தமிழக இன்ஜினியரிங் கல்லூரிகளில் மேலும் அதிக சீட்கள் : 400 கல்லூரிகள் மனு

சென்னை : ""புதிய பாடப்பிரிவுகள், கூடுதல் இடங்களுக்கு அனுமதி கேட்டு
400க்கும் மேற்பட்ட கல்லூரிகள் ஏ.ஐ.சி. டி.இ.,க்கு விண்ணப்பித்துள்ளன,'' என
ஏ.ஐ.சி.டி.இ., தென்மண்டல தலைவர் மன்னர்ஜவகர் தெரிவித்தார். பொதுப்பிரிவு
மாணவர்களுக்கான பொறியியல் கவுன்சிலிங் சென்னை அண்ணா பல்கலைக்கழகத்தில்
நடந்து வருகிறது. கடந்த 5ம் தேதி துவங்கிய இக்கவுன்சிலிங், 23வது நாளாக
நேற்றும் தொடர்ந்து நடந்தது. இதுவரை கவுன்சிலிங்கில் பொறியியல் கல்லூரி
பாடப்பிரிவை தேர்வு செய்தவர்களில், 53 சதவீதத்திற்கும் மேற்பட்டோர்
குடும்பத்தில் முதல் தலைமுறை பட்டதாரிகள். இந்த ஆண்டு முதல் புதிதாக
துவக்கப்பட்டுள்ள தமிழ் பயிற்று மொழி பொறியியல் படிப்பில் மொத்தமுள்ள
இடங்களில் 41 சதவீதத்திற்கும் மேற்பட்ட இடங்கள் நிரம்பி விட்டன.
ஏ.ஐ.சி.டி.இ., தென்மண்டல தலைவர் மன்னர்ஜவகர் கூறியதாவது:
பொறியியல் கவுன்சிலிங்கில் இதுவரை 83 ஆயிரம் பேர் கவுன்சிலிங்கிற்கு
அழைக்கப்பட்டனர். இதில், 63 ஆயிரம் பேருக்கு இடங்கள் ஒதுக்கப்பட்டுள்ளன.
மீதமுள்ள 20 ஆயிரம் பேர் கவுன்சிலிங்கிற்கு வரவில்லை. மூன்றாம் கட்ட
கவுன்சிலிங்கிற்கும் 46 ஆயிரம் பேர் அழைக்கப்படவுள்ளனர். இந்த ஆண்டு
புதிதாக பொறியியல் கல்லூரிகள் துவங்க 42 கல்லூரிகளுக்கு ஏ.ஐ.சி.டி.இ.,
அனுமதி வழங்கியது. இதில் 10 கல்லூரிகளுக்கு அனுமதிக்கான கடிதம்
வழங்கப்பட்டு விட்டது. மீதமுள்ள 32 கல்லூரிகளுக்கு ஓரிருநாளில் அனுமதி
கடிதம் வழங்கப்படும். கூடுதல் இடங்கள், புதிய பாடப்பிரிவுகளுக்கு அனுமதி
கேட்டு, 400க்கும் மேற்பட்ட தமிழக பொறியியல் கல்லூரிகள் ஏ.ஐ.சி.டி.இ.,க்கு
விண்ணப்பித்துள்ளன. பல கல்லூரிகள் இ.சி.இ., பிரிவில் 60, 90 இடங்களை 120
இடங்களாக உயர்த்த அனுமதி கேட்டுள்ளன. கம்ப்யூட்டர் சயின்ஸ், சிவில்,
மெக்கானிக்கல் பிரிவுகளில் கூடுதல் இடங்கள் கேட்டும் பல கல்லூரிகள்
விண்ணப்பித்துள்ளன. பல கல்லூரிகள் ஐ.டி., பிரிவிலுள்ள இடங்களை திரும்ப
வழங்கி, வேறு பிரிவுகளில் கூடுதல் இடங்கள் வழங்குமாறு கேட்டுள்ளன. இது
குறித்து டில்லியில் நாளை நடக்கும் ஏ.ஐ.சி.டி.இ., கூட்டத்தில் இறுதி முடிவு
எடுக்கப்படும். இவ்வாறு மன்னர் ஜவகர் கூறினார். பொறியியல் மூன்றாம் கட்ட
கவுன்சிலிங் ஆகஸ்ட் 1 - 10ம் தேதி வரை நடக்கிறது. அதன்
பிறகு, துணை பொறியியல் கவுன்சிலிங் நடக்கவுள்ளது. பொறியியல்
கல்லூரிகளில் கூடுதல் இடங்கள் மற்றும் புதிய பாடப்பிரிவு இடங்கள் இந்த
கவுன்சிலிங் மூலம் நிரப்பப்படும். ஏற்கனவே இடத்தை தேர்வு செய்த
மாணவர்களும், முன்னணி கல்லூரிகளில் உருவாக்கப்படும் புதிய பாடப்பிரிவு,
கூடுதல் இடத்தில் சேர விரும்பினால், துணை கவுன்சிலிங்கில் கலந்து கொண்டு
இடத்தை தேர்வு செய்யலாமென உயர் கல்வித்துறை அமைச்சர் பொன்முடி
அறிவித்திருப்பது குறிப்பிடத்தக்கது. சிவில் பிரிவில் 61 சதவீதம்,
கம்ப்யூட்டர் சயின்ஸ் பிரிவில் 50 சதவீதம், இ.சி.இ., பிரிவில் 66 சதவீதம்,
இ.இ.இ., பிரிவில் 50 சதவீதம், இ., அண்டு ஐ., பிரிவில் 69 சதவீதம், ஐ.டி.,
பிரிவில் 44 சதவீதம், மெக்கானிக்கல் பிரிவில் 77 சதவீத இடங்கள்
நிரம்பியுள்ளன. மெடிக்கல் எலக்ட்ரானிக்ஸ், டெக்ஸ்டைல் கெமிஸ்டரி, பேஷன்
டெக்னாலஜி ஆகிய துறைகளில் 10 சதவீதத்திற்கும் குறைவான இடங்களே
நிரம்பியுள்ளன.