி கீழே
விழுந்துள்ளார். இதனை அறியாமல் பெருமாள் வீட்டுக்குச் சென்றுவிட்டார்.
வீட்டில் உள்ளவர்கள் "குமார் எங்கே?' எனக்கேட்டுள்ளனர். "அவன், வீட்டுக்கு
வரவில்லையா' எனக் கேட்ட பெருமாள், குமாரைத்தேடிச் சென்றார்.
இதற்கிடையில், ரோட்டில் விழுந்து கிடந்த குமார், அடையாளம் தெரியாத
வாகனம் மோதி தலையில் பலத்த அடிபட்டு சம்பவ இடத்திலேயே இறந்தார். சூலூர்
போலீசார் சென்று, பிரேதத்தை கைப்பற்றி மருத்துவமனைக்கு அனுப்பினர்.
நண்பனைத் தேடி மீண்டும் சூலூருக்கே வந்த பெருமாள், எங்கு தேடியும் குமாரை
கண்டுபிடிக்க முடியாமல் ஏமாற்றத்துடன் வீட்டுக்கு திரும்ப ரோட்டில் நடந்து
சென்றார். குமார் விபத்துக்குள்ளான இடத்தருகே ரோட்டை கடந்தபோது, அவ்வழியே
வந்த கார் மோதி படுகாயமடைந்தார். கோவை அரசு மருத்துவமனையில் சேர்க்கப்பட்டு
இறந்தார். நண்பர்கள் இருவரும் அடுத்தடுத்து விபத்தில் இறந்ததால், இருவரது
குடும்பத்தினரும் சோகத்தில் மூழ்கினர். விபத்துகள் குறித்து சூலூர்
போலீசார் விசாரிக்கின்றனர்.