ரயிலில் கல்விச் சுற்றுலா செல்ல தமிழகத்தைச் சேர்ந்த 8,800 மாணவர்களுக்கு அனுமதி

by ganie006 Wed Jul 28, 2010 8:55 am

சென்னை, ஜூலை 27:
அனைவருக்கும் கல்வி திட்டத்தின் கீழ், ரயிலில் கல்வி சுற்றுலா செல்ல
தமிழகத்தைச் சேர்ந்த 8,800 கிராமப்புற பள்ளி மாணவ, மாணவிகளுக்கு அனுமதி
வழங்கப்பட்டுள்ளது. இந்த சிறப்பு சுற்றுலா பயணத்துக்காக ரூ. 1.60 கோடி நிதி
ஒதுக்கீடு செய்யப்பட்டுள்ளது. இந்த கல்வி சுற்றுலா பயணம் ஜூலை 28-ம் தேதி
(புதன்கிழமை) முதல் தொடங்க உள்ளது. தமிழகத்தில் பல்வேறு
மாவட்டங்களில் உள்ள அரசு பள்ளிக்கூடங்களில் 8-ம் படிக்கும் ஆதிதிராவிடர்,
பழங்குடியின மற்றும் சிறுபான்மையின மாணவ, மாணவிகளுக்கு கல்வி சுற்றுலா
செல்ல வாய்ப்பு அளிக்கும் வகையில் இந்திய ரயில்வே உணவு மற்றும் சுற்றுலா
கழகத்துடன் இணைந்து, புதிய அணுகுமுறைகளுக்கான இந்த சிறப்பு கல்விதிட்டம் செயல்படுத்தப்படுகிறது.இதன்படி
வரலாற்று சிறப்பு மிக்க, இயற்கை சூழல் சார்ந்த இடங்களுக்கு 3 நாள்களுக்கு
கல்வி சுற்றுலாவாக மாணவர்கள் அழைத்துச் செல்லப்பட உள்ளனர். இந்த ஆண்டு
8,800 பள்ளி மாணவர்களும், இவர்களை வழிநடத்தும் பாதுகாவலர்களாக 880
ஆசிரியைகளும் (10 மாணவர்களுக்கு ஒர் ஆசிரியை) உடன் செல்ல
அனுமதிக்கப்பட்டுள்ளனர். பெண் கல்விக்கு முக்கியத்துவம் அளிக்கவும்,
படைப்பாற்றல் கல்வியை சிறப்பாக செயல்படுத்தும் வகையில், இந்த சுற்றுலா
பயணத்துக்கு 75 சதவீதம் மாணவிகள் தேர்வு செய்யப்படுவர்.இதில்
கிராமப்புற பகுதிகளைச் சேர்ந்த, பொருளாதாரத்தில் மிகவும் பின்தங்கிய
நிலையில் உள்ள மாணவிகளை மட்டுமே தேர்ந்தெடுக்க அந்தந்த பள்ளி தலைமை
ஆசிரியர்களுக்கு கல்வித் துறை சார்பில் அறிவுறுத்தப்பட்டுள்ளது.
பெற்றோர்களிடம் இருந்து ஒப்புதல் கடிதத்தையும் பெற வேண்டும்.நீச்சலுக்கு
அனுமதி இல்லை: சுற்றுலா பயணத்தின்போது அருவிகள், ஆறு, கடல் உள்ளிட்ட
நீராதாரங்களில் மாணவர்கள் இறங்கவோ அல்லது நீச்சல் அடிக்கவோ கண்டிப்பாக
அனுமதிக்கக் கூடாது என்று உத்தரவிடப்பட்டுள்ளது.முக்கிய சுற்றுலா
இடங்கள்: சென்னை, காஞ்சிபுரம், வேலூர், திருவண்ணாமலை, விழுப்புரம், கடலூர்,
பெரம்பலூர் ஆகிய 7 மாவட்டங்களைச் சேர்ந்த மாணவர்கள் கன்னியாகுமரி, நெல்லை,
மதுரை மாவட்ட சுற்றுலா இடங்களுக்கு ரயிலில் அழைத்துச் செல்லப்படுவர்.நாகப்பட்டினம்,
தஞ்சாவூர், திருவாரூர், திருச்சி, கரூர், நாமக்கல், கன்னியாகுமரி,
தூத்துக்குடி, திருநெல்வேலி, விருதுநகர், ராமநாதபுரம், சிவகங்கை,
புதுக்கோட்டை, திண்டுக்கல், மதுரை, தேனி, நீலகிரி, சேலம் ஆகிய 18
மாவட்டங்களை சேர்ந்த பள்ளி மாணவர்கள் சென்னை மற்றும் காஞ்சிபுரம்
மாவட்டங்களில் உள்ள முக்கிய சுற்றுலா இடங்களுக்கு ரயிலில் அழைத்துச் செல்ல
ஏற்பாடு செய்யப்பட்டுள்ளது.கோவை, ஈரோடு, கிருஷ்ணகிரி, தருமபுரி,
திருவள்ளூர் மாவட்ட பள்ளி மாணவர்கள் திருச்சி, தஞ்சாவூர், புதுக்கோட்டை
மாவட்ட சுற்றுலா இடங்களுக்கு ரயிலில் அழைத்துச் செல்ல முன்பதிவு
செய்யப்படுகிறது.