தவறான சாதி சான்றிதழால் காங்கிரஸ் எம்பி தகுதிநீக்கம்

ரபீக் · ரபீக் Tue Jul 27, 2010 10:44 am

தாழ்த்தப்பட்டோர் ஜாதிப் பட்டியலில் இடம்பெறாத மாற்று சமுதாயம் குறிப்பிடப்பட்டிருந்ததால், கேரள காங்கிரஸ் மக்களவை உறுப்பினர் கொடுகுன்னில் சுரேஷ் திங்கள்கிழமை தகுதிநீக்கம் செய்யப்பட்டார்.
இவர் கடந்த 2009-ம் ஆண்டு நடந்த மக்களவைத் தேர்தலில் மாவேலிக்கரா தனித் தொகுதியில் காங்கிரஸ் கட்சி சார்பில் போட்டியிட்டு வெற்றிபெற்றார். இவருக்கு எதிராக போட்டியிட்ட இந்திய கம்யூனிஸ்ட் கட்சியைச் சேர்ந்த அனில் குமாரும் மேலும் இரண்டு வேட்பாளர்களும் இவர் வெற்றிபெற்றதை எதிர்த்து கேரள உயர் நீதிமன்றத்தில் வழக்குத் தொடர்ந்தனர்.

கொடுகுன்னில் சுரேஷ் தேர்தல் அதிகாரிகளிடம் தாக்கல் செய்திருந்த ஜாதிச் சான்றிதழில் செராமர் சமுதாயத்தைச் சேர்ந்தவர் என்று குறிப்பிட்டிருந்தார். ஆனால் இந்த சமுதாயம் தாழ்த்தப்பட்டோர் ஜாதிப் பட்டியலில் இடம்பெறவில்லை. எனவே இதுதொடர்பாக கேரள உயர் நீதிமன்றத்தில் தாக்கல் செய்யப்பட்ட மனு மீதான வழக்கில் திங்கள்கிழமை தீர்ப்பு அளிக்கப்பட்டது. வழக்கை விசாரணை செய்த நீதிபதி எம்.சசிதரன் நம்பியார், மக்களவை உறுப்பினர் பதவியிலிருந்து சுரேஷை தகுதிநீக்கம் செய்து உத்தரவிட்டார்.

தீர்ப்பு விவரம்:

கொடுகுன்னில் சுரேஷுக்கு நெடுமங்காடு, கொட்டாரக்கரா தாசில்தார்கள் ஜாதிச் சான்றிதழ் வழங்கியுள்ளனர். இந்த விஷயத்தில் தேர்தல் அதிகாரிகள் சரியாக செயல்படவில்லை. சுரேஷ் குறிப்பிட்டிருக்கும் சமுதாயம், தாழ்த்தப்பட்டோர் வகுப்பு பட்டியலில் இடம்பெறவில்லை. மனு தாக்கலின்போதே அவரது மனுவை ஆய்வு செய்து நிராகரித்திருக்க வேண்டும். தனித் தொகுதியில் அவர் வெற்றிபெற்றுள்ளது செல்லாது என்பதால் தகுதி நீக்கம் செய்து உத்தரவிடப்படுவதாக நீதிபதி உத்தரவில் தெரிவித்துள்ளார். இந்த உத்தரவு குறித்து மக்களவைத் தலைவரின் கவனத்துக்கு உடனடியாக கொண்டுசெல்ல வேண்டும் என்றும் அவர் தெரிவித்துள்ளார்.

இதற்கிடையே கேரள உயர் நீதிமன்ற உத்தரவை எதிர்த்து உச்ச நீதிமன்றத்தில் மேல் முறையீடு செய்ய உள்ளதாக சுரேஷ் தெரிவித்துள்ளார்